Exodo 10:1-29
10 Kalpasanna, kinuna ni Jehova ken Moises: “Mapanka ken Faraon ta impalubosko a tumangken ti pusona ken ti puso dagiti adipenna,+ tapno maipakitak a mismo kenkuana dagiti pagilasinan ti pannakabalinko,+
2 ken tapno maipakaammoyo kadagiti annak ken appokoyo no kasano kakaro ti panangdidigrak iti Egipto ken no ania dagiti inaramidko a pangdusa kadakuada;+ ket sigurado a maammuanyonto a siak ni Jehova.”
3 Napan da Moises ken Aaron iti ayan ni Faraon ket kinunada: “Kinuna ni Jehova a Dios dagiti Hebreo, ‘Agingga iti kaano a dimo kayat ti agpasakup kaniak?+ Palubosam dagiti tattaok tapno makapagserbida kaniak.
4 No dimo latta palubosan dagiti tattaok, mangyegak inton bigat kadagiti dudon iti intero a daga a pagturayam.
5 Saanto a makita ti rabaw ti daga gapu iti kasta unay a kaaduda. Ibusendanto ti amin a saan a dinadael ti uraro, a nabati para kadakayo, ken kanendanto ti amin a nabati a kayo.+
6 Serkendanto dagiti balaymo, ti balbalay ti amin nga adipenmo, ken ti balbalay iti intero nga Egipto ket awan pay ti kasta a nakita dagidi ammam ken dagidi apongmo sipud nayanakda.’”+ Ket pimmanaw da Moises ken Aaron iti sango ni Faraon.
7 Kinuna dagiti adipen ni Faraon: “Kaanonto a sumardeng daytoy a lalaki a mangdiddidigra* kadatayo? Palubosam idan a pumanaw tapno agserbida ken Jehova a Diosda. Dimo kadi makita a nadadaelen ti Egipto?”
8 Pinaayaban manen ni Faraon da Moises ken Aaron ket kinunana kadakuada: “Sige, inkayon agserbi ken Jehova a Diosyo. Ngem siasino dagiti mapan?”
9 Insungbat ni Moises: “Mapankami amin. Itugotmi dagiti ubbing, dagiti natataengan, dagiti annakmi, agraman dagiti karnero ken bakami,+ ta agpiestakami para ken Jehova.”+
10 Kinuna ni Faraon kadakuada: “Panagkunayo, palubosankayo ken dagiti annakyo? Ta no mapasamak ti kasta, agpayso a kaduayo ni Jehova.+ Adda la ketdi dakes a panggepyo.
11 Saan a mabalin! Dakayo laeng a lallaki ti mapan agserbi ken Jehova kas iti kidkiddawenyo.” Idi kuan, napapanawda iti sango ni Faraon.
12 Kinuna itan ni Jehova ken Moises: “Iyunnatmo ta imam iti rabaw ti daga ti Egipto tapno umay dagiti dudon iti intero nga Egipto ket ibusenda ti amin a mula a natedda idi nagtudo iti uraro.”
13 Dagus nga inyunnat ni Moises ti bastonna iti rabaw ti daga ti Egipto, ket nangyeg ni Jehova iti angin nga aggapu iti daya iti agmalem ken agpatnag. Kabigatanna, addan dagiti dudon.
14 Ket nagwaras ken nagdisso dagiti dudon iti intero nga Egipto.+ Daydi pay laeng ti nakitada a kapuskolan+ a pangen dagiti dudon ken pulos a saanen a napasamak pay dayta.
15 Uray la a simmipnget ti daga gapu iti kaaduda. Inibusda ti amin a mula ken bunga dagiti kayo a natedda idi nagtudo iti uraro. Awan ti bulong a natedda kadagiti kayo wenno mula iti intero nga Egipto.
16 Pinaayaban a dagus ni Faraon da Moises ken Aaron ket kinunana: “Nagbasolak ken Jehova a Diosyo ken kadakayo.
17 Pakawanendak koma, uray ita laeng. Ipakaasiyo ken Jehova a Diosyo nga ikkatenna kaniak daytoy makapapatay a didigra.”
18 Isu* a pimmanaw iti sango ni Faraon ket nagpakaasi ken Jehova.+
19 Idi kuan, binaliwan ni Jehova ti turong ti angin. Immay ti napigsa nga angin manipud iti laud ket inyanginna dagiti dudon agingga iti Nalabaga a Baybay. Awan a pulos ti nabati a dudon iti Egipto.
20 Ngem impalubos ni Jehova a sumukir ni Faraon,+ ket saanna a pinalubosan a pumanaw dagiti Israelita.
21 Kinuna ni Jehova ken Moises: “Iyunnatmo ta imam a nakaturong iti langit, tapno maabbongan ti intero nga Egipto iti nakaro a kinasipnget.”
22 Dagus nga inyunnat ni Moises ti imana a nakaturong iti langit, ket simmipnget iti kasta unay iti intero nga Egipto iti tallo nga aldaw.+
23 Saanda a nakapagkikinnita, ken iti tallo nga aldaw, awan ti rimrimmuar kadagiti balbalayda. Ngem adda lawag iti pagnanaedan ti amin nga Israelita.+
24 Kalpasanna, inayaban ni Faraon ni Moises ket kinunana: “Inkayon agserbi ken Jehova+ ken itugotyo dagiti annakyo. Basta ibatiyo dagiti karnero ken bakayo.”
25 Ngem kinuna ni Moises: “Ikkannakami ngarud kadagiti animal nga idatonmi ken Jehova a Diosmi.+
26 Masapul nga ikuyogmi dagiti tarakenmi. Awanto ti animal* nga ibatimi ta usarenmi ti dadduma kadagita iti panagdaydayawmi ken Jehova a Diosmi, ken saanmi nga ammo no ania ti idatonmi ken Jehova agingga a makadanonkami sadiay.”
27 Ngem impalubos ni Jehova a sumukir ni Faraon, ket saanna ida a pinalubosan a pumanaw.+
28 Kinuna kenkuana ni Faraon: “Pumanawka iti sanguanak! Saankan nga agpakpakita kaniak, ta no umaykanto pay ditoy, mataykanto.”
29 Insungbat ni Moises: “Sige, no kasta ti kunam, saanakton nga agpakita pay kenka.”
