Lọt dodo kpai Ebraham ki ch’ọmaye ata-wñ ojanẹ Kenan. Alu k’iko alo, Ebraham kpai Lọt chanẹ en’amẹwñọrẹ wewe w’iko k’uña ma b’uma jọ gẹ n. Ebraham ka ñwu Lọt kakini: ‘Agba, a neke dodo ugbo kate gẹ n. Mu daru b’umi tẹ. Ichẹñwu k’uwẹ m’ọwọ awohi du, omi alo t’ọwọ awotọ.’ Ẹñwu ki Ebraham che lẹ che nyọ?

Lọt li ugbo ọmẹmẹlẹ ka ki mẹru ojanẹ Sọdọm. Omi ofo k’amẹla-wñ neke ñmọ kpai egbe ku ma neke jẹ dọmọ nyọnyọ. Owñ Lọt tu k’owñ kp’abo akwọra unyi-wñ ki lo t’ọmọ.

Ọna k’abo Sọdọm kpai Gọmọra achẹñwu che biẹnẹ. I che biẹnẹ nyọnyọ ki jẹñwu Jihofa tu ki ko ma kpa rinyọ. Ama, Jihofa atene ki dide Lọt kp’abo akwọra unyi-wñ. Todulẹ, Jihofa kpẹ amonuchẹ-wñ meji ki d’ufeti ñwu ma. Ma ka ñwu ma kakini: ‘Hika! Kwanẹ ku mẹ kwef’ewo-i! Todu Jihofa anya kpa ma rinyọ.’

Ama, Lọt kw’ọmọ ẹrẹrẹ n. I dọmọ af’ẹrẹ anẹ. Todulẹ, am’onuchẹ lẹ gwọnyu ọwọ Lọt, ọya-wñ kpai amọma-wñ onobulẹ meji dufu kwefu ewo lẹ. Ma ka ñwu ma kakini: ‘Mẹ ra! Mẹ kw’emi todu ọlai mẹ, mẹ ki d’eju g’ubi n, todu ẹgba ku ma af’umẹ chilẹchẹ!’

Ẹgba ki Lọt lewa Zoar, Jihofa jẹñwu itolu kpai una ki lọ kw’ojale ab’ewo Sọdọm kpai Gọmọra ma. Ewo mejeji lẹ mu gwulọ kpakpo. Ọya Lọt muda gb’omu Jihofa n. I d’eju g’ubi, i la  mud’ugbudu omu dago! Ama Lọt kp’amọma-wñ mejeji deju todu ku ma gb’omu Jihofa gbọ. Ẹdọ Lọt kp’amọma-wñ kpabiẹ nyọnyọ alu k’iye-ma ma gb’omu Jihofa gbọ n. Ama, ẹdọ ma chẹ bọ alu ku ma netiru Jihofa ku ma gb’omu-wñ gbọ.