Anẹ ọjọ ka Jisọs kp’amẹnukpuchẹ-wñ jọ dama, i la ka ñwu ma kakini: ‘Anẹ eñini-i, ọchakaa-mẹ ara b’umi tẹ.’ Pita kakini: ‘Ọda, i neke ch’omi n! Dagba k’ọchakaa-ma ki ra b’ẹ tẹ, omi ara b’uwẹ tẹ n.’ Amaa, Jisọs ka ñwu Pita kakini: ‘Tak aikọ ki kọ onu mẹta, ẹ kak’ẹ ma mi mama ta n.’

Ẹgba k’amisoja du Jisọs w’unyi Kayafas, amẹnukpuchẹ-wñ ra b’ọ tẹ. Amaa, eji ef’uma dọmọ at’ọ ubi ọnajiji ef’ọwọ amonẹ. Ẹnẹ ka efu ma che Pita. I t’ọ ubi gbogbo w’okolo unyi Kayafas ki ch’Agboji Amatama. Oñ i kpo gw’iba una todu k’afu akp’ọ. Alu ki gwugwu iba una lẹ, ọma onobulẹ adu ka f’u li, oñ i kakini: ‘U che m’ẹ! Uwẹ onugo cha t’ọ Jisọs ubi!’

Pita kakini: ‘Ehee, i ch’omi no! U m’ẹñwu k’ẹ kọla lugbo-wñ n!’ Oñ i chanẹ elo t’alakwu. Amaa, ọma onobulẹ adu omunẹ ñọ f’u li, oñ i kakini: ‘Ọnẹkẹlẹ-i onugo cha ti Jisọs ubi!’ Tak Pita dohi kakini: ‘U ma Jisọs mama ta n!’ Oñ ọnẹkẹlẹ ka kakini: ‘Ẹ ch’ẹnẹ ka efu ma gẹ! Alu k’ẹ kọla le du ña kak ẹnẹ Galili uwẹ onugo che dabu Jisọs.’ Amaa, Pita g’ẹbọ kakini: ‘U m’ẹnẹ k’ẹ ka-i n!’

Ẹrẹrẹ lẹ oñ aikọ kọ. Pita li alu ki Jisọs d’eju g’ubi ki g’eju-wñ. Oñ i rewa ọla ki Jisọs ka, tak i kpo dufu nya rakwu nana ef’ẹdẹkpabiẹ.

Abo Unyi Ajọ amiJu [Abo ọhiala] jọ dama ku ma tẹ Jisọs ene ef’unyi Kayafas. Ma chẹ kak’ama adu Jisọs kpa mẹ. Ma dọmọ atene ajọ ku ma aka ny’u, ma muda li ajọ duu n. Otitala-wñ, Kayafas tẹ Jisọs ene kakini: ‘Uwẹ ch’Ọma Ọjọ-i?’ Jisọs dohi ñwu kakini: ‘Omi lẹ dẹ.’ Oñ Kayafas kakini: ‘Ekwu ẹnẹ ijali kwu wa gẹ n. Ọjọ i b’ọ ina-i!’ Ọgbọ duu ma la jẹ dama kakini: ‘Ọnẹkẹlẹ-i dukpẹ ki kwu.’ Taku ma chanẹ ekọ Jisọs awo, ma t’itọ ny’ọla-wñ,  ma d’ẹñwu b’eju-wñ ma, ma ñọ r’ọkpọ do taku ma at’ọ ene kakini: ‘Ichẹñwu k’ẹ ch’akachẹ, ka ñwu wa ẹnẹ ki r’ọkpọ d’ẹ!’

Alu k’ọjọ mu ñwa, ma mu Jisọs du lo t’Unyi Ajọ amiJu lẹ taku ma dabi t’ọ ene kakini: ‘Uwẹ ch’Ọma Ọjọ-i?’ Jisọs dohi ñwu ma kakini: ‘Uwẹ ak’abalẹ-i.’ Todulẹ ma k’ajọ ny’u kak i ab’Ọjọ ina. Taku ma mu du le t’ugbo Pọntiọs Pailet ki ch’Igọbina k’abo Rom chi. Ẹñwu che anubi lẹ? K’a g’ẹñwu ki che.