2 Samuel 15:1-37
15 Ket naaramid a simmaruno kadagita a banag nagpaaramid ni Absalom iti karuahe nga agpaay kenkuana, nga addaan kabkabalio ken addaan limapulo a lallaki nga agtaray iti sangona.+
2 Ket bimmangon a nasapa ni Absalom+ ket nagtakder iti igid ti dalan nga agturong iti ruangan.+ Ket naaramid a, no ti asinoman a tao addaan legal a kaso nga umayna paukom iti ari,+ iti kasta ayaban ni Absalom ket kunaenna: “Ania a siudad ti naggapuam?” ket kunaenna: “Naggapu ti adipenmo iti maysa kadagiti tribu ti Israel.”
3 Ket kunaen kenkuana ni Absalom: “Kitaem, naimbag ken nalinteg ti bambanagmo; ngem awan asinoman manipud iti ari ti mangdengngeg kenka.”+
4 Ket itultuloy a kunaen ni Absalom: “O no nadutokanak koma nga ukom iti daga,+ nga umay kaniak ti tunggal tao nga addaan legal a kaso wenno pannakaukom! Iti kasta sigurado nga aramidek kenkuana ti kinahustisia.”+
5 Napasamak met nga, idi immasideg ti maysa a tao tapno agruknoy kenkuana, inyunnatna ti imana ket ginammatanna+ ket inagkanna.
6 Ket inar-aramid ni Absalom ti kastoy a banag kadagiti amin nga Israelita nga umay paukom iti ari; ket intultuloy nga inagaw ni Absalom ti puso dagiti tattao ti Israel.+
7 Ket naaramid iti ngudo ti uppat a pulo a tawen a kinuna ni Absalom iti ari: “Palubosannak a mapan, pangngaasim, ket tungpalek idiay Hebron+ ti karik a sidadaeg nga inaramidko ken Jehova.+
8 Ta ti adipenmo nangaramid iti nadaeg a kari+ idi agnanaedak iti Gesur+ idiay Siria, a kinunak, ‘No di bumurong nga isublinakto ni Jehova idiay Jerusalem, mangipaayakto met iti panagserbi ken Jehova.’”+
9 Ngarud kinuna kenkuana ti ari: “Mapanka a sitatalna.”+ Gapuna timmakder ket napan idiay Hebron.
10 Nangibaon ita ni Absalom kadagiti agsimisim+ kadagiti amin a tribu ti Israel, a kunkunana: “Apaman a mangngegyo ti uni ti tangguyob, masapul met a kunaenyo, ‘Ni Absalom nagbalin nga ari+ idiay Hebron!’”+
11 Ita adda kimmuyog ken Absalom a dua gasut a lallaki manipud Jerusalem, a naayaban ken napan a di agat-atap,+ ket awan aniaman nga ammoda.
12 Kanayonanna, idi indatonna dagiti sakripisio, ni Absalom pinaayabanna ni Ahitofel+ a Gilonita,+ manangbalakad ni David,+ manipud iti siudadna a Gilo.+ Ket ti kumplot+ nagtultuloy a bimmileg nga ad-adda, ket dagiti tattao nagtultuloy a dimmakkel ti bilangda+ ken Absalom.
13 Idi agangay dimteng ken David ti maysa a manangipakaammo, a kunkunana: “Ti puso+ dagiti tattao ti Israel simmurot ken Absalom.”
14 Madagdagus a kinuna ni David kadagiti amin nga adipenna nga adda kenkuana idiay Jerusalem: “Tumakderkayo, ket agtalawtayo;+ ta saantayto a makalapsut gapu ken Absalom! Inkayo a sidadaras, ta amangan no isu agdardaras ket pudno a makamakamnatayo ket iyegna kadatayo ti dakes ket kabilenna ti siudad babaen ti tadem ti kampilan!”+
15 Gapu itoy dagiti adipen ti ari kinunada iti ari: “Maitunos iti isuamin a pilien ti apomi nga ari, adtoy dagiti adipenmo.”+
16 Gapuna rimmuar ti ari agraman ti intero a sangakabbalayanna a simmurot kenkuana,+ ket nangibati ti ari iti sangapulo a babbai, kamkamalala,+ a mangaywan iti balay.
17 Ket nagtultuloy a rimmuar ti ari agraman dagiti amin a tattao a simmurot kenkuana; ket nagsardengda idiay Bet-merac.
18 Ket amin dagiti adipenna bumalballasiwda idi iti sikiganna; ket amin dagiti Kereteo ken amin dagiti Peleteo+ ken amin dagiti Gitita,+ innem a gasut a tattao a simmurot kenkuana manipud Gat,+ bumalballasiwda idi iti sanguanan ti ari.
19 Kalpasanna ti ari kinunana ken Ittai+ a Gitita: “Apay koma a makikuyogka met kadakami? Agsublika+ ket makipagnaedka iti ari; ta ganggannaetka ken, malaksid iti dayta, destieroka manipud lugarmo.
