Joel 1:1-20
1 Daytoy ti sao ni Jehova ken ni Joel* nga anak ni Petuel:
2 “Denggenyo daytoy, dakayo a panglakayen,Ken ipangagyo, dakayo amin nga agnanaed iti daga.
Adda kadin napasamak a kastoy iti kaaldawanyoWenno idi kaaldawan dagidi ammayo?+
3 Ibagayo dayta kadagiti annakyo,Ken ibaganto met dagiti annakyo kadagiti annakda,Ken dagiti annakda iti sumaruno a henerasion.
4 Ti tedda dagiti mangdadael a dudon, kinnan ti rineprep a dudon;+Ket ti tedda ti rineprep a dudon, kinnan dagiti awan payakna a dudon;Ken ti tedda dagiti awan payakna a dudon, kinnan dagiti narawet a dudon.+
5 Agriingkayo, dakayo a mammartek,+ ket agsangitkayo!
Agdung-awkayo, dakayo amin a mangnginum iti arak,Ta naagaw iti ngiwatyo ti nasam-it nga arak.+
6 Ta dimmarup ti maysa a nasion iti dagak, nabileg ken di mabilang ti tattaona.+
Kasla ngipen ti leon ti ngipenna,+ ken kasla panga ti leon ti pangana.
7 Dinadaelna ti kaubasak ken pungdol laeng ti inteddana iti kayok a higos,Inukisanna dagita sa imbellengna,Isu a nagbalin a puraw dagiti saringitda.
8 Agdung-awkayo a kas iti birhen* a nakabado iti nakersang a lupotGapu iti nobiona* iti kinaagtutubona.
9 Nagsardengen ti daton a bukbukel+ ken daton nga inumen+ iti balay ni Jehova;Agladladingit dagiti papadi, dagiti agserserbi ken Jehova.
10 Nadadaelen ti talon, agladladingit ti daga;+Ta nadadaelen ti bukbukel, awanen ti baro nga arak, ken naibusen ti lana.+
11 Naupay dagiti mannalon, nagdung-aw dagiti agay-aywan iti kaubasan,Gapu iti trigo ken sebada;Ta awanen ti maapit iti talon.
12 Nagango ti puon ti ubas,Nalaylay ti kayo a higos.
Nagango ti amin a kayo iti talon—Ti granada, palma, ken mansanas;+Ta ti rag-o ti tattao ket nasuktan iti pannakaibabain.
13 Agbadokayo iti nakersang a lupot* ken agladingitkayo,* dakayo a papadi;Agdung-awkayo, dakayo nga agserserbi iti altar.+
Sumrekkayo ken agpatnag nga agbadokayo iti nakersang a lupot, dakayo nga agserserbi iti Diosko;Ta awanen ti mangipaay iti daton a bukbukel+ ken daton nga inumen+ iti balay ti Diosyo.
14 Iwaragawagyo* ti panagayunar; ipakaammoyo ti panagtitipon.+
Ummongenyo dagiti panglakayen, agraman ti amin nga agnanaed iti daga,Iti balay ni Jehova a Diosyo,+ ket agpatulongkayo ken Jehova.
15 Makapadanag dayta nga aldaw!
Ta asidegen ti aldaw ni Jehova,+Ket dumteng dayta a kas iti panangdadael ti Mannakabalin-amin!
16 Saan kadi a naala ti taraon iti mismo a sanguanantayo,Ken naikkat ti panagragsak ken panagrag-o iti balay ti Diostayo?
17 Nadadael dagiti bukel* a palpalaenda.
Nadadael dagiti kamarin.
Narakrak dagiti pagidulinan iti apit, ta awanen ti maapit a bukbukel.
18 Nagsennaay uray dagiti taraken nga animal!
Nagwawara dagiti baka, ta awan ti pagarabanda!
Ken nagsagaba ti pangen dagiti karnero.
19 Umawagakto kenka, O Jehova;+Ta dinadael ti apuy dagiti pagpastoran iti let-ang,Ken inibus ti apuy ti amin a kayo iti tanap.
20 Kailiwdaka uray dagiti atap nga animal,Gapu ta naatianan dagiti waigKen inuram ti apuy dagiti pagpastoran iti let-ang.”
Footnotes
^ Kaipapananna, “Ni Jehova ket Dios.”
^ Wenno “balasang.”
^ Wenno “asawana.”
^ Lit., “Agbarikeskayo.”
^ Wenno “banugbogenyo ti barukongyo.”
^ Wenno “Saganaanyo.”
^ Wenno mabalin a, “kimbet a higos.”
