Idi nag-lockdown dagiti pagbaludan iti United States gapu iti COVID-19 pandemic, ginasut a Saksi ni Jehova ti saanen a makabisita a regular kadagiti pagbaludan tapno mangtedda kadagiti literatura a naibatay iti Biblia ken mangyadal kadagiti balud. Gapu iti dayta, rinibu a balud ti saanen a makaaw-awat iti naespirituan a taraon. Ngem nangaramid dagiti kakabsat iti pamay-an tapno maitultuloyda a kasabaan dagiti balud bayat a sursurotenda dagiti safety protocol mainaig iti COVID-19.

Imbaga ni Brother Dan Houghton, a tumultulong a mangorganisar iti panangasaba kadagiti pagbaludan iti teritoria ti sangay ti U.S.: “Maseknankami kadagiti amin a mangur-uray kadakami tapno maparegtada iti naespirituan. Ad-adda a kasapulandakami ita.”

Kas pagarigan, kinontak ni Brother Micah Seierstad dagiti opisial ti pagbaludan idiay Vacaville, California, tapno dumawat iti pammalubos a mangipatulod kadagiti video ti programa ti JW Broadcasting. Nasdaaw ta imbaga dagiti opisial a mangipatulod kadagiti video a mabalin nga ibrodkas kadagiti 33 a pagbaludan iti estado ti California. Gapu iti dayta, ti programa ti 2020 a “Kanayon nga Agragsakkayo”! a Kombension ket nabingaybingay iti 28 a minuto ti kaatiddogna a video sa mamitlo iti kada aldaw a naipabuya kadagiti pagbaludan. Agarup 130,000 a balud ti nakabuya kadagita.

Kuna ni Brother Seierstad: “Nagsayaat a makita ti aramid ni Jehova. No adda kayatna a mapasamak, awan ti makalapped kenkuana!”

Naammuan dagiti kakabsat a dagiti opisial ti pagbaludan iti Sarasota County Jail idiay Florida ket agsapsapul iti “makaparegta a libro” para kadagiti balud tapno maliwliwada bayat ti lockdown. Imbaga dagiti kakabsat a mangtedda kadagiti Biblia ken publikasion a naibatay iti Biblia iti English ken Spanish. Immanamong iti dayta dagiti opisial. Nangyurnos pay dagiti kakabsat kadagiti panangyadal iti Biblia babaen ti videoconference. Insurat ti maysa a balud iti mangyad-adal kenkuana: “Padpadaanak ti panagadalta. Naparegtaak nga agbasa iti Biblia. Nagbaliwen ti panangmatmatko iti masanguanan.”

Maragsakankami ta ti pandemia wenno ti pagbaludan dida nalapdan ti naayat nga Amatayo a ni Jehova a mangipaay kadagiti naespirituan a kasapulan dagiti interesado.—Salmo 139:7-10.