Ti Maikadua a Cronicas 10:1-19
-
Agrebelde ti Israel ken ni Rehoboam (1-19)
10 Napan ni Rehoboam idiay Sikem,+ ta napan sadiay ti intero nga Israel tapno pagbalinenda nga ari.+
2 Idi nadamag daytoy ni Jeroboam+ nga anak ni Nebat (nga agnanaed idi idiay Egipto ta nagtalaw maigapu ken Ari Solomon),+ nagsubli ni Jeroboam manipud Egipto.
3 Gapuna, pinaayabanda, ket napan ni Jeroboam ken ti intero nga Israel ken ni Rehoboam sa kinunada:
4 “Inikkannakami ni amam iti nadagsen nga awit.+ Ngem no palakaem ti panagserbimi ken amam ken palag-anem ti nadagsen* nga awit nga impabaklayna kadakami, agserbikamto kenka.”
5 Insungbatna: “Agsublikayto kaniak kalpasan ti tallo nga aldaw.” Gapuna, pimmanaw dagiti tattao.+
6 Nagkonsulta ni Ari Rehoboam kadagiti lallakay* a nagserbi ken Solomon nga amana idi sibibiag pay. Kinunana: “Ania ti maibalakadyo nga isungbatko kadagiti tattao?”
7 Insungbatda: “No naimbagka iti daytoy nga ili ket pagustuam ida ken nasayaat ti ibagam kadakuada, agtalinaeddanto nga adipenmo.”
8 Ngem saanna nga impangag ti balakad dagiti lallakay,* ket nagkonsulta kadagiti kapatadanna a lallaki nga agserserbin kenkuana.+
9 Insaludsodna kadakuada: “Ania ti maibalakadyo nga isungbatko kadagiti tattao a nangibaga kaniak, ‘Palag-anem ti awit nga impabaklay ni amam kadakami’?”
10 Insungbat dagiti kapatadanna: “Kasaritam dagiti tattao a nangibaga kenka, ‘Inikkannakami ni amam iti nadagsen nga awit, ngem masapul a palag-anem,’ ket ibagam kadakuada, ‘Nais-istriktoakto ngem ni amak.*
11 Inikkannakayo ni amak iti nadagsen nga awit, ngem nayonakto pay. Dinusanakayo ni amak iti saplit, ngem dusaenkayto iti saplit nga adda tademna.’”
12 Iti maikatlo nga aldaw, nagsubli ken Rehoboam ni Jeroboam ken dagiti Israelita, ta imbaga ti ari: “Agsublikayto kaniak iti maikatlo nga aldaw.”+
13 Ngem nagubsang ti sungbat ti ari kadakuada. Iti kasta, saan nga impangag ni Ari Rehoboam ti imbalakad dagiti lallakay.*
14 Imbagana kadakuada ti imbalakad dagiti kapatadanna: “Pagbalinekto a nadagdagsen ti awityo, ken nayonakto pay. Dinusanakayo ni amak iti saplit, ngem dusaenkayto iti saplit nga adda tademna.”
15 Gapuna, saan nga impangag ti ari dagiti tattao ta immaniobra ti pudno a Dios+ ti napasamak, tapno matungpal ken Jeroboam nga anak ni Nebat ti imbaga ni Jehova babaen ken Ahias+ a taga-Shilo.
16 Gapu ta saan nga impangag ti ari ti kiddaw dagiti Israelita, kinunada kenkuana: “Adda aya bingaymi ken David? Awan ti tawidmi iti anak ni Jesse. Agsubli ti tunggal maysa kadakayo iti diosyo, O Israel. Sika ti mangaywan iti sangakabbalayam, O David!”+ Iti kasta, nagawid ti amin nga Israelita kadagiti balayda.*+
17 Ngem nagtultuloy nga inturayan ni Rehoboam dagiti Israelita nga agnanaed kadagiti siudad ti Juda.+
18 Kalpasanna, imbaon ni Ari Rehoboam ni Hadoram,+ a mangidadaulo kadagiti naayaban nga agtrabaho, ngem inubor dagiti Israelita agingga a natay. Dagus a naglugan ni Ari Rehoboam iti karuahena sa nagkamang idiay Jerusalem.+
19 Intultuloy dagiti Israelita ti bumusor iti sangakabbalayan ni David agingga ita nga aldaw.
Footnotes
^ Wenno “mangirurumen.”
^ Wenno “panglakayen.”
^ Wenno “panglakayen.”
^ Lit., “Napuspuskolto ti kikitko ngem ti siket ni amak.”
^ Wenno “panglakayen.”
^ Lit., “toldada.”
