Salmo 21:1-13
Iti mangiwanwanwan. Samiweng ni David.
21 O Jehova, iti pigsam agragsak ti ari;+Ket iti panangisalakanmo anian a kayatna ti agrag-o unay!+
2 Ti tarigagay ti pusona impaaymo kenkuana,+Ket ti kalikagum dagiti bibigna saanmo nga impaidam.+ Selah.
3 Ta isu insabtam kadagiti bendision a naimbag,+Ket insaadmo iti ulona ti maysa a korona a napasudi a balitok.+
4 Ti biag kiniddawna kenka. Intedmo dayta kenkuana,+Ti kaatiddog ti al-aldaw agingga iti tiempo a di nakedngan, iti mismo nga agnanayon.+
5 Ti dayagna dakkel iti panangisalakanmo.+Kinatan-ok ken kinangayed isaadmo kenkuana.+
6 Ta isu aramidem a bendito unay iti agnanayon;+Ipariknam kenkuana ti ragsak babaen ti panagrag-o ita sanguanam.+
7 Ta ti ari agtaltalek ken Jehova,+Iti mismo a naayat a kinamanangngaasi ti Kangatuan. Isu saanto a mapagdiwengdiweng.+
8 Ti imam masarakannanto dagiti amin a kabusormo;+Ti bukodmo a makannawan nga ima masarakannanto dagidiay manggurgura kenka.
9 Aramidemto ida kas iti maysa a gumilgil-ayab nga urno iti naituding a tiempo maipaay iti panangasikasom.+Ni Jehova iti ungetna alimonennanto ida, ket alun-onento ida ti apuy.+
10 Ti bungada dadaelemto manipud iti mismo a daga,+Ken ti putotda manipud iti annak ti tattao.+
11 Ta inturongda maibusor kenka ti dakes;+Nangpanunotda kadagiti kapanunotan a saanda a kabaelan nga itungpal.+
12 Ta pagtallikudemto ida a pagtalawen+Babaen kadagiti parteng ti panam nga insaganam maibusor iti rupada.+
13 O maitan-okka koma iti pigsam, O Jehova.+Agkantakaminto ken mangipaaykami iti samiweng iti kinamannakabalinmo.+
