Ti Umuna a Samuel 5:1-12

  • Ti Lakasa iti teritoria dagiti Filisteo (1-12)

    • Naibabain ni Dagon (1-5)

    • Nadidigra dagiti Filisteo (6-12)

5  Innala dagiti Filisteo ti Lakasa+ ti pudno a Dios idiay Ebenezer ket impanda dayta idiay Asdod. 2  Innala dagiti Filisteo ti Lakasa ti pudno a Dios ket inserrekda iti balay* ni Dagon sada inyabay ken Dagon.+ 3  Kabigatanna, nasapa a nagriing dagiti Asdodita ket nakitada a napakleb ti estatua ni Dagon iti sango ti Lakasa ni Jehova.+ Isu a binangonda ni Dagon ken insublida iti dati nga ayanna.+ 4  Nasapada a bimmangon iti sumaruno nga aldaw ket nakitada a napakleb manen ni Dagon iti sango ti Lakasa ni Jehova. Naisina ti ulo ken dagiti imana ket naiwarada iti pagserkan. Ti laeng ikan a pasetna* ti nabati. 5  Isu nga idiay Asdod, saan a lumasat iti pagserkan ti balay ni Dagon dagiti papadi ni Dagon ken asinoman a sumrek sadiay agingga ita nga aldaw. 6  Nakaro ti panangdusa ni Jehova kadagiti Asdodita, ket pinagalmoranasna+ dagiti umili iti Asdod ken kadagiti teritoriana. 7  Idi nakita dagiti umili ti Asdod ti mapaspasamak, kinunada: “Diyo ipalubos nga agtalinaed kadatayo ti Lakasa ti Dios ti Israel, ta nakaro ti panangdusana kadatayo ken iti diostayo a ni Dagon.” 8  Isu a pinaayaban ken pinagsasangoda ti amin a mangiturturay kadagiti Filisteo ket dinamagda: “Ania ti aramidentayo iti Lakasa ti Dios ti Israel?” Insungbatda: “Ipanyo idiay Gat+ ti Lakasa ti Dios ti Israel.” Isu nga impanda sadiay ti Lakasa ti Dios ti Israel. 9  Idi naipandan sadiay, dinusa ni Jehova ti siudad a nagresulta iti nakaro a riribuk. Pinagalmoranasna dagiti tattao iti siudad, manipud ubbing agingga kadagiti nataengan. Nagalmoranasda amin.+ 10  Isu nga inyakarda idiay Ekron+ ti Lakasa ti pudno a Dios. Ngem apaman a naisangpet idiay Ekron ti Lakasa ti pudno a Dios, inyikkis dagiti Ekronita: “Inyegda ditoy ti Lakasa ti Dios ti Israel tapno papatayendatayo ken dagiti kailiantayo!”+ 11  Isu a pinaayaban ken pinagsasangoda ti amin a mangiturturay kadagiti Filisteo ket kinunada: “Ipanawyo ti Lakasa ti Dios ti Israel; isubliyo iti dati nga ayanna, tapno saankami a matay agraman dagiti kailianmi.” Ta madandanagan dagiti tattao iti intero a siudad amangan no matayda gapu iti nakaro a panangdusa ti pudno a Dios,+ 12  ket nagalmoranas dagiti tattao a saan a natay. Dimmanon idiay langit ti panagpatulong dagiti tattao iti siudad.

Footnotes

Wenno “templo.”
Lit., “Ni laeng Dagon.”