Isaias 3:1-26
3 Ta, adtoy! ti pudno nga Apo,+ ni Jehova ti buybuyot, ikkatenna iti Jerusalem+ ken iti Juda ti saranay ken salindeg, ti intero a saranay a tinapay ken ti intero a saranay a danum,+
2 nabileg a lalaki ken mannakigubat, ukom ken mammadto,+ ken managipadles ken lakay a tao,+
3 panguluen ti limapulo+ ken tao a mararaem unay ken manangbalakad ken nalaing unay kadagiti arte ti panagsalamangka, ken ti nalaing a manangkayaw.+
4 Ket pudno unay nga ubbing a lallaki ti pagbalinekto a piprinsipeda, ket ti manangipilit a pannakabalin laeng ti agturayto kadakuada.+
5 Ket pudno a mangikuspilto dagiti tattao, ti maysa gapu iti sabali, uray ti tunggal maysa gapu iti padana a tao.+ Dumuklosdanto, ti ubing a lalaki maibusor iti lakay,+ ken daydiay nalag-an ti pannakaipategna maibusor iti daydiay maidayaw.+
6 Ta ti tunggal maysa tenglennanto ti kabsatna a lalaki iti balay ni amana, a kunkunana: “Addaanka iti kagay. Maysa a diktador+ ti rebbeng a pagbalinam kadakami, ket daytoy naduprak a masa adda koma iti sidong ta imam.”
7 Ipigsananto ti timekna iti dayta nga aldaw, a kunkunana: “Saanakto nga agbalin a manangpatapat iti sugat; ket iti balayko awan uray tinapay wenno kagay. Saandak nga isaad a kas diktador kadagiti umili.”
8 Ta ti Jerusalem naitibkol, ket ti met laeng Juda narban,+ agsipud ta ti dilada ken dagiti pannakilangenda maibusorda ken Jehova,+ iti panagtignay a sirerebelioso kadagiti mata ti dayagna.+
9 Ti mismo a langa dagiti rupada pudno a mangpaneknek a maibusor kadakuada,+ ket ibagada ti maipapan iti basolda a kas iti basol ti Sodoma.+ Saanda nga inlemmeng dayta. Asi pay ti kararuada! Ta impaayanda ti bagbagida iti didigra.+
10 Sawenyo a naimbagto iti daydiay nalinteg,+ ta kanendanto ti mismo a bunga dagiti pannakilangenda.+
11 Asi pay daydiay nadangkes!—Didigra; ta ti panangtrato nga inaramid dagiti bukodna nga ima maaramidto kenkuana!+
12 No maipapan iti ilik, dagiti manangitudingna iti akem makilanglangenda a siiinget, ket dagiti babbai laeng ti pudno nga agturay iti dayta.+ O ilik, dagidiay mangiturturong kenka pagallaallaendaka,+ ket ti dalan dagiti danam riniribukda.+
13 Ni Jehova agsaad tapno makisupiat ket nakatakder tapno mangyetnag iti sentensia iti il-ili.+
14 Ni met laeng Jehova makiinnukomto kadagidiay lallakay ti ilina ken kadagiti prinsipena.+
“Ket dakayo pinuoranyo ti kaubasan. Ti naala babaen ti panangtakaw manipud iti daydiay naparigatan adda kadagiti balayyo.+
15 Ania ti kayatyo a sawen iti panangrumekyo iti ilik, ken iti panangmekmekyo kadagiti mismo a rupa dagidiay naparigatan?”+ kuna ti Soberano nga Apo, ni Jehova ti buybuyot.
16 Ket ni Jehova kunana: “Gapu ta ti annak a babbai ti Sion nagbalinda a natangsit ket magnada a sitatangar dagiti karabukobda ken mangpalpaludip kadagiti matada, magnada buyogen dagiti agtiltil-ay nga addang, ket kadagiti sakada mangaramidda iti agkilingkiling nga uni,+
17 ni Jehova pudno a paggaddilennanto met ti kuppokuppo ti annak a babbai ti Sion,+ ket ni met laeng Jehova iduyayyatnanto ti mismo a mugingda.+
18 Iti dayta nga aldaw ikkatento ni Jehova ti pintas dagiti pulseras ti saka ken dagiti bedbed ti ulo ken dagiti sinanbulan nga arkos,+
19 dagiti bitinbitin ti lapayag ken dagiti pulseras ken dagiti abbungot,+
20 dagiti dalungdong ken dagiti kalangkang ti saka ken dagiti begkes ti barukong+ ken ti ‘balbalay ti kararua’ ken ti arkos nga umaw-aweng a kulkulintipay,+
21 dagiti singsing ti ramay ken dagiti aritos ti agong,+
22 dagiti nadaeg a pagan-anay ken dagiti makinruar a tunika ken dagiti kagay ken dagiti supot,
23 ken dagiti iiggaman a pagsarmingan+ ken dagiti makin-uneg a kawes ken dagiti turbante+ ken ti dadakkel nga abbungot.+
24 “Ket mapasamakto nga imbes a lana ti balsamo+ maaddanto laeng ti nabangles nga angot; ket imbes a sinturon, tali; ket imbes a naarte nga urnos ti buok, panagkalbo;+ ket imbes a nabaknang a kawes, panangibarikes iti tinakpil;+ tanda a marka+ imbes a kinalibnos.
25 Babaen ti kampilan mapasagto dagiti bukodmo a lallaki, ken ti kinabilegmo babaen ti gubat.+
26 Ket dagiti pagserkanna agleddaangto+ ken iyebkasda ti ladingit, ket isu sigurado a malinisanto. Isu agtugawto iti mismo a daga.”+
