Lucas 18:1-43
18 Idin imbagana kadakuada ti maysa a pangngarig maipapan iti pannakasapul ti kanayon a panagkararagda ken saanda nga isusuko,+
2 a kunkunana: “Iti maysa a siudad adda idi maysa nga ukom nga awan panagbutengna iti Dios ken awan panagraemna iti tao.
3 Ngem adda idi maysa a babai a balo iti dayta a siudad ket nagtultuloy a napan+ kenkuana, a kunkunana, ‘Siguraduem a magun-odak ti hustisia manipud iti kabusorko iti linteg.’
4 Ala ket, iti sumagmamano a tiempo saan a situtulok, ngem kalpasanna kinunana iti bagina, ‘Uray no diak kabuteng ti Dios wenno raemen ti tao,
5 nupay no kasta, gapu iti agtultuloy a panangriribuk+ kaniak daytoy a balo, siguraduekto a magun-odanna ti hustisia, tapno saanto nga agtultuloy nga umay ket dudogennak+ agingga iti kanibusanan.’”
6 Idin kinuna ti Apo: “Denggenyo ti ukom, nupay nakillo, no ania ti kinunana!
7 Ngarud, saan aya a sigurado a ti Dios ipakatnanto ti hustisia+ kadagiti pinilina nga umaw-awag kenkuana iti aldaw ken rabii, uray no mabayag-panagituredna+ kadakuada?
8 Ibagak kadakayo, Sipapartak nga ipakatnanto kadakuada ti hustisia.+ Nupay kasta, inton dumteng ti Anak ti tao, pudno aya a masarakannanto ti pammati ditoy daga?”
9 Ngem sinaona met daytoy a pangngarig iti sumagmamano a nagtalek iti bagbagida a nalintegda+ ken nangibilang iti dadduma kas awan kaes-eskanda:+
10 “Dua a tattao ti simmang-at idiay templo tapno agkararagda, ti maysa Fariseo ket ti sabali agsingsingir iti buis.
11 Ti Fariseo nagtakder+ ket rinugianna nga ikararag+ dagitoy a banag iti kabukbukodanna, ‘O Dios, agyamanak kenka a saanak a kas iti dadduma a tattao, a manangkikil, nakillo, mannakikamalala, wenno uray kas iti daytoy nga agsingsingir iti buis.+
12 Agayunarak iti mamindua iti maysa a lawas, itedko ti apagkapullo ti amin a bambanag a magun-odak.’+
13 Ngem ti agsingsingir iti buis nga agtaktakder iti adayo saanna a kayat uray ti mangitangad kadagiti matana sadi langit, no di ket dinandanogna ti barukongna,+ a kunkunana, ‘O Dios, mangngaasika kaniak a managbasol.’+
14 Ibagak kadakayo, Daytoy a tao simmalog a napan iti pagtaenganna a napaneknekan a nalinlinteg+ ngem daydiay a tao; agsipud ta ti tunggal maysa a mangitan-ok iti bagina maipababanto, ngem ti mangipakumbaba iti bagina maitan-okto.”+
15 Ita rinugian dagiti tattao nga iyeg met kenkuana dagiti maladagada tapno sagidenna dagitoy; ngem idi makitada dayta rinugian a tinggaren ida dagiti adalan.+
16 Nupay kasta, inayaban ni Jesus dagiti maladaga, a kunkunana: “Bay-anyo dagiti ubbing nga umay kaniak, ket dikay padasen a pawilan ida. Ta ti pagarian ti Dios kukua dagiti kasta.+
17 Pudno kunak kadakayo, Siasinoman a saan nga umawat iti pagarian ti Dios a kas iti maysa nga ubing saanto a pulos makastrek iti dayta.”+
18 Ket maysa nga agturay ti nagsaludsod kenkuana, a kunkunana: “Naimbag a Mannursuro, babaen ti panangaramid iti ania a matawidko ti agnanayon a biag?”+
19 Kinuna kenkuana ni Jesus: “Apay nga awagannak iti naimbag? Awan asinoman a naimbag, malaksid iti maysa, ti Dios.+
20 Ammom dagiti bilin,+ ‘Dika makikamalala,+ Dika mamapatay,+ Dika agtakaw,+ Dika mangsaksi iti ulbod,+ Dayawem ni amam ken ni inam.’”+
21 Iti kasta kinunana: “Amin dagitoy sinalimetmetakon nanipud pay kinaagtutubo.”+
22 Kalpasan a nangngegna dayta, kinuna kenkuana ni Jesus: “Adda pay maysa a banag nga agkurang kenka: Ilakom amin a bambanag nga adda kenka ket ibunongmo kadagiti napanglaw a tattao, ket maaddaankanto iti gameng iti langlangit; ket umayka agbalinka a pasurotko.”+
23 Idi mangngegna daytoy, naleddaangan unay, ta isu nakabakbaknang.+
24 Kimmita kenkuana ni Jesus ket kinunana: “Anian a nakarigrigatto a banag kadagidiay addaan kuarta ti iseserrekda iti pagarian ti Dios!+
25 Iti kinapudnona, ti maysa a kamelio nalaklaka a lumsot iti abut ti pagdait a dagum ngem iti maysa a nabaknang a tao a sumrek iti pagarian ti Dios.”+
