Mateo 7:1-29
7 “Isardengyo ti mangukom+ tapno saankayo a maukom;
2 ta iti panangukom a panguk-ukomyo, maukomkayto;+ ket ti rukod a pangrukrukodyo, pangrukoddanto kadakayo.+
3 Apay, ngarud, a matmatam ti garami iti mata ni kabsatmo, ngem saanmo nga imutektekan ti pasanggir iti bukodmo a mata?+
4 Wenno kasano a maikunam ken kabsatmo, ‘Palubosannak a mangikkat iti garami iti matam’; idinto ta, adtoy! maysa a pasanggir ti adda iti bukodmo a mata?+
5 Managinsisingpet! Umuna nga ikkatem ti pasanggir iti bukodmo a mata, ket kalpasanna makitamto a silalawag no kasano nga ikkaten ti garami iti mata ni kabsatmo.
6 “Dikay ited kadagiti aso no ania ti nasantuan,+ dikay met ipuruak dagiti perlasyo iti sanguanan dagiti baboy, tapno saanda a pulos payatpayaten+ ida iti baba dagiti sakada ket agbueltada ken pisangpisangendakayo.
7 “Itultuloyyo ti agdawat,+ ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok,+ ket mailukatto dayta kadakayo.
8 Ta tunggal maysa nga agdawdawat umawat,+ ken tunggal maysa nga agsapsapul makasarak, ket iti tunggal maysa nga agtuktuktok mailukatto dayta.
9 Kinapudnona, siasino ti tao nga adda kadakayo a kenkuana ti anakna+ dumawat iti tinapay—iyawatannanto kadi iti bato?
10 Wenno, nalabit, dumawatto iti ikan—iyawatannanto kadi iti serpiente?
11 Gapuna, no dakayo, nupay nadangkeskayo,+ ammoyo no kasano ti mangted iti naimbag a sagsagut iti annakyo, anian a nangnangruna pay a kasta a ni Amayo nga adda iti langlangit mangted iti naimbag a bambanag+ kadagidiay agdawdawat kenkuana!
12 “Amin a bambanag, ngarud, a kayatyo nga aramiden kadakayo dagiti tattao,+ masapul a kasta met ti aramidenyo kadakuada; iti kinapudnona, daytoy ti kaipapanan ti Linteg ken dagiti Mammadto.+
13 “Sumrekkayo iti akikid a ruangan;+ agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta;
14 idinto ta akikid ti ruangan ken nailet ti dalan nga agturong iti biag, ket bassit dagidiay makasarak iti dayta.+
15 “Siputanyo dagiti ulbod a mammadto+ nga umay kadakayo iti kawes ti karnero,+ ngem iti uneg loboda a narawet.+
16 Babaen kadagiti bungada mailasinyonto+ ida. Saan aya a di pulos agburas dagiti tattao kadagiti ubas manipud kadagiti sisiitan wenno kadagiti higos manipud kadagiti kalunay?+
17 Kasta met tunggal naimbag a kayo mangpataud iti nasayaat a bunga, ngem tunggal rinuker a kayo mangpataud iti awan pategna a bunga;+
18 ti maysa a naimbag a kayo saan a makapataud iti awan pategna a bunga, ti maysa a rinuker a kayo saan met a makapataud iti nasayaat a bunga.
19 Tunggal kayo a saan a mangpatpataud iti nasayaat a bunga mapukan ken maibelleng iti apuy.+
20 Pudno, ngarud, babaen kadagiti bungada mailasinyonto dagidiay a tattao.+
21 “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid+ ti pagayatan ni Amak nga adda iti langlangit.+
22 Adunto ti agkuna kaniak iti dayta nga aldaw, ‘Apo, Apo,+ saankami aya a nagipadto iti naganmo, ken nangparuar kadagiti sairo iti naganmo, ken nagaramid iti adu a mannakabalin nga aramid iti naganmo?’+
23 Ket kaskasdi nga iti dayta ipudnokto kadakuada: Saankay a pulos am-ammo!+ Umadayokayo kaniak, dakayo nga agar-aramid ti kinakillo.+
24 “Gapuna tunggal maysa a dumngeg kadagitoy a sasaok ket aramidenna ida mayaspingto iti masirib a lalaki, a binangonna ti balayna iti rabaw ti dakkel a bato.+
25 Ket nagbuyat ti tudo ken immay dagiti layus ket nagpuyupoy dagiti angin ken immablatda iti dayta a balay, ngem saan a narba, ta naibangon iti rabaw ti dakkel a bato.
26 Kanayonanna pay, tunggal maysa a dumngeg kadagitoy a sasaok ket saanna nga aramiden+ ida mayaspingto iti maag a lalaki,+ a binangonna ti balayna iti rabaw ti darat.
27 Ket nagbuyat ti tudo ken immay dagiti layus ket nagpuyupoy dagiti angin ken immablat iti dayta a balay+ ket narba, ket nakaro idi ti pannakarpuogna.”+
28 Itan idi nalpas ni Jesus dagitoy a sasao, ti imbungana ket nagsiddaaw unay+ dagiti bunggoy iti wagas ti panangisurona;
29 ta insursurona ida a kas maysa a tao nga addaan kinaturay,+ ket saan a kas kadagiti eskribada.
