Exodo 6:1-30
6 Kinuna ni Jehova ken Moises: “Makitam ita no ania ti aramidek ken Faraon.+ Gapu iti mannakabalin nga imak, mapilitanto ni Faraon a mangwayawaya kadagiti tattaok ken gapu iti mannakabalin nga imak, palubosannanto ida a pumanaw.”+
2 Imbaga ti Dios ken Moises: “Siak ni Jehova.
3 Masansan idi nga agparangak kada Abraham, Isaac, ken Jacob, kas Dios a Mannakabalin-amin,+ ngem saanko nga impakaammo kadakuada ti kaipapanan ti naganko a Jehova.+
4 Nakitulagak met kadakuada nga itedko ti daga ti Canaan, ti daga a pagnanaedanda kas ganggannaet.+
5 Nangngegko ti panagpakpakaasi dagiti Israelita nga ad-adipenen dagiti Egipcio, ket nalagipko ti tulagko.+
6 “Ibagam ngarud kadagiti Israelita: ‘Siak ni Jehova, ket wayawayaankayto iti panangparigat dagiti Egipcio ken iti panangadipenda.+ Usarekto ti nabileg* a takiagko a mangisalakan kadakayo ket dusaekto ida iti nakaro.+
7 Agbalinkayto a tattaok, ket siakto ti Diosyo.+ Sigurado a maammuanyonto a siak ni Jehova a Diosyo a mangiruar kadakayo manipud iti panangparigat dagiti Egipcio.
8 Ipankayto iti daga nga inkarik ken insapatak* nga ited kada Abraham, Isaac, ken Jacob; ket kukuayonton dayta.+ Siak ni Jehova.’”+
9 Kalpasanna, imbaga ni Moises daytoy kadagiti Israelita, ngem saanda a namati kenkuana ta napukawen ti namnamada ken nakaro ti pannakaadipenda.+
10 Kalpasanna, kinuna ni Jehova ken Moises:
11 “Mapanmo ibaga ken Faraon nga ari ti Egipto a masapul a palubosanna dagiti Israelita a pumanaw iti dagana.”
12 Ngem kinuna ni Moises ken Jehova: “Kitaem! Didakto pay pinati dagiti Israelita;+ patiennakto ngata ni Faraon ket saanak a nalaing nga agsao?”*+
13 Ngem inulit nga imbaga ni Jehova kada Moises ken Aaron dagiti bilinna ken Faraon nga ari ti Egipto ken kadagiti Israelita tapno mairuarda dagiti Israelita iti Egipto.
14 Dagitoy ti ulo iti pamilia dagiti ammada: Dagiti annak ni Ruben nga inauna ni Israel+ ket da Hanok, Palu, Hezron, ken Carmi.+ Dagita dagiti pamilia a nagtaud ken Ruben.
15 Dagiti annak ni Simeon ket da Jemuel, Jamin, Ohad, Jakin, Zohar, ken Shaul nga anak ti maysa a Canaanita.+ Dagita dagiti pamilia a nagtaud ken Simeon.
16 Dagitoy ti nagan dagiti annak ni Levi,+ sigun iti nagtaudanda a pamilia: Gerson, Cohat, ken Merari.+ Nagbiag ni Levi iti 137 a tawen.
17 Dagiti annak ni Gerson ket da Libni ken Simei, sigun kadagiti nagtaudanda a pamilia.+
18 Dagiti annak ni Cohat ket da Amram, Izar, Hebron, ken Uziel.+ Nagbiag ni Cohat iti 133 a tawen.
19 Dagiti annak ni Merari ket da Mali ken Musi.
Dagitoy ti pamilia dagiti Levita, sigun iti nagtaudanda a pamilia.+
20 Nagbalin nga asawa ni Amram ni Jocabed a kabsat a babai ni amana.+ Isu ti ina da Aaron ken Moises.+ Nagbiag ni Amram iti 137 a tawen.
21 Dagiti annak ni Izar ket da Kore,+ Nefeg, ken Zikri.
22 Dagiti annak ni Uziel ket da Misael, Elzafan,+ ken Sitri.
23 Nagbalin nga asawa ni Aaron ni Eliseba nga anak a babai ni Aminadab a kabsat a babai ni Naason.+ Isu ti ina da Nadab, Abihu, Eleazar, ken Itamar.+
24 Dagiti annak ni Kore ket da Asir, Elkana, ken Abiasaf.+ Dagita dagiti pamilia ti annak ni Kore.+
25 Nagbalin nga asawa ni Eleazar+ nga anak ni Aaron ti maysa kadagiti annak a babbai ni Putiel ket isu ti ina ni Finehas.+
Dagita ti ulo dagiti pamilia dagiti Levita, sigun iti nagtaudanda a pamilia.+
26 Dayta ti nagtaudan da Aaron ken Moises a nangibagaan ni Jehova: “Iruaryo dagiti Israelita idiay Egipto a kas naurnos a grupo dagiti soldado.”*+
27 Isuda ti nakisarita ken Faraon nga ari ti Egipto tapno iruarda dagiti Israelita iti Egipto.+
28 Idi aldaw a nakisao ni Jehova ken Moises idiay Egipto,
29 kinuna ni Jehova kenkuana: “Siak ni Jehova. Ibagam ken Faraon nga ari ti Egipto ti amin nga ibagbagak kenka.”
30 Ket kinuna ni Moises ken Jehova: “Saanak a nalaing nga agsao,* isu a kasano koma a patiennakto ni Faraon?”+
Footnotes
^ Lit., “nakaunnat.”
^ Lit., “inngatok ti imak.”
^ Lit., “saan a nakugit ti bibigko.”
^ Lit., “sigun kadagiti armadada.”
^ Lit., “saan a nakugit ti bibigko.”
