Maikadua Kadagiti Taga-Corinto 4:1-18
4 Gapu ta adda kadakami daytoy a ministerio babaen ti asi a naipakita kadakami, saankami a sumuko.
2 Ngem tinallikudanmin ti nakababain, nalimed a bambanag, a saankamin a mangal-allilaw ken saanmi a lalaokan ti sao ti Dios;+ ngem babaen ti panangipakitami iti kinapudno kadagiti tattao, irekrekomendami ti bagimi iti tunggal konsiensia ti tao iti imatang ti Dios.+
3 Kinapudnona, no naabbongan ti naimbag a damag nga ipakpakaammomi, naabbongan dayta kadagidiay agturong iti pannakadadael.
4 Binulsek ti dios daytoy a sistema ti bambanag*+ ti pampanunot dagiti di manamati,+ tapno saan nga agsilnag ti lawag* ti nadayag a naimbag a damag maipapan iti Kristo,+ a ladawan ti Dios.+
5 Ta saan a ti bagimi ti ikaskasabami, no di ket ni Jesu-Kristo kas Apo ken idekdeklarami ti bagimi kas adipenyo maigapu ken Jesus.
6 Ta ti Dios ti nangibaga: “Agsilnag koma ti lawag iti kasipngetan,”+ ket sinilnaganna dagiti pusotayo tapno malawagan dagita+ iti nadayag a pannakaammo maipapan iti Dios babaen ti rupa ni Kristo.
7 Nupay kasta, addaankami iti gameng+ a naikabil kadagiti damili a pagkargaan,*+ tapno ti bileg a nalablabes ngem iti gagangay ket agtaud iti Dios saan a kadakami.+
8 Napalawlawankami iti nagduduma a pakarigatan, ngem saankami a napupok; nariribukankami, ngem adda latta nagruaranmi;*+
9 naidadaneskami, ngem saankami a nabaybay-an;+ natuangkami, ngem saankami a nadadael.+
10 Kanayon a maipasangokami iti ipapatay kas ken Jesus, a mangipakita nga agsagsagabakami a kas iti sinagaba ni Jesus.+
11 Ta agbibiagkami ngem kanayon nga agpegpeggadkami a matay+ maigapu ken Jesus, a mangipakita met nga agsagsagabakami a kas iti sinagaba ni Jesus.
12 Nupay maipasangokami iti ipapatay, biag ti resultana kadakayo.
13 Gapu ta addaankami iti isu met laeng nga espiritu ti pammati a kas iti naisurat: “Namatiak, isu a nagsaoak”;+ mamatikami met isu nga agsaokami,
14 ta ammomi a Daydiay nangpagungar ken Jesus pagungarennakaminto met a makikadua ken Jesus, ken ipresentanatayto iti sanguanan ni Jesus.+
15 Ta amin dagitoy ket maigapu kadakayo, tapno ad-adda nga umadu ti nagpaiduma a kinaimbag gapu ta adu pay ti agyamyaman a pakaidayawan ti Dios.+
16 Gapuna, saantayo a sumuko, ngem uray no kumapkapuy ti bagitayo, inaldaw a mapabpabaro ti puso ken panunottayo.
17 Ta nupay apagbiit ken nalag-an ti pakarigatan,* agresulta dayta iti panangawattayo iti dayag nga agbalin a dakdakkel* ken agnanayon;+
18 bayat nga ipampamaysatayo dagiti matatayo, saan nga iti bambanag a makita, no di ket iti bambanag a di makita.+ Ta temporario ti bambanag a makita, ngem agnanayon ti bambanag a di makita.
Footnotes
^ Wenno “silaw.”
^ Wenno “burnay.”
^ Wenno mabalin a, “ngem saankami a nabaybay-an a maup-upay.”
^ Wenno “pannubok.”
^ Lit., “nadagdagsen.”
