Abo Ijipt jẹñwu abo Israẹl ku ma mu d’adu kp’atiti. Jihofa kpẹ Mosis kpai Erọn uchẹ t’ugbo Fero kakini: ‘Jẹñwu abo mi ki lo ku ma neke dojikanẹ ñwu mi ef’ajẹtachi.’ Fero muda ahi-ika ne, owñ i dohi kakini: ‘Ukwula ñwu ẹñwu ki Jihofa aka n, u la ajẹñwu abo Israẹl ki lo n.’ Ubilẹ, Fero ñọ dọmọ ad’ukọlọ ukpahiu ñwu abo Israẹl che kpọ. Jihofa ayna kọ Fero ọla. Ẹ che m’alu ki ana che le? I m’Atulubọ Mẹgwa du n’oji abo Ijipt. Jihofa ka ñwu Mosis kakini: ‘Fero kọ eneti ru mi. Odudu, i alo t’Aji Nayẹl. Lo t’ugbo-wñ k’ẹ ka ñwu kakini, todu ki ma jẹñwu abo mi ku ma lo n, omi aji Nayẹl anya rida t’ẹbiẹ.’ Taki Mosis le t’ugbo Fero. Fero li alu ki Erọn ad’ọkpa gw’omi lẹ, omi aji lẹ la mu rida t’ẹbiẹ. Omi aji lẹ la ch’anẹ elu, amẹja ef’omi lẹ la lekwu, Omi ẹfẹ ku ma añmọ la def’aji Nayẹl gẹ n. Tabalẹ, Fẹro f’ẹdọ-wñ nọ kpọ i la jẹñwu abo Israẹl ku ma lo n.

 Ubi ọjọ ẹkebie-wñ, Jihofa dabi kpẹ Mosis uchẹ ru Fero kakini: ‘Ichẹñwu k’ẹ ma jẹñwu abo mi ku ma lo n, Ijipt chakaa akọ ñwu am’ọbana.’ Erọn m’ọkpa-wñ du ny’atẹ, am’ọbana la chanẹ ekpẹkọ ojanẹ ijipt. Amonẹ chanẹ eli am’ọbana ef’unyi ma, oj’atẹ ma, kpai ef’amugba ma. Am’ọbana la tinyọ tẹ ugbo duu! Fero jẹñwu Mosis ki ch’ologwu bọ Jihofa ki d’atulubọ lẹ w’ukpoji. Fero gbalutanẹ kak i ajẹñwu abo Israẹl ku ma lo. Abẹlẹ Jihofa m’ọwọ du no atulubọ lẹ, abo Ijipt la chanẹ egba am’ọbana jọ efu ado ado ma. Ojanẹ ma chakaa la chanẹ elu. Ama, Fero kọ ejẹñwu ma lo kpọ.

Ubilẹ, Jihofa ka ñwu Mosis kakini: ‘Erọn ki m’ọkpa-wñ du gw’anẹ, k’ebutu ki mu rida t’ahima, abẹki achichi kẹkẹ ki al’onẹ.’ Ugbogbolo am’ahima m’ugbo du gba ny’ọwọ. Abo Fero ki bọ ka ñwu kakini: ‘Atulubọ ki dẹ-i ch’ugbo Ọjọ i kwo-i.’ Ama tabalẹ, Fero kọ ejẹñwu abo Israẹl ku ma lo.