Genesis 2:1-25
2 Iti kasta ti langlangit ken ti daga ken ti isuamin a buyotda nairingpasen.+
2 Ket iti maikapito nga aldaw nairingpas ti Dios ti gapuananna nga inaramidna, ket naginana iti maikapito nga aldaw iti amin a gapuananna nga inaramidna.+
3 Ket ti Dios binendisionanna ti maikapito nga aldaw ket pinagbalinna a sagrado, agsipud ta iti dayta isu agin-inanan iti isuamin a gapuananna a pinarsua ti Dios maipaay iti panggep ti panagaramid.+
4 Daytoy ket pakasaritaan ti langlangit ken ti daga iti tiempo a pannakaparsuada, iti aldaw a ni Jehova a Dios inaramidna ti daga ken langit.+
5 Ita awan pay idi ti bassit a kayo ti tay-ak a masarakan iti daga ken awan pay ti nagtubo a mulmula iti tay-ak, agsipud ta ni Jehova a Dios saanna pay a pinagtudo+ iti rabaw ti daga ken awan ti tao a mangtalon iti daga.
6 Ngem ti angep+ agpangato manipud iti daga ket sinibuganna ti intero a rabaw ti daga.+
7 Ket ni Jehova a Dios binukelna ti tao manipud tapok+ a naggapu iti daga+ ket impuyotna kadagiti abut ti agongna ti anges ti biag,+ ket ti tao nagbalin a kararua a sibibiag.+
8 Kanayonanna, nangimula ni Jehova a Dios iti maysa a minuyongan idiay Eden,+ a sumango iti daya, ket inkabilna sadiay ti tao a binukelna.+
9 Ngarud ni Jehova a Dios pinagtubona iti daga ti tunggal kayo a makaay-ayo iti panagkita ti maysa ken nasayaat a pagtaraon ken kasta met ti kayo ti biag+ iti tengnga ti minuyongan ken ti kayo ti pannakaammo iti naimbag ken dakes.+
10 Ita adda idi ti maysa a karayan nga agay-ayus manipud Eden a mangsibug iti minuyongan, ket manipud sadiay nangrugi a masina ket nagbalin a, no ar-arigen, uppat a sanga.
11 Ti nagan daydiay umuna Pison; dayta ti manglawlaw iti intero a daga ti Havila,+ a sadiay adda balitok.
12 Ket nasayaat ti balitok dayta a daga.+ Adda met sadiay ti tutot ti bedelio+ ken ti bato nga onix.+
13 Ket ti nagan ti karayan a maikadua Gihon; dayta ti manglawlaw iti intero a daga ti Cus.
14 Ket ti nagan ti karayan a maikatlo Hiddekel;+ dayta ti agturong iti daya ti Asiria.+ Ket ti karayan a maikapat isu ti Eufrates.+
15 Ket ni Jehova a Dios innalana ti tao ket insaadna iti minuyongan ti Eden+ tapno talonenna dayta ken tapno aywananna.+
16 Ket ni Jehova a Dios impasdekna met daytoy a bilin iti tao: “Manipud iti tunggal kayo iti minuyongan mabalinmo ti agpennek a mangan.+
17 Ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.”+
18 Ket kinuna ni Jehova a Dios: “Saan a nasayaat iti tao nga agtultuloy nga is-isuna. Mangaramidak iti katulongan maipaay kenkuana, kas maysa a komplimentona.”+
19 Ita ni Jehova a Dios bukbuklenna idi manipud iti daga ti tunggal atap nga animal iti tay-ak ken tunggal agtaytayab a parsua iti langlangit, ket rinugianna nga inyeg ida iti tao tapno kitaenna no ania ti iyawagna iti tunggal maysa; ket aniaman ti iyawag ti tao iti dayta, tunggal sibibiag a kararua,+ dayta idi ti naganna.+
20 Gapuna ninaganan ti tao dagiti amin a naamo nga animal ken dagiti agtaytayab a parsua iti langlangit ken ti tunggal atap nga animal iti tay-ak, ngem maipaay iti tao awan ti nasarakan a katulongan kas maysa a komplimentona.
21 Gapuna ni Jehova a Dios impaayanna ti tao iti nargaan a turog+ ket, bayat a matmaturog, innalana ti maysa kadagiti paragpagna ket kalpasanna inserrana ti lasag iti lugarna.
22 Ket ni Jehova a Dios binukelna a babai ti paragpag nga innalana iti tao ket inyegna iti tao.+
23 Kalpasanna kinuna ti tao:“Daytoy iti kamaudiananna ti tulang dagiti tulangkoKen lasag ti lasagko.+Daytoy ket maawaganto iti Babai,Agsipud ta iti lalaki ti nakaalaan daytoy.”+
24 Dayta ti makagapu a ti maysa a lalaki panawannanto ti amana ken ti inana+ ket masapul a makitipon iti asawana ket masapul nga agbalinda a maymaysa a lasag.+
25 Ket isuda a dua nagtultuloyda a lamolamo,+ ti lalaki ken ti asawana, ket kaskasdi saanda a nagbain.+
