Lucas 14:1-35
14 Ket iti maysa a pasamak idi isu napan iti balay ti maysa kadagiti agturay dagiti Fariseo iti sabbath tapno mangan,+ isu sinipsiputanda a siiinget.+
2 Ket, adtoy! adda idi iti sanguananna ti maysa a tao nga agebbal.
3 Gapuna kas tignay nagsao ni Jesus kadagidiay nalaing iti Linteg ken kadagiti Fariseo, a kunkunana: “Nainkalintegan kadi ti mangagas iti sabbath wenno saan?”+
4 Ngem nagulimekda. Gapu iti dayta iniggamanna ti tao, pinaimbagna ket isu pinagawidna.
5 Ket kinunana kadakuada: “Asino kadakayo, a no ti anakna wenno ti torona matnag iti bubon,+ saannanto nga aonen a dagus iti aldaw ti sabbath?”+
6 Ket saanda a nabalinan ti sumungbat kadagitoy a banag.+
7 Idin nagtultuloy a mangibaga kadagiti naawis a tattao iti maysa a pangngarig, yantangay nadlawna no kasano a pilpilienda dagiti katan-okan a puesto maipaay iti bagbagida, a kunkunana kadakuada:+
8 “No ti asinoman inawisnaka iti padaya ti kasar, dika agsadag iti katan-okan a puesto.+ Nalabit adda maysa nga ad-adda a mabigbigbig ngem sika nga inawisna iti dayta a tiempo,
9 ket umayto ti nangawis kenka ken isuna ket kunaenna kenka, ‘Itedmo iti daytoy a tao dayta a puesto.’ Ket iti kasta mangrugikanto nga agsaad a sibabain iti kanunumuan a puesto.+
10 Ngem no maawiska, mapanka ket agsadagka iti kanunumuan a puesto,+ tapno inton umay ti tao a nangawis kenka kunaennanto kenka, ‘Gayyem, mapanka iti nangatngato.’ Iti kasta maaddaankanto iti dayaw iti sanguanan dagiti amin a padam a sangaili.+
11 Ta tunggal maysa a mangitan-ok iti bagina maipababanto ket ti mangipababa iti bagina maitan-okto.”+
12 Sumaganad kinunana met iti tao a nangawis kenkuana: “No mangisaganaka iti pannangan wenno pangrabii, dika ayaban dagiti gagayyemmo wenno ti kakabsatmo wenno dagiti kakabagiam wenno dagiti nabaknang a kaarruba. Nalabit addanto tiempo nga awisendaka met a kas subad ket agbalinto dayta a pangsupapak kenka.
13 Ngem no mangisaganaka iti padaya, awisem dagiti napanglaw a tattao, lugpi, pilay, bulsek;+
14 ket naragsakkanto, agsipud ta awan maisupapakda kenka. Ta masupapakankanto inton panagungar+ dagiti nalinteg.”
15 Idi mangngegna dagitoy a banag kinuna kenkuana ti maysa kadagiti pada a sangaili: “Naragsak daydiay mangan iti tinapay iti pagarian ti Dios.”+
16 Kinuna kenkuana ni Jesus: “Maysa a tao ti mangisagsagana iti naindaklan a pangrabii, ket adu ti inawisna.+
17 Ket imbaonna ti adipenna iti oras ti panangrabii tapno kunaenna kadagidiay naawis, ‘Umaykayo,+ agsipud ta nakasaganan ti bambanag.’
18 Ngem agpapadada amin a nangrugi nga agkitakit.+ Kinuna kenkuana ti umuna, ‘Gimmatangak iti talon ket kasapulak ti rummuar ket kitaek dayta; kiddawek kenka, Dispensarennak koma.’+
19 Ket kinuna ti sabali, ‘Gimmatangak iti lima a kasangolan a baka ket mapanko tingitingen ida; kiddawek kenka, Dispensarennak koma.’+
20 Kaskasdi kinuna ti sabali, ‘Kaikaskasarko+ ti asawak ket gapu itoy a rason saanak a makaumay.’
21 Gapuna immay ti adipen ket impakaammona dagitoy a banag iti apona. Iti kasta nagpungtot ti bumalay ket kinunana iti adipenna, ‘Darasem ti mapan kadagiti akaba a dalan ken lansangan iti siudad, ket iyegmo ditoy dagiti napanglaw ken dagiti lugpi ken dagiti bulsek ken dagiti pilay.’+
22 Idi agangay kinuna ti adipen, ‘Apo, naaramiden ti imbilinmo, ket adda pay lugar.’
23 Ket kinuna ti apo iti adipen, ‘Rummuarka nga agturong kadagiti dalan+ ken kadagiti naaladan a lugar, ket pilitenyo ida a sumrek, tapno mapno ti balayko.+
24 Ta kunak kadakayo, Awan kadagidiay tattao a naawis ti makaramanto iti pangrabiik.’”+
25 Itan makipagdaldaliasat idi kenkuana ti dadakkel a bunggoy, ket simmango ket kinunana kadakuada:
26 “No ti asinoman umay kaniak ket saanna a guraen ti amana ken ti inana ken ti asawana ken ti annakna ken ti kakabsatna a lallaki ken ti kakabsatna a babbai, wen, ken uray ti bukodna a kararua,+ isu saan a makapagbalin nga adalak.+
27 Siasinoman a saan a mangaw-awit iti kayona a pagtutuokan ken sumursurot kaniak saan a makapagbalin nga adalak.+
28 Kas pagarigan, asino kadakayo a kayatna ti mangbangon iti torre ti saan nga agtugaw nga umuna ket pattapattaenna ti magastos,+ tapno kitaenna no adda umanay a pangleppasna iti dayta?
29 Ta no saan, mabalin a maisaadna ti pamuonna ngem saanna a kabalinan a leppasen dayta, ket amin dagiti umim-imatang rugianda nga uyawen,
30 a kunkunada, ‘Rinugian daytoy a tao ti agbangon ngem saanna a nabalinan a leppasen.’
31 Wenno ania nga ari, nga agmarmartsa a sumabet iti sabali nga ari iti gubat, ti saan nga agtugaw nga umuna ket makiuman no buyogen ti sangapulo ribu a buyot kabaelanna a sanguen daydiay umay a maibusor kenkuana nga addaan iti duapulo ribu?+
32 No, iti kinapudnona, saanna a kabaelan nga aramiden ti kasta, ngarud bayat a daydiay a tao ket adayo pay laeng isu mangibaon iti bagi dagiti embahador ket agkiddaw a maipaay iti kappia.+
33 Gapuna, makasiguradokayo, awan kadakayo a saan nga agpakada kadagiti amin a sanikuana+ ti makapagbalin nga adalak.
34 “Ti asin, iti kinaagpaysuanna, ket nasayaat. Ngem no ti asin a mismo mapukawna ti bilegna, anianto ti pangtempla iti dayta?+
35 Saanto a maikanada dayta uray maipaay iti daga wenno maipaay a ganagan. Dagiti tattao ibellengda dayta iti ruar. Ti adda lapayagna a pagimdeng, agimdeng koma.”+
