Levitico 15:1-33
-
Dagiti narugit a panagparuar ti mabagbagi (1-33)
15 Intuloy a kinuna ni Jehova kada Moises ken Aaron:
2 “Ibagayo kadagiti Israelita, ‘No adda agruar iti mabagbagi* ti maysa a lalaki gapu iti sakit, maibilang a narugit dayta.+
3 Maibilang a narugit dayta a tao, agtultuloy man ti panagparuar iti mabagbagina wenno matiped.
4 “‘Maibilang a narugit ti aniaman a pagiddaan ken pagtugawan dayta a masakit a tao.
5 Asinoman a makasagid iti pagiddaanna, masapul a labaanna dagiti badona ken agdigus ket maibilang a narugit agingga a lumnek ti init.+
6 Asinoman nga agtugaw iti nagtugawan ti masakit a tao, masapul a labaanna dagiti badona ken agdigus ket maibilang a narugit agingga a lumnek ti init.
7 Asinoman a makasagid iti masakit a tao, masapul a labaanna dagiti badona ken agdigus ket maibilang a narugit agingga a lumnek ti init.
8 No matupraan ti masakit a tao ti asinoman a maibilang a nadalus, masapul a labaan ti natupraan a tao dagiti badona ken agdigus ket maibilang a narugit agingga a lumnek ti init.
9 Maibilang met a narugit ti silia a pagsakayan ti masakit a tao.
10 Asinoman a makasagid iti aniaman a nagtugawanna ket maibilang a narugit agingga a lumnek ti init, ken asinoman a mangawit kadagita, masapul a labaanna dagiti badona ken agdigus ket maibilang a narugit agingga a lumnek ti init.
11 No saan a nagbuggo ti masakit a tao+ sa masagidna ti asinoman, masapul a labaan ti nasagidna a tao dagiti badona ken agdigus ket maibilang a narugit agingga a lumnek ti init.
12 No adda karamba a masagid ti masakit a tao, masapul a maburak dayta. Ngem no kayo ti pagkargaan, masapul a maugasan.+
13 “‘No simmardengen ti panagparuar dayta a tao ken immimbagen, palabsenna ti pito nga aldaw a pannakadalusna. Masapul a labaanna dagiti badona ken agdigus iti danum a naala iti ubbog ket maibilangen a nadalus.+
14 Iti maikawalo nga aldaw, mangala iti dua a pagaw wenno dua a sibong ti atap a kalapati+ ket mapan iti sanguanan ni Jehova iti ruangan ti tolda a pagkonsultaan sa itedna dagita iti padi.
15 Idaton dagita ti padi. Ti maysa ket kas daton gapu iti basol ken ti maysa ket kas daton a mapuoran. Idaton dagita ti padi tapno madalusan* ti masakit a tao iti sanguanan ni Jehova.
16 “‘No agparuar iti semilia ti maysa a lalaki, masapul a digusenna ti intero a bagina ken maibilang a narugit agingga a lumnek ti init.+
17 Masapul a labaanna ti aniaman a bado ken aruaten a lalat a naikkan iti semilia ket maibilang dayta a narugit agingga a lumnek ti init.
18 “‘No dennaan ti lalaki ti babai ket agparuar iti semilia, masapul nga agdigusda ken maibilangda a narugit agingga a lumnek ti init.+
19 “‘No agregla ti maysa a babai, agtultuloy a maibilang a narugit iti pito nga aldaw.+ Asinoman a makasagid kenkuana ket maibilang a narugit agingga a lumnek ti init.+
20 Maibilang a narugit ti aniaman a pagiddaan ken pagtugawanna bayat ti panagreglana.+
21 Asinoman a makasagid iti pagiddaan dayta a babai, masapul a labaanna dagiti badona ken agdigus ket maibilang a narugit agingga a lumnek ti init.
22 Asinoman a makasagid iti aniaman a nagtugawanna, masapul a labaanna dagiti badona ken agdigus ket maibilang a narugit agingga a lumnek ti init.
23 No nagtugaw iti katre wenno aniaman a banag, ti asinoman a makasagid iti nagtugawanna ket maibilang a narugit agingga a lumnek ti init.+
24 No dennaan ti lalaki dayta a babai ket maisagid kenkuana ti regla ti babai,+ maibilang a narugit ti lalaki iti pito nga aldaw kasta met ti aniaman a pagiddaanna.
25 “‘No agbulos ti dara ti babai iti adu nga aldaw+ ngem saan pay a tiempo ti panagreglana, wenno no napapaut ti panagpadarana ngem iti gagangay a panagreglana,+ maibilang a narugit iti amin nga aldaw a panagpadarana a kas met laeng no agregla.
26 Maibilang a narugit ti aniaman a pagiddaan ken pagtugawanna bayat ti panagpadarana+ a kas met laeng iti pagiddaan ken pagtugawanna no agregla.
27 Asinoman a makasagid kadagita ket agbalin a narugit, masapul a labaanna dagiti badona ken agdigus ket maibilang a narugit agingga a lumnek ti init.+
28 “‘Ngem no nalpasen ti panagreglana, mangpalabas iti pito nga aldaw, sa maibilangen a nadalus.+
29 Iti maikawalo nga aldaw, mangala iti dua a pagaw wenno dua a sibong ti atap a kalapati+ ket itedna dagita iti padi iti ruangan ti tolda a pagkonsultaan.+
30 Idatag ti padi ti maysa a billit kas daton gapu iti basol ken ti maysa kas daton a mapuoran. Aramiden dayta ti padi tapno madalusan* ti babai iti sanguanan ni Jehova.+
31 “‘Masapul ngarud a tulonganyo dagiti Israelita tapno agbalinda a nadalus ket saanda a matay gapu iti panangrugitda iti tabernakulo, nga adda iti tengngada.+
32 “‘Daytoy ti linteg maipapan iti lalaki nga adda agruar iti mabagbagina gapu iti sakit, iti lalaki a maibilang a narugit gapu iti panagruar ti semiliana,+
33 iti babai a maibilang a narugit gapu iti panagreglana,+ iti asinoman a lalaki wenno babai nga adda agruar iti mabagbagina,+ ken iti lalaki a makidenna iti babai a maibilang a narugit.’”
