Ti Umuna nga Ar-ari 15:1-34
15 Iti maika-18 a tawen ti panagturay ni Ari Jeroboam+ nga anak ni Nebat, nagbalin ni Abiam nga ari iti Juda.+
2 Nagturay iti tallo a tawen idiay Jerusalem. Ni Maaca+ nga apoko ni Abisalom ti nanangna.
3 Inaramidna met laeng ti amin a basol nga inaramid ni amana, ket saan a naan-anay ti pusona ken Jehova a Diosna a kas iti puso ni David nga apongna.
4 Ngem maigapu ken David,+ nangted kenkuana ni Jehova a Diosna iti lampara idiay Jerusalem+ ta dinutokanna ti anakna kas ari ken pinagtalinaedna a natalged ti Jerusalem.
5 Ta inaramid ni David ti umiso iti imatang ni Jehova, ken tinungpalna ti aniaman nga imbilin kenkuana ti Dios iti amin nga aldaw ti panagbiagna, malaksid ti maipapan iti inaramidna ken Urias a Heteo.+
6 Kanayon idi ti panagginnubat da Rehoboam ken Jeroboam.+
7 Ti dadduma pay a pasamak iti pakasaritaan ni Abiam, ti amin nga inaramidna, ket naisurat iti libro dagiti pasamak idi tiempo dagiti ari ti Juda.+ Adda met idi panagginnubat da Abiam ken Jeroboam.+
8 Idi agangay, naginana ni Abiam a kas kadagidi ammana ket intabonda iti Siudad ni David. Ni Asa+ nga anakna ti simmaruno nga ari.+
9 Iti maika-20 a tawen ti panagturay ni Ari Jeroboam ti Israel, nangrugi a nagturay ni Asa iti Juda.
10 Nagturay idiay Jerusalem iti 41 a tawen. Ni Maaca+ nga apoko ni Abisalom ti apongna a baket.
11 Inaramid ni Asa no ania ti umiso iti imatang ni Jehova,+ kas ken David nga apongna.
12 Inikkatna iti daga dagiti lallaki a balangkantis iti templo+ ken ti amin a makarimon nga idolo* nga inaramid dagidi ammana.+
13 Inikkatna pay ni Maaca+ nga apongna iti saadna kas ina a reyna, ta nagpaaramid iti nakaal-alas nga idolo para iti panagdaydayaw iti sagrado a poste.* Dinadael ni Asa dayta a nakaal-alas nga idolo+ sa pinuoranna idiay Tanap ti Kidron.+
14 Ngem saan a naikkat dagiti nangato a disso.+ Nupay kasta, naan-anay ti puso ni Asa ken ni Jehova iti intero a panagbiagna.*
15 Inserrekna iti balay ni Jehova dagiti banag a pinagbalinda ken amana a nasantuan—dagiti pirak, balitok, ken nagduduma pay nga alikamen.+
16 Kanayon idi nga agginnubat da Asa ken Baasa+ nga ari ti Israel.
17 Iti kasta, bimmusor ni Ari Baasa ti Israel iti Juda ket rinugianna a tarimaanen* ti Rama+ tapno lapdanna ti asinoman a rummuar wenno sumrek a mapan ken* Ari Asa ti Juda.+
18 Gapuna, innala ni Asa ti amin a pirak ken balitok a natedda kadagiti pagidulinan iti gameng iti balay ni Jehova ken iti pagidulinan iti gameng iti balay* ti ari ket inyawatna dagita kadagiti adipenna. Impatulod dagita ni Ari Asa ken ni Ben-hadad nga ari ti Siria,+ nga anak ni Tabrimon nga anak ni Hezion ken agnanaed idi idiay Damasco. Kinuna ni Asa:
19 “Adda tulaganta ken adda met tulagan dagiti ammata. Nangipatulodak kenka iti pirak ken balitok kas sagutko. Umayka ket waswasem ti tulagmo ken Ari Baasa ti Israel tapno umatras.”
