Deuteronomio 24:1-22
24 “No kas pagarigan ti maysa a lalaki mangala iti babai ket tagikuaenna a kas asawa, mapasamakto met a no saan a makasarak iti pabor kadagiti matana agsipud ta nakasarak iti maysa a banag a di natakneng iti biangna,+ masapul met a mangisurat iti kasuratan ti diborsio+ maipaay kenkuana ket ipaiggemna ket papanawenna iti balayna.+
2 Ket masapul a pumanaw iti balayna ket mapan ken agbalin a kukua ti sabali a lalaki.+
3 No ti naud-udi a lalaki gimmura kenkuana ket nangisurat iti kasuratan ti diborsio maipaay kenkuana ket impaiggemna ket pinapanawna iti balayna, wenno no kas pagarigan matay ti naud-udi a lalaki a nangala kenkuana kas asawa,
4 ti immuna a makinkukua kenkuana a nangpapanaw kenkuana saanto a mapalubosan a mangala manen kenkuana tapno agbalin nga asawana kalpasan a natulawanen;+ ta nakarimrimon dayta iti sango ni Jehova, ket dika iturong iti panagbasol ti daga nga ited kenka ni Jehova a Diosmo a kas tawid.
5 “No kas pagarigan ti maysa a lalaki mangala iti baro nga asawa,+ rebbeng a saan a mapan iti buyot, rebbeng a saan met a maipaalagad kenkuana ti aniaman a banag. Rebbeng nga agtultuloy a siwayawaya iti balayna iti makatawen, ket masapul a pagrag-oenna ti asawana nga innalana.+
6 “Awan ti asinoman a mangagaw kas tani iti paggilingan a pusiposen ti ima wenno ti makinngato a gilingan a batona,+ agsipud ta kararua ti ag-agawenna kas tani.
7 “No kas pagarigan masarakan ti maysa a tao a mangkumkumaw+ iti maysa a kararua ti kakabsatna iti annak ti Israel, ket inkuspilna ken inlakona,+ masapul met a matay dayta a manangkumaw. Ket masapul nga ikkatem ti dakes iti tengngam.+
8 “Agaluadka iti saplit a kukutel+ tapno annadam a naimbag ken aramidem ti maitunos iti isuamin nga isuronto kadakayo ti papadi, dagiti Levita.+ Kas iti imbilinko kadakuada, rebbeng nga annadanyo+ nga aramiden.
9 Adda koma pananglaglagip iti inaramid ni Jehova a Diosmo ken Miriam iti dalan idi rumrummuarkayo manipud Egipto.+
10 “No kas pagarigan pautangam ti padam a tao iti aniaman a kita ti pautang,+ dika sumrek iti balayna tapno alaem kenkuana ti intanina.+
11 Rebbeng nga agtakderka iti ruar, ket ti tao a papautangam iruarna nga ipan kenka ti tani.
12 Ket no ti tao marigrigatan, dika mapan agidda nga ikuyog ti tanina.+
13 Di bumurong nga isublim kenkuana ti tani apaman a lumnek ti init,+ ket mapanto agidda a sikakawes,+ ket bendisionannakanto;+ ket kaipapanannanto ti kinalinteg maipaay kenka iti sango ni Jehova a Diosmo.+
14 “Dika mangsaur iti patangtangdanan a trabahador a marigrigatan ken napanglaw, uray no iti kakabsatmo wenno kadagiti ganggannaet nga agnanaed kenka nga adda iti dagam, iti uneg dagiti ruanganmo.+
15 Iti aldawna rebbeng nga itedmo kenkuana dagiti tangdanna,+ ket saan koma a malnekan ida ti init, agsipud ta isu marigrigatan ket bangonenna ti kararuana kadagiti tangdanna; tapno saan nga umkis ken Jehova maibusor kenka,+ ket agbalinto a basol iti biangmo.+
16 “Saan a rebbeng a mapapatay ti amma maigapu iti annak, ket saan a rebbeng a mapapatay ti annak maigapu iti amma.+ Mapapatay ti tunggal maysa gapu iti bukodna a basol.+
17 “Dika ballikugen ti pannakaukom ti ganggannaet nga agnanaed+ wenno ti awan amana nga ubing,+ ket dika agawen kas tani ti kawes ti balo a babai.+
18 Ket masapul a lagipem a nagbalinka nga adipen idiay Egipto, ket sinubbotnaka ni Jehova a Diosmo manipud sadiay.+ Dayta ti makagapu nga ibilbilinko kenka nga aramidem daytoy a banag.
19 “No kas pagarigan apitem ti anim iti talonmo,+ ket nalipatam ti sangabettek iti talon, dika agsubli tapno alaem. Mabati dayta maipaay iti ganggannaet nga agnanaed, maipaay iti awan amana nga ubing ken maipaay iti balo a babai;+ tapno bendisionannaka ni Jehova a Diosmo iti tunggal aramid ta imam.+
20 “No kas pagarigan aprasem ti kayom nga olibo, dika sublian a pasarunuan dagiti kangrunaan a sangana. Mabati dayta maipaay iti ganggannaet nga agnanaed, maipaay iti awan amana nga ubing ken maipaay iti balo a babai.+
21 “No kas pagarigan burasem ti ubas ti kaubasam, dika burasen a pasarunuan dagiti natedda. Mabatida maipaay iti ganggannaet nga agnanaed, maipaay iti awan amana nga ubing ken maipaay iti balo a babai.
22 Ket masapul a lagipem a nagbalinka nga adipen idiay daga ti Egipto.+ Dayta ti makagapu nga ibilbilinko kenka nga aramidem daytoy a banag.+
