Deuteronomio 15:1-23
15 “Iti ngudo ti tunggal pito a tawen rebbeng a mangluk-atka.
2 Ket kastoy ti pamay-an ti panangluk-at:+ addanto panangluk-at ti tunggal nagpautang iti utang nga ipalubosna nga alaen ti padana a tao. Rebbeng a saanna a piliten nga agbayad ti padana a tao wenno ti kabsatna,+ agsipud ta mayawagto ti panangluk-at agpaay ken Jehova.+
3 Mabalinmo a piliten nga agbayad ti ganggannaet;+ ngem aniaman a kukuam nga adda iti kabsatmo luk-atan koma ta imam.
4 Nupay kasta, awan ti rebbeng nga agbalin a napanglaw iti tengngam, agsipud ta di bumurong a bendisionannakanto ni Jehova+ iti daga nga ited kenka ni Jehova a Diosmo kas tawid tapno tagikuaem,+
5 no la ket umimdengkanto a di bumurong iti timek ni Jehova a Diosmo tapno annadam nga aramiden amin daytoy a bilin nga ibilbilinko kenka ita nga aldaw.+
6 Ta pudno a bendisionannakanto ni Jehova a Diosmo kas inkarina kenka, ket sigurado nga agpautangkanto+ nga addaan tani iti adu a nasion, idinto ta sika saankanto nga umutang; ket dominaramto ti adu a nasion, idinto ta saandakanto a dominaran.+
7 “No kas pagarigan maysa iti kakabsatmo pumanglaw iti tengngam iti maysa kadagiti siudadmo, iti dagam nga ited kenka ni Jehova a Diosmo, dika patangkenen ta pusom wenno agmetmet iti kabsatmo a napanglaw.+
8 Ta rebbeng a sipaparabur nga ukradem kenkuana ta imam+ ket di bumurong a pautangamto nga addaan tani kas iti kaadu ti kasapulanna, nga isu ti pagkuranganna.
9 Agaluadka ta amangan no maadda ita pusom ti maysa a di nadayaw a sao,+ a kunaem, ‘Ti maikapito a tawen, ti tawen ti panangluk-at, umasidegen,’+ ket ti matam pudno nga agbalin a di naparabur iti kabsatmo a napanglaw,+ ket awan ti itedmo kenkuana, ket kasapulan nga umawag ken Jehova maibusor kenka,+ ket nagbalin a basol dayta iti biangmo.+
10 Di bumurong a mangtedka kenkuana,+ ket ti pusom rebbeng a saan a naimut iti panangtedmo kenkuana, agsipud ta maigapu itoy bendisionannakanto ni Jehova a Diosmo iti tunggal aramidmo ken iti tunggal gapuanam.+
11 Ta saanto a pulos agpukaw ti maysa a napanglaw iti tengnga ti daga.+ Dayta ti makagapu a bilbilinenka, a kunak, ‘Rebbeng a sipaparabur nga ukradem ta imam iti naparigatan ken napanglaw a kabsatmo iti dagam.’+
12 “No kas pagarigan mailako kenka ti kabsatmo, maysa a Hebreo wenno maysa a Hebrea,+ ket nagserbi kenka iti innem a tawen, ngarud iti maikapito a tawen rebbeng a papanawem kenka kas maysa a nawayawayaan.+
13 Ket no kas pagarigan papanawem kenka kas maysa a nawayawayaan, dika papanawen nga ima-ima.+
14 Siguraduem a paawitan iti banag nga aggapu iti arbanmo ken iti pagirikam ken iti pagpespesam iti lana ken ubas. Kas iti panangbendision kenka ni Jehova a Diosmo, rebbeng a mangtedka kenkuana.+
15 Ket masapul a lagipem a nagbalinka nga adipen iti daga ti Egipto ket sinubbotnaka ni Jehova a Diosmo.+ Dayta ti makagapu nga ibilbilinko kenka daytoy a banag ita nga aldaw.
16 “Ket mapasamakto a no kas pagarigan kunaenna kenka, ‘Saanakto a pumanaw iti dennam!’ agsipud ta ay-ayatennaka ken ti sangakabbalayam, yantangay naimbag ti lak-amna bayat ti kaaddana kenka,+
17 masapul met a mangalaka iti kulukol ket palsotem iti lapayagna ken iti ridaw, ket agbalinto nga adipenmo agingga iti tiempo a di nakedngan.+ Ket iti adipenmo a babai aramidem met ti kastoy.
18 Saan koma a narigat a banag kadagita matam inton papanawem iti dennam kas maysa a nawayawayaan;+ agsipud ta nagserbi kenka iti innem a tawen iti mamindua a pateg ti patangtangdanan a trabahador,+ ket binendisionannaka ni Jehova a Diosmo iti isuamin nga aramidem.+
19 “Tunggal inauna a kalakian a mayanakto iti pangenmo ken iti arbanmo rebbeng a santipikarem ken Jehova a Diosmo.+ Dika pagserbi ti inauna ti torom, wenno pukisan ti inauna ti arbanmo.+
20 Iti sango ni Jehova a Diosmo rebbeng a kanem dayta iti tinawentawen iti disso a piliento ni Jehova,+ sika ken ti sangakabbalayam.
21 Ket no kas pagarigan addanto pilawna, ta pilay wenno bulsek, aniaman a dakes a pilaw, dika isakripisio ken Jehova a Diosmo.+
22 Rebbeng a kanem dayta iti uneg dagiti ruanganmo, daydiay narugit ken daydiay nadalus a sangsangkamaysa,+ kas iti gasela ken kas iti kalakian nga ugsa.+
23 Isuna laeng ta dika kanen ti darana.+ Rebbeng nga iparukpokmo dayta iti daga a kasla danum.+
