Mateo 19:1-30
19 Ita idi a ni Jesus nalpasnan dagitoy a sasao, pimmanaw manipud Galilea ket dimteng kadagiti beddeng ti Judea iti ballasiw ti Jordan.+
2 Kasta met, simmurot kenkuana ti dadakkel a bunggoy, ket inagasanna ida sadiay.+
3 Ket immasideg kenkuana dagiti Fariseo, a rantada a sulisogen ken kunaen: “Nainkalintegan aya a ti maysa a lalaki idiborsiona ti asawana iti tunggal kita ti pangibatayan?”+
4 Kas sungbat kinunana: “Saanyo aya a nabasa a ti nangparsua kadakuada nanipud idi damo inaramidna ida a lalaki ken babai+
5 ket kinunana, ‘Iti daytoy a rason, ti maysa a lalaki panawannanto ti amana ken ti inana+ ket makitiponto iti asawana, ket dagiti dua maymaysadanton a lasag’?+
6 Iti kasta saandan a dua, no di ket maymaysadan a lasag. Gapuna, ti pinagsinnangol ti Dios saan koma a pagsinaen ti tao.”+
7 Kinunada kenkuana: “Apay, ngarud, nga imbilin ni Moises ti panangted iti kasuratan ti panamagtalaw ken panangidiborsio kenkuana?”+
8 Kinunana kadakuada: “Ni Moises, maipagapu iti kinatangken ti panagpuspusoyo,+ pinalugodannakayo a mangidiborsio iti assawayo a babbai, ngem saan a kasta ti kasasaad nanipud idi damo.+
9 Kunak kadakayo a ti siasinoman a mangidiborsio iti asawana a babai, malaksid no maibatay iti pannakiabig, ket mangasawa iti sabali makaaramid iti pannakikamalala.”+
10 Kinuna kenkuana dagiti adalan: “No kasta ti kasasaad ti maysa a lalaki iti asawana, saan a maibalakad a mangasawa.”+
11 Kinunana kadakuada: “Saan nga amin a tattao maiwayaanda daytoy a sao, no di laeng dagidiay addaan iti sagut.+
12 Ta adda dagiti eunuko a nayanak a kasta manipud iti aanakan ti inada,+ ket adda dagiti eunuko a napagbalin a eunuko babaen kadagiti tattao, ket adda dagiti eunuko a namagbalin iti bagbagida a eunuko maigapu iti pagarian ti langlangit. Ti makaiwaya iti dayta iwayaanna koma dayta.”+
13 Idin naiyeg kenkuana dagiti ubbing, tapno ipatayna kadakuada dagiti imana ken mangikararag; ngem tininggar ida dagiti adalan.+
14 Nupay kasta, kinuna ni Jesus: “Bay-anyo dagiti ubbing, ket isardengyo a laplapdan ida iti iyuumayda kaniak, ta ti pagarian ti langlangit kukua dagiti kasta a tattao.”+
15 Ket impatayna kadakuada dagiti imana ket napan manipud sadiay.+
16 Ita, adtoy! adda maysa nga immasideg kenkuana ket kinunana: “Mannursuro, ania ti naimbag a masapul nga aramidek tapno makagun-odak iti agnanayon a biag?”+
17 Kinunana kenkuana: “Apay nga imtuodem kaniak ti maipapan iti naimbag? Maymaysa ti adda a naimbag.+ Nupay kasta, no kayatmo ti sumrek iti biag, itultuloymo a tungpalen dagiti bilin.”+
18 Kinunana kenkuana: “Aniada?”+ Kinuna ni Jesus: “Ay ket, Dika mamapatay,+ Dika makikamalala,+ Dika agtakaw,+ Dika mangsaksi iti ulbod,+
19 Dayawem ni amam ken ni inam,+ ken, Masapul nga ayatem ti padam a tao a kas iti bagim.”+
20 Kinuna kenkuana ti agtutubo a lalaki: “Sinalimetmetakon amin dagitoy; ania pay ti pagkurangak?”
21 Kinuna kenkuana ni Jesus: “No kayatmo ti agbalin a naan-anay, inka ilako dagiti sanikuam ket itedmo kadagiti napanglaw ket maaddaankanto iti gameng idiay langit,+ ket umayka agbalinka a pasurotko.”+
22 Idi a ti agtutubo a lalaki nangngegna daytoy a sao, pimmanaw a sileleddaang, ta agik-ikut idi iti adu a sanikua.+
23 Ngem kinuna ni Jesus kadagiti adalanna: “Pudno kunak kadakayo a nakarigrigatto a banag iti maysa a nabaknang a tao ti iseserrek iti pagarian ti langlangit.+
24 Manen kunak kadakayo, Ti maysa a kamelio nalaklaka a lumsot iti abut ti dagum ngem iti maysa a nabaknang a tao a sumrek iti pagarian ti Dios.”+
25 Idi a nangngeg dayta dagiti adalan, inyebkasda ti kasta unay a siddaaw, a kunkunada: “Siasino a pudpudno ti mabalin a maisalakan?”+
26 Idi matmatmatanna ida iti rupa, kinuna kadakuada ni Jesus: “Kadagiti tattao di mabalin daytoy, ngem iti Dios amin a bambanag mabalin.”+
27 Idin kinuna kenkuana ni Pedro kas sungbat: “Adtoy! Pinanawanmi ti amin a bambanag ket sinurotdaka; ania nga agpayso ti addanto a maipaay kadakami?”+
28 Kinuna kadakuada ni Jesus: “Pudno kunak kadakayo, Iti pannakaparsua manen, inton ti Anak ti tao agtugaw iti nadayag a tronona, dakayo a simmurot kaniak agtugawkayto met iti sangapulo ket dua a trono, a manguk-ukom iti sangapulo ket dua a tribu ti Israel.+
29 Ket ti tunggal maysa a nangpanaw iti balbalay wenno kakabsat a lallaki wenno kakabsat a babbai wenno ama wenno ina wenno annak wenno dagdaga maigapu iti naganko umawatto iti adu a daras nga ad-adu ken tawidennanto ti agnanayon a biag.+
30 “Ngem adu dagiti umuna a maudinto ken dagiti maudi nga umuna.+
