Ebanghelio ni Juan 7:1-52
7 Kalpasanna, intultuloy ni Jesus ti nagdaliasat* iti Galilea ta saanna a kayat ti mapan idiay Judea, gapu ta kayat a patayen dagiti Judio.+
2 Ngem asideg idin ti Piesta ti Tabernakulo*+ dagiti Judio.
3 Gapuna, kinuna dagiti kakabsatna:+ “Mapanka idiay Judea tapno makita met dagiti adalam ti ar-aramidem.
4 Ta saan nga ilimed ti maysa ti aramidna no kayatna ti agbalin a nalatak. No ar-aramidem dagitoy, ipakitam tapno maammuan ti intero a lubong.”
5 Kinapudnona, saan idi a mamati kenkuana dagiti kakabsatna.+
6 Insungbat ni Jesus: “Saan pay a dimteng ti tiempok,+ ngem mabalinyo nga aramiden dayta iti aniaman a tiempo.
7 Awan ti rason a guraennakayo ti lubong, ngem siak, guraennak ta ibagbagak dagiti dakes nga aramidna.+
8 Mapankayo iti piesta; ngem saanak pay a mapan iti daytoy a piesta ta saan pay a dimteng ti tiempok.”+
9 Kalpasan a naibagana daytoy, nagtalinaed idiay Galilea.
10 Idi nakapanawen dagiti kakabsatna a mapan iti piesta, sililimed a napan met ni Jesus.
11 Bayat ti piesta, binirbirok dagiti Judio ket kinunada: “Ayanna dayta a tao?”
12 Nagiinnarasaas ti adu a tattao. Adda dagiti mangibagbaga: “Isu ket naimbag a tao.” Kuna met ti dadduma: “Saan. Al-allilawenna dagiti tattao.”+
13 Awan ti makaitured nga agsao maipapan kenkuana iti sanguanan dagiti tattao ta mabutengda kadagiti Judio.+
14 Iti katengngaan ti piesta, napan ni Jesus idiay templo ket nangisuro.
15 Nasdaaw dagiti Judio ket kinunada: “Nangal-alaan daytoy a tao iti kasta a kinalaingna iti Kasuratan*+ idinto ta saan met a nagadal kadagiti eskuelaan?”*+
16 Insungbat ni Jesus: “Ti isursurok ket saan a naggapu kaniak, no di ket naggapu iti daydiay nangibaon kaniak.+
17 Ti asinoman a mayat a mangaramid iti pagayatan ti Dios, maammuannanto no ti isursurok ket naggapu iti Dios+ wenno bukodko a kapanunotan.
18 Ti mangisuro iti bukodna a kapanunotan, kayatna ti maidaydayaw; ngem ti agtarigagay a mangidaydayaw iti daydiay nangibaon kenkuana+ ket napudno ken awan kinaulbod kenkuana.
19 Saan kadi a ni Moises ti nangted kadakayo iti Linteg?+ Ngem awan kadakayo ti mangtungtungpal iti Linteg. Apay a kayatdak a patayen?”+
20 Insungbat dagiti tattao: “Nalugananka iti demonio. Asino koma ti mayat a mangpatay kenka?”
21 Kinuna ni Jesus: “Maysa laeng ti inaramidko ket nasdaawkayo amin.
22 Gapuna, panunotenyo daytoy: Inted kadakayo ni Moises ti linteg maipapan iti panagkugit+—saan a naggapu dayta kenkuana, no di ket kadagidi ammana+—isu a kugitenyo ti maysa a lalaki uray no sabbath.
23 No kugitenyo ti maysa a lalaki iti sabbath tapno matungpalyo ti Linteg ni Moises, makapungtotkayo kadi kaniak ta pinaimbagko ti maysa a lalaki iti sabbath?+
24 Isardengyo ti mangukom maibatay iti makitkitayo, no di ket nalinteg koma ti panangukomyo.”+
25 Kinuna ti dadduma nga umili ti Jerusalem: “Saan kadi a daytoy ti tao a kayatda a patayen?+
26 Kitaenyo! Agsasao iti sanguanan dagiti tattao, ngem awan ti maikunada kenkuana. Saan ngata a siguradon dagiti panguluentayo nga isu ti Kristo?