20 Idi kalman a dimtengka ket ita nga aldaw pagallaallaenkanto+ kadi a maikuyog kadakami, a mapan no mapanak iti sadinoman a papanak? Agsublika ket ikuyogmo nga agsubli ti kakabsatmo, [ket watwaten koma ni Jehova maipaay kenka ti] naayat a kinamanangngaasi+ ken kinamapagpiaran!”+
21 Ngem simmungbat ni Ittai iti ari ket kinunana: “Kas sibibiag ni Jehova ken kas sibibiag ti apok nga ari,+ iti disso nga ayanto ti apok nga ari, uray no agpaay ken patay wenno agpaay iti biag, sadiay ti ayanto ti adipenmo!”+
22 Iti kasta ni David kinunana ken Ittai:+ “Inka ket bumallasiwka.” Gapuna bimmallasiw ni Ittai a Gitita, ken kasta met dagiti amin a tattaona ken amin dagiti ubbing a naikuyog kenkuana.
23 Ket dagiti amin nga umili ti daga nagsangsangitda iti natbag a timek,+ ket bumalballasiw idi dagiti amin nga umili, ket sitatakder ti ari iti sibay ti naapres a ginget ti Kidron,+ ket dagiti amin nga umili bumalballasiwda idi iti nawayang a dalan nga agpalet-ang.
24 Ket adda met ditoy ni Sadok+ ket naikuyog kenkuana dagiti amin a Levita+ a siaawit+ iti lakasa+ ti tulag ti pudno a Dios; ket indissoda ti lakasa ti pudno a Dios iti sibay ni Abiatar+ agingga nga amin dagiti umili nalpasda a bimmallasiw manipud iti siudad.
25 Ngem ti ari kinunana ken Sadok: “Isublim idiay siudad+ ti lakasa+ ti pudno a Dios. No makasarakakto iti pabor kadagiti mata ni Jehova, sigurado nga isublinakto met ket ipakitana kaniak dayta ken ti disso a pagyananna.+
26 Ngem no daytoy ti sawenna, ‘Saanak a naragsakan kenka,’ adtoyak, aramidenna koma kaniak kas iti naimbag kadagiti matana.”+
27 Ket intultuloy a kunaen ti ari ken Sadok a padi: “Saan kadi a pumaparmataka?+ Agsublika a sitatalna iti siudad, ken kasta met ni Ahimaaz nga anakmo ken ni Jonatan+ nga anak ni Abiatar, ti dua nga annakyo, a maikuyog kadakayo.
28 Kitaenyo, agsarimadengak iti sibay dagiti pagballasiwan ti let-ang agingga a dumteng ti sasao manipud kadakayo tapno pakaammuandak.”+
29 Iti kasta da Sadok ken Abiatar insublida ti lakasa ti pudno a Dios idiay Jerusalem, ket nagtultuloyda a nagnaed sadiay.
30 Ket simmang-at ni David iti sasang-atan dagiti Olibo,+ nga agsangsangit bayat a sumangsang-at, a siaabbong ti ulona;+ ket nagna a sakasaka, ket amin dagiti umili a naikuyog kenkuana inabbonganda tunggal maysa ti ulona, ket simmang-atda nga agsangsangit bayat a sumangsang-atda.+
31 Ket ti damag naidanon ken David, a naikuna: “Ni met laeng Ahitofel adda kadagidiay makikumkumplot+ ken Absalom.”+ Gapu itoy kinuna ni David:+ “Pagbalinem, pangngaasim, a kinamaag ti pammatigmaan ni Ahitofel,+ O Jehova!”+
32 Ket naaramid nga idi nakagteng ni David iti tapaw a pagrukruknoyan idi dagiti tattao iti Dios, adtoy a sumabet kenkuana ni Husai+ nga Arquita,+ a naray-ab ti nagayad a pagan-anayna ken narugit ti rabaw ti ulona.+
33 Nupay kasta, kinuna kenkuana ni David: “No pudno a makipagballasiwka kaniak, sigurado ngarud nga agbalinka nga awit kaniak.+
34 Ngem no agsublika iti siudad ket pudno a kunaem ken Absalom, ‘Adipennak, O Ari. Maysaak idi nga adipen ni amam, siak a mismo iti daydi a tiempo, ngem ita siak a mismo adipennak,’+ mapaaymonto+ ngarud maipaay kaniak ti pammatigmaan ni Ahitofel.
35 Saan kadi a kaduam sadiay da Sadok ken Abiatar a papadi?+ Ket mapasamakto nga isuamin a mangngegmo manipud balay ti ari rebbeng nga ibagam kada Sadok ken Abiatar a papadi.+
36 Adtoy! Kaduada sadiay ti dua nga annakda, ni Ahimaaz+ nga anak ni Sadok ken ni Jonatan+ nga anak ni Abiatar; ket babaen kadakuada ipatulodyonto kaniak ti isuamin a mangngegyo.”
37 Gapuna ni Husai, kadua ni David,+ dimteng iti siudad. No maipapan ken Absalom,+ dimteng iti Jerusalem.
