Levitico 21:1-24
21 Kinuna pay ni Jehova ken ni Moises: “Ibagam kadagiti papadi nga annak ni Aaron, ‘Awan uray maysa kadakayo ti mangrugit iti bagina gapu iti natay a tao.*+
2 Ngem mabalinna nga aramiden dayta gapu iti asideg a kabagianna, ti inana, amana, anakna a lalaki wenno babai, kabsatna a lalaki,
3 ken mabalinna a rugitan ti bagina para iti kabsatna a babai no maysa a birhen nga asideg kenkuana ken saan pay a naasawaan.
4 Saanna a rugitan ti bagina gapu iti bangkay ti babai a naasawaanen.
5 Saanda a kalbuen ti uloda+ wenno putdan ti barbasda wenno sugatsugaten ti bagida.+
6 Masapul a nasantuanda iti Diosda,+ saanda nga ibabain ti nagan ti Diosda,+ ta agidatdatagda iti tinapay* ken Jehova kas daton a mapuoran isu a rumbeng nga agbalinda a nasantuan.+
7 Saanda a mangasawa iti balangkantis,+ saanen a birhen, wenno naidiborsio,+ gapu ta ti padi ket nasantuan iti sanguanan ti Dios.
8 Ibilangyo a nasantuan+ ta isu ti mangidatdaton iti tinapay iti Diosmo. Masapul nga ibilangyo a nasantuan, ta siak ni Jehova, nasantuanak ken pinagbalinkayo a nasantuan.+
9 “‘No rugitan ti babai nga anak ti padi ti bagina babaen ti panagbalangkantisna, ibabainna ti amana. Masapul a mapapatay ken mapuoran.+
10 “‘Ti nangato a padi kadagiti kakabsatna a padi, a nabukbokan ti ulona iti nasantuan a lana+ ken napili* a mangisuot kadagiti opisial a bado,+ masapul a saanna a baybay-an a kusokuso ti buokna ken saanna a pisangen dagiti badona.+
11 Saanna nga asitgan ti asinoman a natay;*+ saanna a mabalin a rugitan ti bagina uray no ti ama wenno inana ti natay.
12 Saan a rummuar iti santuario ti Diosna+ ken saanna a rugitan dayta, ta adda kenkuana ti tanda ti dedikasion ken ti nasantuan a lana ti Diosna.+ Siak ni Jehova.
13 “‘Masapul a mangasawa iti birhen a babai.+
14 Saan a mabalin a mangasawa iti balo, naidiborsio, saanen a birhen, wenno balangkantis. Masapul a mangasawa iti birhen a babai.
15 Masapul a saanna nga ibabain dagiti kaputotanna,*+ ta siak ni Jehova, a namagbalin kenkuana a nasantuan.’”
16 Intuloy a kinuna ni Jehova ken ni Moises:
17 “Ibagam ken Aaron, ‘Saan a pulos mabalin nga umasideg tapno agidaton iti tinapay iti sanguanan ti Diosna ti asinoman a kaputotam* nga adda depektona.
18 No kas pagarigan ta adda depekto ti maysa a lalaki, saan koma nga umasideg: bulsek, pilay, nadadael ti rupana,* atiddog unay ti maysa a sakana,
19 natukkol ti saka wenno imana,
20 kubbo, pandek,* adda depekto ti matana, aggudgod, agkurad, wenno nadadael ti ukel-ukelna.+
21 Asinoman a lalaki a kaputotan* ni Aaron a padi nga adda depektona ket saan a mabalin nga umasideg tapno mangidatag ken Jehova kadagiti daton a mapuoran. Gapu ta adda depektona, saanna a mabalin ti umasideg tapno mangidaton iti tinapay iti sanguanan ti Diosna.
22 Mabalinna a kanen ti tinapay a naidaton iti Diosna manipud kadagiti banag a kasasantuan+ ken nasantuan.+
23 Ngem saan a mabalin nga umasideg iti kortina+ ken iti altar+ gapu ta adda depektona; ken saanna a mabalin a rugitan ti santuariok,+ ta siak ni Jehova a namagbalin kadagita a nasantuan.’”+
24 Iti kasta, imbaga ni Moises dagitoy ken ni Aaron ken kadagiti annakna ken iti amin nga Israelita.
Footnotes
^ Wenno “kararua.”
^ Wenno “taraon,” a tumukoy kadagiti daton.
^ Wenno “naisaad.” Lit., “napno ti imana.”
^ Wenno “aniaman a natay a kararua.” Ti Hebreo a sao a neʹphesh a nausar ditoy ket nainaig iti Hebreo a sao a kaipapananna, “natay.”
^ Lit., “bin-ina.”
^ Lit., “bin-im.”
^ Lit., “napisang ti agongna.”
^ Wenno mabalin a, “nakakutkuttong.”
^ Lit., “bin-i.”
