Isaias 58:1-14
58 “Agpukkawka iti natbag; dika medmedan.+ Ipigsam ti timekmo a kas iti maysa a tangguyob, ket ibagam iti ilik ti iyaalsada,+ ken iti balay ni Jacob ti basbasolda.
2 Kaskasdi a siak ti sinapsapulda iti inaldaw-aldaw, ket iyebkasda ti ragsak iti pannakaammoda idi iti daldalanko,+ kas iti nasion a nangaramid iti mismo a kinalinteg ken saan a nangpanaw iti mismo a kinahustisia ti Diosda,+ ta nagkidkiddawda kaniak kadagiti nalinteg a panangukom, nga immadanida iti Dios a nagragsakanda,+
3 “‘Iti ania a rason a nagayunarkami ket saanmo a nakita,+ ken pinarigatmi ti kararuami+ ket saanmo nga imutektekan?’+
“Pudno a naragsakankayo iti mismo nga aldaw ti panagayunaryo, idi adda amin dagiti managbannogyo a dinagdagdagyo nga agtrabaho.+
4 Pudno a maipaay iti panagririri ken panagdadangadang agayunarkayo,+ ken maipaay iti panangkabil babaen iti gemgem ti kinadangkes.+ Saankayo kadi a nagay-ayunar a kas iti panagayunar iti aldaw a panangipangngegyo ti timekyo iti kangatuan?
5 Ti kadi panagayunar a pinilik rebbeng nga agbalin a kas itoy, kas maysa nga aldaw a panangparigat ti naindagaan a tao iti kararuana?+ Nga idumogna ti ulona kas iti maysa a tanutubo, ket iti kasta mangisimpa iti tinakpil laeng ken dapdapo kas sopana?+ Daytoy kadi ti awagam a panagayunar ken aldaw a makaay-ayo ken Jehova?+
6 “Saan kadi a daytoy ti panagayunar a piliek? A palukayan dagiti grilios ti kinadangkes,+ a luk-atan dagiti galut ti barra ti sangol,+ ken palubosan a siwayawaya dagidiay nailupitlupit,+ ket iti kasta pugsatenyo a guduaen ti tunggal barra ti sangol?+
7 Saan kadi nga isu ti panangbingbingay iti tinapaymo maipaay iti daydiay mabisin,+ ket rebbeng nga iyegmo dagiti naparigatan, awanan pagtaengan a tattao iti balaymo?+ A, no kas pagarigan makitam ti asinoman a lamolamo, masapul nga abbongam,+ ket saanka koma nga aglemmeng manipud bukodmo a lasag?+
8 “Iti dayta a kasasaad sumiray ti lawagmo kas iti bannawag;+ ket ti pannakapaimbag sipapardas a tumanor agpaay kenka.+ Ket iti sanguanam sigurado a magna ti kinalintegmo;+ ti mismo a dayag ni Jehova isu ti guardiam iti likudan.+
9 Iti dayta a kasasaad umawagka, ket ni met laeng Jehova sumungbat; agpatulongka,+ ket kunaenna, ‘Adtoyak!’
“No ikkatemto iti tengngam ti barra ti sangol,+ ti panangitudotudo iti ramay+ ken ti panagsao iti makapasakit;+
10 ket ti mismo a tarigagay ti kararuam ipaaymonto iti daydiay mabisin,+ ket pennekemto ti kararua a maparparigatan, ti lawagmo met sigurado nga agsilnagto uray iti kasipngetan, ket ti daguyemyemmo kaslanto iti tengnga ti aldaw.+
11 Ket siguradonto nga idalannaka+ a patinayon+ ni Jehova ken pennekenna ti kararuam uray iti natikag a daga,+ ket pakirdennanto dagiti mismo a tulangmo;+ ket agbalinkanto a kas iti nasayaat-pannakapadanumna a minuyongan,+ ken kas iti ubbog ti danum, a ti dandanumna saan nga agulbod.
12 Ket iti panangtignaymo pudno unay a dagiti tattao bangonendanto dagiti disso a walangwalang iti nabayagen a tiempo;+ patakderemto uray dagiti pamuon ti agtultuloy a kapkaputotan.+ Ket pudno a maawagankanto iti manangtarimaan iti giwang,+ ti manangisubli kadagiti dalan tapno pagnaedan.
13 “No gapu iti sabbath ibaw-ingmonto ta sakam maipapan iti panangaramid kadagiti bukodmo a pakaragsakan iti nasantuan nga aldawko,+ ket pudno a naganemto ti sabbath a maysa a napalalo a ragsak, maysa a nasantuan nga aldaw ni Jehova, maysa a maidaydayaw,+ ket pudno nga idaydayawmonto dayta imbes nga aramidem dagiti bukodmo a dalan, imbes a sarakem ti pakaragsakam ken sawem ti maysa a sao;
14 iti dayta a kasasaad maragsakankanto iti napalalo ken Jehova,+ ket pasakayenkanto iti rabaw dagiti nangato a disso ti daga;+ ket pakanenkanto manipud iti pagtatawidan a sanikua ni Jacob nga amam,+ ta ti met laeng ngiwat ni Jehova sinaona.”+
