Lucas 17:1-37
17 Idin kinunana kadagiti adalanna: “Saan a maliklikan nga umay dagiti pakaigapuan ti pannakaitibkol.+ Nupay kasta, asi pay daydiay a babaen kenkuana umayda!+
2 Ad-adda a pagimbagan kenkuana no ti maysa a gilingan a bato maibitin iti tengngedna ket maipalladaw iti baybay+ ngem ti itibkolna ti maysa kadagitoy nga ubbing.+
3 Asikasuenyo ti bagbagiyo. No ti kabsatmo makaaramid iti basol babalawem,+ ket no agbabawi pakawanem.+
4 Uray no agbasol a maikaniwas kenka iti mamimpito iti maysa nga aldaw ket agsubli kenka iti mamimpito, a kunkunana, ‘Agbabawiak,’ masapul a pakawanem.”+
5 Ita dagiti apostol kinunada iti Apo: “Ikkannakami iti ad-adu pay a pammati.”+
6 Iti kasta kinuna ti Apo: “No addaankayo iti pammati a kas iti kabassit ti bukel ti mustasa, kunaenyonto iti daytoy a kayo a sikamino, ‘Maparutka ket maimulaka iti baybay!’ ket agtulnogto dayta kadakayo.+
7 “Asino kadakayo nga addaan adipen nga agar-arado wenno agay-aywan iti arban ti agkunanto kenkuana inton makastrek manipud iti talon, ‘Umayka ditoy a madagdagus ket agsadagka iti panganan’?
8 Imbes ketdi, saannanto kadi a kunaen kenkuana, ‘Isaganaannak tapno makapangrabiiak, ket mangikaweska iti bidang ket agserbika kaniak agingga a malpasak a mangan ken uminum, ket kalpasanna mabalinmon ti mangan ken uminum’?
9 Makariknanto aya iti panagyaman iti adipen agsipud ta inaramidna ti bambanag a naituding?
10 Gapuna dakayo met, inton naaramidyon ti amin a bambanag a naituding kadakayo, kunaenyo, ‘Awan kaes-eskanmi nga ad-adipen.+ Ti naaramidanmi isu ti rebbeng nga aramidenmi.’”
11 Ket kabayatan ti ipapanna idiay Jerusalem isu lumaslasat idi iti tengnga ti Samaria ken Galilea.+
12 Ket bayat a sumsumrek iti maysa a purok simmabat kenkuana ti sangapulo nga agkukutel+ a lallaki, ngem nagtakderda iti adayo.
13 Ket impigsada dagiti timekda ket kinunada: “Jesus, Manangisuro, maasianka+ kadakami!”
14 Ket idi makitana ida kinunana kadakuada: “Inkayo ket iparangyo ti bagbagiyo iti papadi.”+ Idin bayat a mapmapanda napasamak ti pannakadalusda.+
15 Maysa kadakuada, idi nakitana nga isu immimbag, nagsubli, nga indaydayawna+ ti Dios buyogen ti natbag a timek.
16 Ket inruknoyna ti rupana iti sakaanan ni Jesus,+ nga agyamyaman kenkuana; kanayonanna pay, isu ket Samaritano.+
17 Kas sungbat kinuna ni Jesus: “Saan kadi a nadalusan ti sangapulo? Sadino, ngarud, ti ayan ti dadduma pay a siam?
18 Awan kadi ti nasarakan a nagsubli tapno mangidayaw iti Dios no di daytoy a tao iti sabali a nasion?”
19 Ket kinunana kenkuana: “Tumakderka ket inkan; ti pammatim pinaimbagnaka.”+
20 Ngem idi nagimtuodan dagiti Fariseo no kaano nga umay ti pagarian ti Dios,+ sinungbatanna ida ket kinunana: “Ti pagarian ti Dios saan nga umay a buyogen ti nakadkadlaw a pannakapaliiw,
21 saanto met a kunkunaen dagiti tattao: ‘Kitaenyo ditoy!’ wenno, ‘Idiay!’+ Ta, adtoy! ti pagarian ti Dios adda iti tengngayo.”+
22 Idin kinunana kadagiti adalan: “Umayto dagiti aldaw inton tarigagayanyo a kitaen ti maysa kadagiti aldaw ti Anak ti tao ngem saanyonto a makita dayta.+
23 Ket kunaento kadakayo dagiti tattao, ‘Kitaenyo sadiay!’ wenno, ‘Kitaenyo ditoy!’+ Dikay rummuar wenno kamakamen ida.+
24 Ta no kasano a ti kimat,+ babaen iti panaggilapna, agsilnag manipud iti maysa a paset iti baba ti langit agingga iti sabali a paset iti baba ti langit, kastanto ti Anak ti tao.+
25 Umuna, nupay kasta, masapul nga agpasar iti adu a panagsagaba ken ilaksid daytoy a kaputotan.+
26 Mainayon pay, kas iti napasamak idi kaaldawan ni Noe,+ kastanto met iti kaaldawan ti Anak ti tao:+
27 mangmanganda, umin-inumda, mangas-asawa dagiti lallaki, mayas-asawa dagiti babbai, agingga iti daydi aldaw a simrek ni Noe iti daong, ket dimteng ti layus ket dinadaelna ida amin.+
28 Umas-asping, kas iti napasamak idi kaaldawan ni Lot:+ mangmanganda, umin-inumda, gumatgatangda, aglaklakoda, agmulmulada, agibangbangonda.
29 Ngem iti aldaw a rimmuar ni Lot iti Sodoma nagtudo iti apuy ken asupre manipud langit ket dinadaelna ida amin.+
30 Kastanto met laeng iti dayta nga aldaw inton maipanayag ti Anak ti tao.+
31 “Iti dayta nga aldaw daydiay tao nga adda iti tuktok ti balay ngem ti maakar a bambanagna addada iti uneg ti balay saan koma a bumaba tapno alaenna dagitoy, ket ti tao nga adda iti talon, kasta met a saan koma nga agsubli iti bambanag a nalikudan.
32 Laglagipenyo ti asawa ni Lot.+
33 Siasinoman a mangikagumaan a mangigaga iti kararuana maipaay iti bagina mapukawnanto dayta, ngem siasinoman a makapukaw iti dayta mataginayonnanto a sibibiag.+
34 Ibagak kadakayo, Iti dayta a rabii dua a lallaki ti addanto iti maysa a pagiddaan; ti maysa maalanto, ngem ti sabali mabaybay-anto.+
35 Addanto dua a babbai nga aggilgiling iti isu met laeng a gilingan; ti maysa maalanto, ngem ti sabali mabaybay-anto.”+
36 —
37 Gapuna kas sungbat kinunada kenkuana: “Sadino, Apo?” Kinunana kadakuada: “No sadino ti ayan ti bagi,+ sadiay met a maurnongto a sangsangkamaysa dagiti agila.”+