26 Kinuna dagidiay nakangngeg itoy: “Asino ti mabalin a maisalakan?”
27 Kinunana: “Ti bambanag a di mabalin iti tao mabalin iti Dios.”+
28 Ngem kinuna ni Pedro: “Adtoy! Pinanawanmi ti mismo a bambanagmi ket sinurotdaka.”+
29 Kinunana kadakuada: “Pudno kunak kadakayo, Awan ti maysa a nangpanaw iti balay wenno asawa a babai wenno kakabsat a lallaki wenno nagannak wenno annak maigapu iti pagarian ti Dios+
30 nga iti aniaman a pamay-an saanto nga umawat iti adu a daras nga ad-adu iti daytoy a las-ud ti tiempo, ken iti um-umay a sistema ti bambanag agnanayon a biag.”+
31 Idin inlasinna ti sangapulo ket dua ket kinunana kadakuada: “Adtoy! Sumang-attayo idiay Jerusalem, ket amin a bambanag a naisurat babaen kadagiti mammadto+ maipapan iti Anak ti tao maan-anayto.+
32 Kas pagarigan, mayawatto kadagiti tattao iti nasnasion ket mapagang-angawanto+ ken sikukuspag a matrato+ ken matupraan;+
33 ket kalpasan ti panangsaplitda+ kenkuana papatayendanto,+ ngem iti maikatlo nga aldaw bumangonto.”+
34 Nupay kasta, saanda a natarusan ti kaipapanan ti aniaman kadagitoy a banag; ngem daytoy a sao nailimed kadakuada, ket saanda a naam-ammuan ti bambanag a naisao.+
35 Itan bayat nga isu umas-asideg idiay Jerico maysa a bulsek a tao ti agtugtugaw iti igid ti dalan a makilimlimos.+
36 Gapu ta nakangngeg iti maysa a bunggoy a lumablabas rinugianna nga imtuoden no ania ti mabalin a kaipapanan daytoy.
37 Impakaammoda kenkuana: “Ni Jesus a Nazareno lumablabas!”+
38 Iti kasta nagikkis, a kunkunana: “Jesus, Anak ni David, maasianka kaniak!”+
39 Ket dagidiay umun-una rinugianda nga ibaga a siiinget kenkuana nga agulimek, ngem ad-adda pay nga impukpukkawna: “Anak ni David, maasianka kaniak.”+
40 Idin nagsardeng ni Jesus ket imbilinna a maiyeg kenkuana ti tao.+ Kalpasan a nakaasideg, inimtuod kenkuana ni Jesus:
41 “Ania ti kayatmo nga aramidek kenka?”+ Kinunana: “Apo, mapasubli koma ti panagkitak.”+
42 Gapuna kinuna kenkuana ni Jesus: “Mapasubli ti panagkitam; ti pammatim pinaimbagnaka.”+
43 Ket giddato a nagsubli ti panagkitana,+ ket nangrugi a sumurot kenkuana, nga indaydayawna ti Dios.+ Kasta met, amin dagiti tattao, idi makitada dayta, dinaydayawda ti Dios.
