Kanta ni Solomon 8:1-14
8 “O kaslaka koma iti maysa a kabsatko a lalaki,+ a mangkunkunnot kadagiti suso ni inak!+ No masarakanka koma iti ruar, agkanka.+ Dagiti tattao saandak pay ketdi nga umsien.
2 Iturongka, iyegka iti balay ni inak,+ a nangisursuro kaniak. Ikkanka iti inumen a narekaduan nga arak,+ ti kabbaro a tubbog dagiti granada.
3 Ti makannigid nga imana addanto iti baba ti ulok; ket ti makannawan nga imana—arakupennak dayta.+
4 “Pinagsapatakayo, O annak a babbai ti Jerusalem, a saanyo a padasen a riingen wenno gutugoten ti ayat kaniak agingga nga agduyos.”+
5 “Siasino daytoy babai+ a sumangsang-at manipud iti let-ang,+ a sisasadag iti daydiay patpatgenna?”+
“Iti sirok ti kayo a mansanas ginutugotka. Sadiay a ni inam nagpaut-ot iti panangyanakna kenka. Sadiay a ti mangyan-anak idi kenka nagpasar kadagiti ut-ot ti panaganak.+
6 “Isaadnak a kas maysa a selio iti rabaw ta pusom,+ kas maysa a selio iti rabaw ta takiagmo; agsipud ta ni ayat nabileg a kas ken patay,+ ti panangipilit iti naipamaysa a debosion+ ket di itutulok a kas iti Sheol. Dagiti gayebgebna ket gaygayebgeb ti apuy, ti gil-ayab ni Jah.+
7 Ti adu a danum saanda a kabaelan nga iddepen ni ayat,+ dagiti karayan saanda met a mayanud dayta.+ No ti maysa a lalaki itdenna ti amin a napateg a bambanag ti balayna gapu iti ayat, di bumurong nga umsiento ida dagiti tattao.”
8 “Addaantayo iti bassit a kabsat a babai+ nga awanan pay kadagiti suso. Anianto ti aramidentayo maipaay iti kabsattayo a babai iti aldaw nga isu mapakisawan?”
9 “No isu pader koma,+ mangibangontayo iti rabawna iti pannakabaluarte a naaramid iti pirak; ngem no isu ruangan koma,+ bangenantayo iti tabla a sedro.”
10 “Maysaak a pader, ket dagiti susok umaspingda kadagiti torre.+ Iti daytoy a kasasaad nagbalinak iti imatangna a kas kenkuana a makasarak iti talna.
11 “Adda maysa a kaubasan+ a kukua idi ni Solomon idiay Baal-hamon. Intedna ti kaubasan kadagiti agay-aywan.+ Tunggal maysa mangyeg iti sangaribu a kapisi a pirak maipaay iti bungana.
12 “Ti kaubasak, a kukuak, adda iti aywanko. Ti sangaribu kukuam, O Solomon, ket dua gasut kadagidiay mangay-aywan iti bungana.”
13 “O sika nga agnanaed kadagiti minuyongan,+ dagiti kakadua ipangpangagda ti timekmo. Ipangngegmo kaniak dayta.”+
14 “Agtarayka, patpatgek, ket pagbalinem ta bagim a kas iti gasela wenno kas iti urbon dagiti kalakian nga ugsa iti rabaw ti bambantay dagiti rekado.”+
