Ti Umuna a Samuel 29:1-11
-
Saan nga agtalek dagiti Filisteo ken David (1-11)
29 Inummong dagiti Filisteo+ ti amin nga armadada idiay Afek, bayat nga agkamkampo dagiti Israelita iti abay ti ubbog idiay Jezreel.+
2 Umab-abante idi dagiti mangiturturay kadagiti Filisteo a kaduada ti ginasut ken rinibu a soldadoda, ket sumursurot ni David ken dagiti tattaona iti likud a kaduada ni Akis.+
3 Ngem kinuna dagiti prinsipe dagiti Filisteo: “Apay nga adda ditoy dagitoy a Hebreo?” Kinuna ni Akis kadakuada: “Daytoy ni David nga adipen ni Ari Saul ti Israel. Nasuroken a makatawen nga agkaduakami.+ Awan ti nakitak a problema kenkuana manipud idi nagkamang kaniak agingga ita.”
4 Ngem nakaunget kenkuana dagiti prinsipe dagiti Filisteo ket kinunada: “Pagawidem dayta a lalaki.+ Pagsubliem iti lugar nga intedmo kenkuana. Dimo palubosan a kumuyog kadatayo a makigubat tapno saannatayo a traidoren iti paggugubatan.+ Ta adda pay kadi nasaysayaat a panggun-odna iti pabor ni apona no di ti panangpatayna kadagiti soldadotayo?
5 Saan aya a daytoy ni David a sinalsalaan ken kinankantaanda,
‘Rinibu ti pinatay ni Saul,Pinullo a ribu ti pinatay ni David’?”+
6 Isu a pinaayaban ni Akis+ ni David ket kinunana kenkuana: “Isapatak iti nagan ti sibibiag a Dios a ni Jehova a nalintegka, ket maragsakanak iti pannakikaduam iti armadak a makigubat,+ ta awan ti nakitak a problema kenka manipud idi nagkamangka kaniak agingga ita.+ Ngem saandaka a talken dagiti mangiturturay.+
7 Isu a dika agdanag ket agawidkan, ken dika mangaramid iti aniaman a kagura dagiti mangiturturay kadagiti Filisteo.”
8 Ngem kinuna ni David ken Akis: “Apay, ania ti inaramidko? Ania ti nakitam a basol daytoy adipenmo manipud idi nagkamangak kenka agingga ita? Apo ari, apay a diak makikuyog kenka a makiranget kadagiti kabusormo?”
9 Kinuna ni Akis ken David: “Ammok a naimbagka a kas iti maysa nga anghel ti Dios.+ Ngem kinuna dagiti prinsipe dagiti Filisteo, ‘Dimo palubosan a kumuyog kadatayo a makigubat.’
10 Sapsapaem ti bumangon inton bigat agraman dagiti adipen ti apom a kimmuyog kenka; bumangon ken pumanawkayo a nasapa apaman nga aglawag.”
11 Isu a nasapa a bimmangon ni David ken dagiti tattaona. Nagsublida iti daga dagiti Filisteo; ket napan dagiti Filisteo idiay Jezreel.+
