Maikadua Kadagiti Taga-Corinto 11:1-33
11 An-anusandak koma, uray no kasla saanak a nainkalintegan no dadduma. Ngem iti kinapudnona, an-anusandakon!
2 Ta agimonak* gapu kadakayo kas iti panagimon ti Dios,* ta inkarik a mismo nga iyasawakayo iti maysa a lalaki tapno maipresentakayo iti Kristo kas nadalus* a birhen.+
3 Ngem madanaganak amangan no maimpluensiaan ti panunotyo kas iti panangallilaw ti uleg ken Eva babaen ti kinasikapna,+ ket mapukawyo ti nadalus* ken pudno nga ayatyo a maikari iti Kristo.+
4 Ta no kasta, no adda umay mangikasaba iti Jesus a naiduma iti inkasabami, wenno umawatkayo iti espiritu a naiduma iti naited kadakayo, wenno iti naimbag a damag a naiduma iti inakseptaryo,+ nalakakayo a mamati kenkuana.
5 Ta ibilangko a saanak a nakapkapuy ngem kadagiti sobra ti laingna nga apostolyo maipapan iti aniaman a banag.+
6 Ngem uray no saanak a nalaing nga agsao,+ addaanak iti pannakaammo; silalawag nga impakitami daytoy kadakayo iti amin a pamay-an ken amin a banag.
7 Wenno nakabasolak aya idi nagpakumbabaak tapno maitan-okkayo, ta siraragsak ken awan bayadna nga impakaammok kadakayo ti naimbag a damag maipapan iti Dios?+
8 Pinaidamak* ti dadduma a kongregasion babaen ti panangawatko kadagiti tulong* tapno makapagserbiak kadakayo.+
9 Ngem idi addaak kadakayo ken nagkasapulanak, saanak a nagbalin a dadagsen iti asinoman, ta inted dagiti kakabsat a naggapu idiay Macedonia ti amin a kasapulak.+ Wen, iti aniaman a pamay-an, saankayo a pinadagsenan ket itultuloyko nga aramiden dayta.+
10 Agingga a pasurotnak ni Kristo, saanko nga isardeng daytoy a panagpannakkel+ kadagiti rehion ti Acaya.
11 Apay nga inaramidko dayta? Gapu ta saankayo nga ay-ayaten? Ammo ti Dios nga ay-ayatenkayo.
12 Ngem itultuloyko ti ar-aramidek,+ tapno awan ti pambar dagidiay agbirbirok iti rason* a makipadada kadakami iti bambanag* nga ipampannakkelda.
13 Ta ulbod nga apostol dagita a lallaki, manangallilawda a trabahador, nga agpampammarang kas apostol ni Kristo.+
14 Diak pakasdaawan dayta, ta agpampammarang met ni Satanas kas anghel ti lawag.+
15 Saan ngarud a pakasdaawan no agpampammarang met dagiti ministrona kas ministro ti kinalinteg. Ngem ti pagtungpalanda ket maitunos kadagiti aramidda.+
16 Ibagak manen: Awan koma ti mangipagarup a saanak a nainkalintegan. Ngem uray no ipagarupyo a kasta, awatendak ngarud kas di nainkalintegan a tao, tapno makapagpannakkelak met bassit.
17 Agsasaoak saan a kas panangtulad iti ulidan ti Apo, no di ket kas di nainkalintegan a tao, nga agpampannakkel ken agtaltalek iti bagina.
18 Gapu ta adu ti agpampannakkel sigun iti lasag,* agpannakkelak met.
19 Gapu ta “nainkalintegankayo” unay, kaykayatyo nga anusan dagiti di nainkalintegan.
20 Kinapudnona, anusanyo ti asinoman a mangadipen kadakayo, asinoman a mangagaw iti sanikuayo ken iti adda kadakayo, asinoman a mangitan-ok iti bagina kadakayo, ken asinoman a mangtungpa kadakayo.
21 Ibagak daytoy a pakaibabainanmi, ta kasla nakapuykami iti imatangyo.
Ngem no saan a mabain ti dadduma nga agpannakkel, saanak met a mabain nga agpannakkel, uray no adda mangibilang kaniak kas di nainkalintegan.
22 Hebreoda kadi? Uray siak.+ Israelitada kadi? Uray siak. Kaputotan* kadi ida ni Abraham? Uray siak.+
23 Ministro kadi ida ni Kristo? Sumungbatak a kasla agmauyong, ad-adu ti napadasak: Ad-adu ti naaramidak,+ ad-adu ti pannakaibaludko,+ nagsagabaak iti di mabilang a pannakakabkabil, ken namin-adu a dandaniak natay.+
24 Naminlima a sinapsaplitdak dagiti Judio iti 40 a daras kurang ti maysa,+
25 namitlo a napangpang-orak,+ naminsan a nauborak,+ namitlo a narba ti nagluganak a barko,+ maysa a rabii ken maysa nga aldaw nga addaak iti taaw;
26 masansan nga agdaliasatak, nagpeggadak kadagiti karayan, kadagiti tulisan, kadagiti kailiak,+ kadagiti nasion,+ kadagiti siudad,+ iti let-ang, kadagiti baybay, kadagiti sinankakabsat,
27 nagtrabahoak met iti nadagsen ken nagbannogak, masansan a nagpuyatak iti rabii,+ nabisinan ken nawawak,+ masansan nga awan ti kanek,+ napalalo ti lamminko ken kurang ti badok.*
28 Malaksid kadagita, inaldaw a madanaganak* gapu iti amin a kongregasion.+
29 No adda nakapuy, saanak kadi a nakapuy? No adda maitibkol, saanak kadi a makapungtot?
30 No masapul nga agpannakkelak, ipannakkelko ti bambanag a mangipakita iti pagkapuyak.
31 Ti Dios ken Ama ni Apo Jesus, Daydiay maidaydayaw iti agnanayon, ammona a saanak nga agul-ulbod.
32 Idiay Damasco, ti gobernador nga adda iti babaen ni Aretas nga ari bambantayanna idi ti siudad tapno tiliwennak,
33 ngem inkabildak iti kuribot sa naipababaak iti tawa ti pader ti siudad,+ isu a nakalibasak.
Footnotes
^ Wenno “awan pakapilawanna.”
^ Wenno “maseknanak.”
^ Lit., “regta ti Dios.”
^ Wenno “awan pakapilawanna.”
^ Lit., “Tinakawak.”
^ Wenno “suporta.”
^ Wenno “pambar.”
^ Wenno “akem.”
^ Kayatna a sawen, sigun iti panangmatmat ti tao.
^ Lit., “Bin-i.”
^ Lit., “ken lamolamoak.”
^ Wenno “mariribukanak.”
