Ubi ki Defid kpa Golayat, Onu Sọl mu Defid du ch’agboji abogwu-wñ. Defid f’ogwu wewe du tak i mud’ẹnẹ k’eju ma nyọnyọ. Iko duu ki Defid doji kw’okogwu, abobulẹ adufu, ma achanẹ etido ma la ana keli kakini: ‘Sọl kpa amonẹ icham ny’ọgwọkọ icham ny’ọgwọkọ, ama Defid kpa amonẹ icham ny’ọgwọkọ icham ny’ọgwọkọ ugbo mẹgwa!’ E-lẹ jẹñwu Sọl chanẹ ech’ulaka Defid, i la atene ki mu du kpa.

Defid che meju en’umolo nyọnyọ. Ọjọ ka, alu ki Defid na n’umolo ñwu Sọl, Onu Sọl f’ọkwọ rọ ñwu, Defid muda hika ra tak ọkwọ lẹ la kpo tuny’ọdọ. Ubilẹ Sọl ñọ che ki kpa Defid iko wewe. Otitala-wñ, Defid ra le nya maja egbili.

Sọl k’abogwu ọne icham ny’ọgwọkọ ugbo mẹta atene Defid. Sọl w’ugbo ki  Defid kp’abo-wñ maja jọ ef’awo okwuta. Oñ ẹnẹ ka ef’abogwu Defid kọla nyu Defid eti kakini: ‘Ẹ f’uña nẹ k’ẹ di Sọl kpa mẹ.’ Taki Defid mu gwọ yẹẹ nya m’eti ukpo k’Onu Sọl nyi kọda. Sọl muda ma n. Ubilẹ, ẹdọ Defid chanẹ ekp’ọ abi kak i b’ojima m’onu ki Jihofa chi n. Defid jẹñwu abogwu-wñ ku ma che Sọl ẹñwu duu n. I d’omu nyatẹ ka ñwu Sọl kak i ma n’ibe ekpa Sọl, i ma f’u kpa mẹ todu i che n’uña ki kpa Sọl. Ẹ neju kaki Sọl aribe-wñ da lugbo Defid?

Ehee. Sọl ñọ na tene uña alu ki ale ki kpa Defid. Ọjọ ka Defid kpai Abishai ọmẹnyi-wñ gwọ le t’uru ugbo ki Sọl kpai abogwu-wñ jọ. Abna ki ch’agboji abogwu Sọl onugo la dachi alolu. Tak Abishai kakini: ‘Uña k’a nẹ dẹ! T’ọ nọ k’u mu du kpa.’ Oñ Defid dohi ñwu kakini: ‘Jihofa adu kpa kp’ọla-wñ, uwẹ ki m’ọkwọ-wñ manyu ọcha omi-wñ du k’a lo.’

Defid m’uwo ki mẹr’ọmọ tẹgwu tak i d’omu nyatẹ kakini: ‘Abna, ẹñwu chi k’ẹ ma d’ide onu wẹ n? Ugbo ọkwọ Sọl kpai ọcha omi-wñ dẹ?’ Sọl f’omukọla Defid mejuma, tak i kakini: ‘Ẹ che n’uña k’ẹ du mi kpa, ama ẹ muda kọ edu mi kpa. U che ma kak uwẹ ach’onu Israẹl ubi mi.’ Oñ Sọl mu dabi t’unyi-wñ. I muda ch’ọgbọ abo unyi Sọl ach’ulaka Defid n.