Idi Hunio 14, 1947, simmanglad iti Manila ti nagluganan ti tallo a brother a da Lorenzo Alpiche, Earl Stewart, ken Victor White. Isuda ti kaunaan a Saksi a misionero a simmangpet iti Pilipinas. Kalpasan ti agarup makabulan, simmangpet ti maikapat a misionero a naggraduar iti Gilead a ni Brother Nick Skelparick.

Nasanay a naimbag dagitoy a brother ken nakasaganada nga agtrabaho. Di nagbayag, okupadodan a timmulong iti 2,400 nga agibumbunannag a mangaskasaba idin iti Pilipinas. Idi 1958, kalpasan laeng ti 11 a tawen, ngimmato ti average a bilang dagiti mangikaskasaba iti Pagarian iti dandani maminsangapulo nga immabut iti nasurok a 23,000. Ita, kalpasan ti 75 a tawen manipud idi simmangpet dagiti immuna a misionero, immabuten iti nasurok a 230,000 ti bilang dagiti agdaydayaw ken Jehova iti Pilipinas.

Saan a naiparparna ti isasangpet dagidiay a misionero. Awan pay dua a bulan sakbay a simmangpetda, manipud idi Marso 31 agingga iti Abril 2, 1947, ni Brother Nathan H. Knorr, a presidente idi ti Watch Tower Society, ket nagpalawag iti maysa a nakallalagip a kombension dagiti Saksi ni Jehova iti Manila. Impasigurado ni Brother Knorr kadagiti immatender nga addanto maipatulod iti pagilian a misionero a nasanay iti Gilead a tumulong iti pannakaorganisar manen ti trabaho a panangasaba kalpasan ti panangdadael ti Gubat Sangalubongan II.

Iti maudi nga aldaw ti kombension, 151 a baro a kakabsat ti nabautisaran idiay Manila Bay a nakarneban dagiti barko gapu iti gubat. Iti dayta met la nga aldaw, imparang ni Brother Knorr ti palawag publiko a natemaan iti “The Joy of All the People” iti 4,200 nga immatender. Bayat nga agpalpalawag, nai-broadcast dayta iti radio iti rinibu nga agdengdengngeg iti intero a pagilian. Da Brother Knorr ken Brother Milton Henschel, a naggapu met iti sangalubongan a hedkuarter, nangipaayda iti Nainkasuratan a pammaregta a tumulong kadagiti kakabsat nga agtultuloy a mangasaba iti organisado a pamay-an.

Maipapan iti aktibidad iti napalabas a 75 a tawen, kuna ni Brother Denton Hopkinson, nga agserserbin kas misionero iti Pilipinas manipud idi 1954: “Dakkel ti naitulong dagidiay nga immuna a misionero a simmangpet idi 1947 iti panangparegta ken panangorganisar kadagiti kongregasion ken panangisagana kadakuada iti dakkel a panagrang-ay.”

Agyamantayo unay iti nailangitan nga Amatayo a ni Jehova ta binendisionanna ti kinaregta ken kinagaget dagiti adipenna iti Pilipinas ken iti intero a lubong.—Isaias 60:22.