27 Inton umay ti Kristo, awan ti makaammo iti paggapuanna.+ Ngem ammotayo ti naggapuan daytoy a tao.”
28 Bayat a mangisursuro ni Jesus idiay templo, imbagana iti napigsa: “Am-ammodak ken ammoyo ti naggapuak. Saanak nga immay iti bukodko a nakem.+ Ti nangibaon kaniak ket pudno, ngem saanyo nga am-ammo.+
29 Am-ammok+ Daydiay nangibaon kaniak gapu ta siak ti pannakabagina.”
30 Gapuna, inkagumaanda a tiliwen,+ ngem awan ti nakaitured a mangtengngel kenkuana ta saan pay a dimteng ti orasna.+
31 Nupay kasta, adu a tattao ti namati kenkuana+ ket kinunada: “Inton dumteng ti Kristo, agaramidto ngata iti ad-adu a pagilasinan ngem iti inaramid daytoy a tao?”
32 Nangngeg dagiti Fariseo ti iyar-arasaas dagiti tattao maipapan ken Jesus, isu a nangibaon dagiti panguluen a papadi ken Fariseo kadagiti guardia a mangtiliw* kenkuana.
33 Kinuna ni Jesus: “Adda pay bassit a tiempo a makikaduaak kadakayo sakbay a mapanak iti Daydiay nangibaon kaniak.+
34 Sapulendakto ngem saandak a masarakan, ket saankayto a makaumay iti ayanko.”+
35 Gapuna, kinuna dagiti Judio: “Papanan koma daytoy a tao tapno saantayo a masarakan? Mapan ngata kadagiti Judio a makipagnanaed kadagiti Griego ket suruanna dagiti Griego?
36 Ania ti kayat a sawen ti imbagana a, ‘Sapulendakto ngem saandak a masarakan, ket saankayto a makaumay iti ayanko’?”
37 Iti maudi nga aldaw, ti kapatgan nga aldaw ti piesta,+ nagtakder ni Jesus ket imbagana iti napigsa: “Umay kaniak ti asinoman a mawaw ket uminum.+
38 Ti mangipakita iti pammati kaniak ket agbalin a kas iti kinuna ti kasuratan: ‘Agayus manipud kenkuana ti sibibiag a danum.’”+
39 Ti tuktukoyenna ket ti nasantuan nga espiritu, a dandanin awaten dagidiay mamati kenkuana; ta awan pay idi ti espiritu,+ gapu ta saan pay a naipadayag ni Jesus.+
40 Kinuna ti dadduma a nakangngeg iti imbagana: “Sigurado a daytoy ti Propeta.”+
41 Adda met dagiti nagkuna: “Daytoy ti Kristo.”+ Ngem kinuna ti dadduma: “Saan nga idiay Galilea ti paggapuan ti Kristo.+
42 Saan aya a kuna ti kasuratan nga agtaud ti Kristo iti kaputotan ni David+ ken aggapu iti Betlehem,+ iti ili ni David?”+
43 Gapuna, timmaud ti nagduduma a kapanunotan maipapan kenkuana.
44 Inkagumaan ti dadduma a tiliwen* ngem awan ti nakaitured a mangtengngel kenkuana.
45 Idi nagsubli dagiti guardia, insaludsod dagiti panguluen a papadi ken Fariseo: “Apay a saanyo nga inyeg ditoy?”
46 Insungbat dagiti guardia: “Awan pay ti tao a kastoy ti panagsaona.”+
47 Gapuna, insaludsod dagiti Fariseo: “Naallilawkayo kadi met?
48 Adda aya panguluen wenno Fariseo a mamati kenkuana?+
49 Ngem dagitoy a saan a makaammo iti Linteg ket nailunod a tattao.”
50 Nagsao ni Nicodemo, a maysa met a Fariseo ken napan idi ken Jesus, ket kinunana:
51 “Saan nga ukomen ti Lintegtayo ti maysa a tao no di pay nangngegan ti dasigna ken naammuan ti ar-aramidenna, saan kadi?”+
52 Insaludsodda kenkuana: “Apay, naggapuka met kadi idiay Galilea? Sukimatem ti kasuratan ket maammuam nga awan ti propeta nga agtaud idiay Galilea.”*
Footnotes
^ Wenno “nagnagna.”
^ Wenno “Abong-abong.”
^ Lit., “sursurat.”
^ Kayatna a sawen, eskuelaan dagiti rabbi.
^ Wenno “mangaresto.”
^ Wenno “nga arestuen.”
^ Iti sumagmamano a nagkauna ken mapagtalkan a manuskrito, naikkat ti ber. 53 agingga iti kap. 8, ber. 11.
