I n’ọjọ ka alu ki If kate gwugwu, ejo ka kọla ñwu. I kakini: ‘Ọgẹcha i che kaki Ọjọ ka ñwu mẹ ku mẹ ki jẹ ẹro oli duu ef’uchẹ-i n?’ Oñ If kakini: ‘A neke jẹ kwef ẹro oli duu. Amaa, ookate a ma neke jẹ kwefu-wñ ni. Ichẹñwu k’a jẹ kwefu ẹro oli lẹ, ekwu a akwu.’ Ejo lẹ ka ñwu kakini: ‘Mẹ nya kwu n. Todu ọjọ duu ku mẹ f’u jẹ, amẹ adabu Ọjọ.’ Ọgẹcha i che? Emi dẹ, i dabalẹ n. Ama, If jẹ kp’ọlemi k’ejo lẹ rọ. Alu ki If kp’ejuru ẹro oli lẹ na ago, abẹlẹ ẹro oli lẹ na anyọ eju-wñ nyọgba. I f’ẹro oli lẹ jẹ, i la ñọ du ñwu Adam ki jẹ. Adam che ma jali kaki ma akwu ichẹñwu ku ma kọ egb’omu Ọjọ gbọ. Ama, Adam f’ẹro oli lẹ jẹ kpọ.

Tak ọjọ lẹ kpoji, Jihofa kọla ñwu Adam kpai If. I n’uma ene ẹñwu ki chi ku ma kọ egb’omu-wñ gbọ. If kaki ejo lẹ d’owñ la-i, Adam ñọ kpi If abi gẹ. Todu ki Adam kpai If kọ egb’omu Ọjọ gbọ, Jihofa f’uma no kwef uchẹ Idẹn lẹ dufu. Jihofa du am’onuchẹ-wñ kpai ọgọ una ki dabu ọkwọchageli t’alugbọna uchẹ lẹ todu ku ma we dabi tefu-wñ.

Jihofa kakini owñ ad’ọbata ñw’ẹnẹ ki r’ọlemi ñwu If. I ch’onugo ejo lẹ kọla ñwu If n. Jihofa nyi ejo ki kọla n. Ebili ka jẹñwu ejo lẹ ki kọla-i. I ch’abalẹ todu ki neke du If la. Ebili lẹ che Setan, Abulumonẹ lẹ. Ejọgba, Jihofa anya du Setan kpa todu ki we k’amonẹ la.