Salmo 101:1-8
Ni David. Samiweng.
101 Agkantaakto iti maipapan ti naayat a kinamanangngaasi ken panangukom.+Kenka, O Jehova, mangipaayakto iti samiweng.+
2 Agtignayakto a buyogen ti kinamasirib iti awan pagkuranganna a dalan.+Kaanonto nga umayka kaniak?+Magnaakto buyogen ti kinatarnaw ti pusok iti uneg ti balayko.+
3 Saankonto nga isaad iti sanguanan dagiti matak ti aniaman a banag nga awan kaes-eskanna.+Ginurak ti aramid dagidiay umikay;+Saan a kumpet dayta kaniak.+
4 Ti nakillo a puso sumina kaniak;+Awan ti dakes nga ammok.+
5 Ti asinoman a sililimed a mangparpardaya iti kaduana,+Isu pagulimekek.+Ti asinoman nga addaan natangsit a matmata ken addaan napangas a puso,+Isu saanko a maibturan.+
6 Dagiti matak addada kadagidiay matalek iti daga,+Tapno makipagnaedda koma kaniak.+Daydiay magmagna iti awan pagkuranganna a dalan,+Isu daydiay agserbinto kaniak.+
7 Awanto ti agnaed iti uneg ti balayko a managaramid iti allilaw.+No maipapan iti asinoman nga agsasao kadagiti kinaulbod, saanto a maipasdek a sititibker+Iti sanguanan dagiti matak.+
8 Tunggal bigat pagulimekekto amin dagidiay nadangkes iti daga,+Tapno amin dagiti managaramid iti makapasakit+ gessatek iti siudad+ ni Jehova.
