Ebanghelio ni Juan 13:1-38
13 Sakbay pay ti piesta ti Paskua, ammo ni Jesus a dimtengen ti orasna+ a pumanaw ditoy lubong ket agsubli iti Ama.+ Gapu ta ay-ayatenna dagiti pasurotna nga adda ditoy lubong, inayatna ida agingga iti panagpatingga ti biagna.+
2 Madama idin ti panangrabiida. Naiserreken ti Diablo iti puso ni Judas Iscariote,+ nga anak ni Simon, ti panggep a mangtraidor ken Jesus.+
3 Gapu ta ammo ni Jesus nga inteden ti Ama ti amin a banag kenkuana ken ammona nga isu ket naggapu iti Dios ken agsublin iti Dios,+
4 timmakder iti panganan ket inikkatna ti kagayna. Nangala iti tualia sa inkabilna iti siketna.*+
5 Kalpasanna, inikkanna iti danum ti maysa a palanggana ket binugguanna dagiti saka dagiti adalanna sa pinunasanna iti tualia a naikabil iti siketna.*
6 Idi nakadanon ken Simon Pedro, kinuna ni Pedro: “Apo, bugguam kadi dagiti sakak?”
7 Insungbat ni Jesus: “Saanmo a maawatan ita ti ar-aramidek, ngem maawatamto met laeng.”
8 Kinuna ni Pedro: “Diak ipalubos a bugguam dagiti sakak.” Insungbat ni Jesus: “No saanka a bugguan,+ saanmo a mabalin ti makikadua kaniak.”
9 Imbaga ni Pedro: “Apo, saan laeng ngarud a dagiti sakak ti bugguam no di ket dagiti pay imak ken ti ulok.”
10 Kinuna ni Jesus: “Ti nagdigus ket nadalusen. Dagiti laengen sakana ti masapul a bugguan. Nadaluskayon, ngem saan a dakayo amin.”
11 Ammon ni Jesus no asino ti mangtraidor kenkuana+ isu nga imbagana: “Nadaluskayon, ngem saan a dakayo amin.”
12 Idi nabugguannan dagiti sakada, insuotna ti kagayna sa nagsadag manen iti lamisaan ket kinunana: “Matarusanyo kadi no apay nga inaramidko daytoy kadakayo?
13 Awagandak iti ‘Mannursuro’ ken ‘Apo,’ ket umisokayo ta kastaak.+
14 Gapuna, no siak nga Apo ken Mannursuro ket binugguak dagiti sakayo,+ masapul* met a bugguanyo dagiti saka ti maysa ken maysa.+
15 Inikkankayo iti pagtuladan tapno aramidenyo met ti inaramidko.+
16 Pudno unay kunak kadakayo, saan a natantan-ok ti adipen ngem ti apona, saan met a natantan-ok ti naibaon ngem ti nangibaon kenkuana.
17 Ita ta ammoyon dagitoy, naragsakkayo no aramidenyo.+
18 Saan a dakayo amin ti pangibagbagaak iti daytoy. Ammok dagiti pinilik. Ngem masapul a matungpal ti kuna ti kasuratan:+ ‘Ti makipangpangan iti tinapayko inkusayna ti mukodna kaniak.’*+
19 Ibagak daytoy kadakayo a nasaksakbay tapno inton mapasamak, mamatikayto a siak ti tuktukoyen ti kasuratan.+
20 Pudno unay kunak kadakayo, ti umawat iti asinoman nga ibaonko, awatennak met,+ ket ti umawat kaniak, awatenna met Daydiay nangibaon kaniak.”+
21 Idi naibagan daytoy ni Jesus, nariribukan unay, ket kinunana: “Pudno unay kunak kadakayo, maysa kadakayo ti mangtraidorto kaniak.”+
22 Nagkikinnita dagiti adalan ta saanda nga ammo ti tuktukoyen ni Jesus.+
23 Nakasadag idi iti abay* ni Jesus ti maysa kadagiti adalanna nga ipatpategna unay.+
24 Gapuna, sineniasan ni Simon Pedro ket kinunana: “Damagem man no asino ti tuktukoyenna.”
25 Nagsadag dayta nga adalan ken Jesus ket insaludsodna: “Apo, asino ti tuktukoyem?”+
26 Insungbat ni Jesus: “Isu daydiay pangtedak iti tinapay nga isawsawko.”+ Idi naisawsawnan ti tinapay, intedna ken Judas, nga anak ni Simon Iscariote.
27 Apaman a naawat ni Judas ti tinapay, sinerrek ni Satanas ti pusona.+ Gapuna, kinuna ni Jesus: “Ti ar-aramidem, aramidemon a dagus.”
28 Nupay kasta, awan kadagiti nagsadag iti lamisaan ti makaammo no apay nga imbagana dayta ken Judas.
29 Kinapudnona, impagarup ti dadduma kadakuada a gapu ta ni Judas ti paraiggem iti kahon ti kuarta,+ ibagbaga ni Jesus kenkuana, “Inka gumatang iti kasapulantayo para iti piesta,” wenno mangted iti tulong kadagiti napanglaw.
30 Gapuna, pimmanaw a dagus kalpasan nga inawatna ti tinapay. Rabii idin.+
31 Idi nakaruaren, kinuna ni Jesus: “Ita, maipadayagen ti Anak ti tao,+ ket maipadayag ti Dios babaen kenkuana.
32 Ti Dios a mismo ti mangipadayag kenkuana,+ ket dagus nga ipadayagna.
33 Patpatgek nga annak, bassit laengen a tiempo a kaduakayo. Sapulendakto; ket kas iti kinunak kadagiti Judio, ibagak met kadakayo ita, ‘Saanyo a mabalin ti umay iti papanak.’+
34 Mangtedak iti baro a bilin, nga ayatenyo ti maysa ken maysa; no kasano ti panangayatko kadakayo,+ kasta met ti panagiinnayatyo.+
35 Maammuanto ti amin a dakayo dagiti adalak—no agiinnayatkayo.”+
36 Insaludsod ni Simon Pedro: “Apo, sadino ti papanam?” Insungbat ni Jesus: “Saanmo a mabalin ti sumurot ita iti papanak, ngem sumurotkanto met laeng.”+
37 Kinuna ni Pedro: “Apo, apay a saanko a mabalin ti sumurot kenka ita? Nakasaganaak a mangited iti biagko* para kenka.”+
38 Simmungbat ni Jesus: “Nakasaganaka kadi a mangited iti biagmo* para kaniak? Pudno unay kunak kenka, saan pay a nagtaraok ti kawitan, namitlonton nga inlibaknak.”+
Footnotes
^ Wenno “imbarikesna.”
^ Wenno “nga imbarikesna.”
^ Wenno “obligasionyo.”
^ Wenno “maibusor kaniak.”
^ Lit., “barukong.”
^ Wenno “kararuak.”
^ Wenno “kararuam.”
