Ti Maikadua nga Ar-ari 25:1-30
25 Iti maikasiam a tawen ti panagturay ni Zedekias, iti maika-10 nga aldaw ti maika-10 a bulan, napan ni Ari Nabucodonosor+ ti Babilonia ken ti intero nga armadana iti Jerusalem tapno rautenda dayta.+ Nagkampo ken nangaramid iti pader iti aglikmut ti Jerusalem,+
2 ket napalawlawan ti siudad agingga iti maika-11 a tawen ti panagturay ni Ari Zedekias.
3 Iti maikasiam nga aldaw ti maikapat a bulan, nakaro ti bisin+ iti siudad, ket awan ti makan dagiti umili.+
4 Naabutan ti pader ti siudad,+ ket naglibas iti rabii ti amin a soldado, a dimmalanda iti nagbaetan ti dua a pader nga asideg iti hardin ti ari, bayat a pinalawlawan dagiti Caldeo ti siudad, ket nagturong ti ari idiay Araba.+
5 Ngem kimmamat ti armada dagiti Caldeo, ket nakamatanda ti ari idiay tanap ti Jerico, isu a nawarawara dagiti soldadona.
6 Tiniliwda ti ari+ sa impanda iti ari ti Babilonia idiay Ribla ket sinentensiaanda.
7 Pinapatayda dagiti annak a lallaki ni Zedekias iti imatangna. Kalpasanna, binulsek ni Nabucodonosor ni Zedekias, pinosasanna iti gambang, sa impanna idiay Babilonia.+
8 Iti maikapito nga aldaw ti maikalima a bulan, iti maika-19 a tawen ti panagturay ni Nabucodonosor nga ari ti Babilonia, napan idiay Jerusalem ni Nabuzaradan+ a panguluen dagiti guardia ken adipen ti ari ti Babilonia.+
9 Pinuoranna ti balay ni Jehova,+ ti balay* ti ari,+ ken amin a balay iti Jerusalem.+ Pinuoranna met ti balay ti tunggal natan-ok a tao.+
10 Dagiti pader ti Jerusalem ket rinebba ti intero nga armada dagiti Caldeo, a kadua ti panguluen dagiti guardia.+
11 Impanaw ni Nabuzaradan a panguluen dagiti guardia ti amin nga umili a nabati iti siudad, dagiti kimmappon iti ari ti Babilonia, ken ti dadduma pay nga umili.+
12 Ngem imbati ti panguluen dagiti guardia ti dadduma a kapanglawan nga umili ket pinilitna ida nga agtrabaho kadagiti kaubasan.+
13 Dinadael dagiti Caldeo dagiti gambang nga adigi+ ti balay ni Jehova ken dagiti kareton+ ken ti gambang a Baybay+ nga adda iti balay ni Jehova, sa impanda ti gambang idiay Babilonia.+
14 Innalada pay dagiti lata, pala, pagiddep iti apuy, kopa, ken amin a gambang nga alikamen a maus-usar iti panagserbi iti templo.
15 Innala ti panguluen dagiti guardia dagiti pagikkan iti insienso ken dagiti malukong a naaramid iti puro a balitok+ ken pirak.+
16 Ti gambang iti dua nga adigi, iti Baybay, ken kadagiti kareton nga inaramid ni Solomon para iti balay ni Jehova ket saanen a natimbang gapu iti kaaduna.+
17 Ti katayag ti tunggal adigi ket 18 a kasiko,*+ ken gambang ti pannakaulo dagita nga agrukod iti tallo a kasiko. Naaramid met iti gambang ti nalaga a dekorasion ken dagiti sinanprutas a granada iti aglikmut dagiti pannakaulo.+ Kasta met laeng ti itsura ti maikadua nga adigi.
18 Impanaw met ti panguluen dagiti guardia ni Seraias+ a nangato a padi, ni Sofonias+ a maikadua a padi, ken ti tallo a parabantay iti ruangan.+
19 Nangala manipud iti siudad iti maysa nga opisial iti korte a mangidaulo kadagiti soldado ken lima a nasinged a kakadua ti ari a nasarakan iti siudad. Innalana pay ti sekretario ti pangulo ti armada, daydiay mangum-ummong kadagiti umili iti daga, ken ti 60 a lallaki manipud kadagiti ordinario nga umili nga adda pay laeng iti siudad.
20 Impanaw ida ni Nabuzaradan+ a panguluen dagiti guardia ket impanna ida iti ari ti Babilonia idiay Ribla.+
21 Pinatay ida ti ari ti Babilonia idiay Ribla iti daga ti Hamat.+ Iti kasta, naipanaw ti Juda manipud iti dagada.+
22 Dinutokan ni Nabucodonosor nga ari ti Babilonia ni Gedalias+ nga anak ni Ahikam+ nga anak ni Safan+ a mangidaulo kadagiti tattao a nabati iti Juda.+
23 Idi nadamag ti amin a panguluen ken dagiti soldadoda a dinutokan ti ari ti Babilonia ni Gedalias, dagus a napanda ken Gedalias idiay Mizpa. Isu dagitoy da Ismael nga anak ni Netanias, Johanan nga anak ni Karea, ni Seraias nga anak ni Tanhumet a Netofatita, ken ni Jaazanias nga anak ti Maacatita, agraman dagiti soldadoda.+
24 Insapata ni Gedalias kadakuada ken kadagiti soldadoda: “Dikay agbuteng nga agpaadipen kadagiti Caldeo. Agnaedkayo iti daga ken agserbikayo iti ari ti Babilonia, ket nasayaatto ti pagbanaganyo.”+
25 Iti maikapito a bulan, napan met sadiay ni Ismael+ nga anak ni Netanias nga anak ni Elisama, a kaputotan ti ari.* Kaduana ti 10 a lallaki ket pinatayda ni Gedalias, kasta met dagiti Judio ken Caldeo a kaduana idiay Mizpa.+
26 Kalpasanna, napan idiay Egipto ti amin a tattao—natan-ok ken nanumo—agraman dagiti pangulo ti armada+ ta mabutengda kadagiti Caldeo.+
27 Iti maika-37 a tawen a pannakaipanaw ni Ari Jehoiakin+ ti Juda, iti maika-27 nga aldaw ti maika-12 a bulan, nagbalin ni Evil-merodak nga ari ti Babilonia ket winayawayaanna* iti pagbaludan ni Ari Jehoiakin ti Juda.+
28 Nasayaat ti panangtratona ken Jehoiakin ken inikkanna iti saad a nangatngato ngem iti dadduma nga ari a kaduana idiay Babilonia.
29 Gapuna, inikkat ni Jehoiakin ti badona kas balud, ket kanayon a nakipangan iti ari bayat a sibibiag.
30 Inaldaw a naikkan iti taraon manipud iti ari bayat a sibibiag.