20 Dimngeg ni Ben-hadad ken ni Ari Asa ket imbaonna dagiti panguluen ti armadana a rumaut kadagiti siudad ti Israel. Sinakupda ti Ijon,+ Dan,+ Abel-bet-maaca, ti intero a Kineret, ken ti intero a Neftali.
21 Idi nadamag dayta ni Baasa, dagus nga insardengna a tarimaanen* ti Rama ket intuloyna ti nagnaed idiay Tirza.+
22 Pinaayaban ni Ari Asa ti amin nga umili ti Juda ket binunagda dagiti bato ken kayo ti Rama nga us-usaren ni Baasa a pagbangon. Inusar dagita ni Ari Asa a pangtarimaan* iti Geba+ idiay Benjamin, ken iti Mizpa.+
23 Ti amin a dadduma pay a pasamak iti pakasaritaan ni Asa, ti amin a panagballigi ken inaramidna ken dagiti siudad a tinarimaanna,* ket naisurat iti libro dagiti pasamak idi tiempo dagiti ari ti Juda. Ngem nagsakit dagiti sakana idi lakayen.+
24 Idi agangay, naginana ni Asa a kas kadagidi ammana ket naitabon a kas kadakuada iti Siudad ni David nga apongna. Ni Jehosafat+ nga anakna ti simmaruno nga ari.
25 Nagbalin nga ari iti Israel ni Nadab+ nga anak ni Jeroboam iti maikadua a tawen ti panagturay ni Ari Asa ti Juda, ket nagturay iti Israel iti dua a tawen.
26 Inar-aramidna ti dakes iti imatang ni Jehova ket tinuladna ti inaramid ni amana+ a nakaigapuan iti panagbasol ti Israel.+
27 Naaddaan iti dakes a panggep ni Baasa nga anak ni Ahias manipud iti tribu ni Isacar ket pinatayna ni Nadab idiay Gibeton,+ a sakup idi dagiti Filisteo, bayat a pinalikmutan dayta ni Nadab ken ti intero nga Israel.
28 Pinatay ni Baasa ni Nadab iti maikatlo a tawen ti panagturay ni Ari Asa ti Juda ket simmaruno a nagturay kas ari.
29 Apaman a nagbalin nga ari, pinapatayna ti intero a pamilia ni Jeroboam. Awan ti asinoman* nga inteddana a kaputotan ni Jeroboam. Inibusna ida maitunos iti sao ni Jehova babaen ti adipenna a ni Ahias a taga-Shilo.+
30 Napasamak daytoy gapu kadagiti basol ni Jeroboam a nakaigapuan ti panagbasol ti Israel ken gapu ta pinagpungtotna iti kasta unay ni Jehova a Dios ti Israel.
31 Ti dadduma pay a pasamak iti pakasaritaan ni Nadab, ti amin nga inaramidna, ket naisurat iti libro dagiti pasamak idi tiempo dagiti ari ti Israel.
32 Kanayon idi nga agginnubat da Asa ken Ari Baasa ti Israel.+
33 Iti maikatlo a tawen ti panagturay ni Ari Asa ti Juda, ni Baasa nga anak ni Ahias ti nagbalin nga ari iti intero nga Israel idiay Tirza ket nagturay iti 24 a tawen.+
34 Ngem inar-aramidna ti dakes iti imatang ni Jehova,+ ket tinuladna ti inaramid ni Jeroboam a nakaigapuan ti panagbasol ti Israel.+
Footnotes
^ Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
^ Lit., “amin nga aldawna.”
^ Wenno “pumanaw wenno sumrek iti teritoria ni.”
^ Wenno “patibkeren.”
^ Wenno “palasio.”
^ Wenno “patibkeren; bangonen manen.”
^ Wenno “pangpatibker; pangibangon manen.”
^ Wenno “pinatibkerna; binangonna manen.”
^ Lit., “aniaman nga agang-anges.”
