Idi Hunio 7, 2022, inyetnag ti European Court of Human Rights (ECHR) ti nakapatpateg a desision a kontra iti Russia gapu iti panangidadanesna kadagiti Saksi ni Jehova. Indeklara ti ECHR a saan a nainkalintegan ti panangiparit ti Russia kadagiti Saksi ni Jehova idi 2017. Imbaga pay ti Korte a saan a legal ti panangiparitda kadagiti nayimprenta a publikasion ken iti jw.org. Naibilin iti Russia nga isardengna ti amin a madama a kaso kriminal kontra kadagiti kakabsattayo ken wayawayaannan dagiti kakabsat a nakabalud. Nabilin pay ti Russia nga isublina ti amin a nakompiskar a sanikua wenno agbayad iti 59,617,458 euro ($63,684,978 U.S.) kas danios kadagita. Nabilin ti Russia a bayadanna dagiti nagdarum iti 3,447,250 euro ($3,682,445 U.S.) kas danios.

Ti desision ket para iti 20 a kaso manipud 2010 agingga iti 2019, a pakairamanan ti nasurok a 1,400 a nagdarum—indibidual a Saksi ken legal a korporasion. Ngem saan la a kadagiti nagdarum ti pagaplikaran ti desision ti ECHR. Imbagana a ti Russia “masapul nga aramidenna ti amin a kasapulan tapno maisardeng ti amin a madama a kaso kriminal kontra kadagiti Saksi ni Jehova . . . ken wayawayaanna ti amin a Saksi ni Jehova a napaidaman iti wayawaya.” (Dakami ti nangitaliko.) Dayta a desision ti nangalangon iti tunggal maysa kadagiti kakabsat iti uneg ken ruar ti Russia. Napasingkedan ngarud nga isuda ket umili a managtulnog iti linteg a naidarum ken naibalud.

Iti intero a desision, saggaysa a sinungbatan ti ECHR dagiti awan nakaibatayanna a pammabasol ti Russia a dagiti kano aramid, patpatien, publikasion, ken website-tayo ket extremist. Kas pagarigan, kitaenyo ti sumagmamano a detalye manipud iti desision:

• Ar-aramid: Impaganetget ti ECHR a dagiti korte iti Russia “dida nangdakamat iti aniaman a sao wenno aramid dagiti nagdarum a mangipakita iti kinaranggas, gura, wenno diskriminasion iti sabsabali.” (§271)

• Pammati a dagiti Saksi ni Jehova ti pudno: “Ti natalna a panangkombinsir ti maysa iti sabsabali a nasaysayaat ti relihionna ken panangguyugoy kadakuada a pumanaw iti ‘ulbod a relihion’ sa makitipon iti ‘pudno a relihion’ ket legal a panangipakita iti kalintegan iti wayawaya ti relihion ken wayawaya nga agsao.” (§156)

• Panangyalison iti dara: “Ti panagkedked nga agpayalison iti dara ket panangipakita iti wayawaya nga agpili ti maysa a miembro ti komunidad. Ipakpakatna ti kalinteganna nga agaramid iti personal a desision maipapan iti salun-atna. Dayta ket ginarantisaran ti Convention ken ti linteg ti Russia.” (§165)

• Panagkedked gapu iti konsiensia: “Ti panagkedked nga agserbi iti militar gapu kadagiti narelihiosuan a patpatien dina labsingen ti aniaman a linteg ti Russia.” (§169)

• Dagiti publikasiontayo: “Dagiti aktibidad ken linaon dagiti publikasion dagiti nagdarum ket agparang a natalna ken maitunos iti prinsipioda a pananggura iti kinaranggas.” (§157)

• JW.ORG: Nakita ti Korte a saan nga extremist ti linaon ti jw.org. No saan a kayat dagiti autoridad ti dadduma nga impormasion iti website, inkalikagumda koma iti organisasion nga ikkatenda dagiti paset a saan a maitutop imbes nga iparitda ti intero a website. (§231 ken §232)

Ti desision krinitikarna unay dagiti autoridad ti Russia ken pinaneknekanna a nangidumdumada ken “saan a nasayaat ti intensionda.” (§187) Kas pagarigan, indetalye ti desision dagiti sumaganad a naduktalan ti Korte:

• “Ti inkapilitan a pannakapasardeng ti amin a narelihiosuan nga organisasion dagiti Saksi ni Jehova iti Russia ket saan laeng a basta panangyaplikar iti linteg no di ket ebidensia ti saan a panangpabus-oy dagiti autoridad ti Russia kadagiti narelihiosuan nga aktibidad dagiti Saksi ni Jehova tapno panawan dagiti Saksi ni Jehova ti pammatida ken malapdan ti sabsabali a makimiembro kadakuada.” (§254)

• Dagiti autoridad ti Russia impalubosda ti serioso a kamali a “panangbista,” kas koma iti inaramid ti Russian Supreme Court a nagbasar laeng kadagiti saan a patas a report dagiti eksperto a pinili dagiti polis ken prosekiutor imbes a basaenda a mismo dagiti publikasion. (§203)

• Ti linteg maipapan iti extremism ket naigagara a nalawa ken saan a nalawag ti linaonna tapno nalaklaka para kadagiti autoridad ti saan a patas a panangtrato kadagiti Saksi ni Jehova. (§272)

Saan a nalawag no ania ti agbalin nga epekto ti desision ti ECHR maipapan iti Russia. Nupay kasta, saantayo a manginanama kadagiti natauan nga autoridad. Imbes ketdi, “manginanamatayo ken Jehova” ta “isu ti katulongantayo ken kalasagtayo.”—Salmo 33:20.