Ubi ọdọ ọgbọmẹlu ugbo mẹlẹ [400] ku ma dabi n’ọdọ Jerusalẹm dago, atama ka dọmọ ki dodo amẹru Jerusalẹm k’odu-wñ kọ Zẹkaraya, odu ọya-wñ la kọ Elizabẹt. Ọdọ wewe chẹ lale ku ma n’ọla-ma mẹ, amaa ma n’ọma duu n. Ọjọ ka, onuchẹ Ọjọ ka k’odu-wñ kọ Gebriẹl wa dejudo Zẹkaraya alu ki agw’eñwu ichẹbọ ki akpo jo ef’unyi Ọjọ. Alu ki Zẹkaraya f’onuchẹ lẹ li, ailo f’u mu, oñ onuchẹ lẹ ka ñwu kakini: ‘Ẹ ki railo n. Inabali ọmẹmẹlẹ ki kwugbo Jihofa u nẹ wa-i. Elizabẹt ọya-wẹ anya bi ọma ọnẹkẹlẹ ñw’ẹ, oñ uwẹ ad’odu-wñ kọ Jọn. Jihofa fi Jọn chi todu ki ch’ukọlọ ogbogaga ka’. Zẹkaraya t’onuchẹ lẹ ene kakini: ‘Abu na le k’u na ma ki adabalu k’ẹ ka-i? Anagbo u che, ọya-mi la ch’ogijo gbali mẹ, abu a bi ọma le?’ Oñ onuchẹ lẹ ka ñwu kakini: ‘Ọjọ kpẹ mi k’u f’uchẹnyọ-i jẹ r’ẹ, amaa todu k’ẹ kọ ekẹdọn’ọla-mi ki awa chẹ ẹgba k’iko-wñ jọ, go uwẹ ach’ajalu, ẹ la aneke kọla n gbogbo w’iko ku ma af’ọma lẹ bi.’

Zẹkaraya kpọkpẹ ef’unyi Ọjọ, i la hika dufu n. Ubi ki dufu, abo ku ma jọ anede-wñ atene m’ẹñwu ki che kẹrẹb’ọ ef’unyi Ọjọ lẹ. Zẹkaraya na d’ọwọ kọla ñwu ma todu i neke chi alu kọla ñwu ma gẹ n. Todulẹ, abo ku ma anede-wñ ma k’anẹ-ego ka i li ef’Uña ki Afọ lẹ.

Ubi ki ma gbanẹ n, Elizabẹt f’efu nyọ, i la bi ọma ọnẹkẹlẹ ka dabalu k’onuchẹ Ọjọ lẹ ka. Abo k’owñ kp’ama dodo manyu amefu-wñ la wa dejudo ọma lẹ, ma la b’ọ yọ. Oñ Elizabẹt kakini: ‘Odu-wñ kọ Jọn.’ Oñ ma ka ñwu kakini: ‘I n’ẹnẹ duu ef’amefu-wẹ ki k’odu-i n. Mẹ d’ọ Zẹkaraya alu k’odu ata-wñ kọ.’ Amaa Zẹkaraya f’odu lẹ kọ tanẹ ñw ma kakini: ‘Odu-wñ kọ Jọn.’ Ẹrẹrẹ lẹ alu Zẹkaraya mu chi, Oñ i chanẹ ekọla! Amonẹ la n’ọla lẹ aka ugbo duu ojanẹ Judia, ma la na kpibe kakini: ‘Abu ọma kekele-i adẹ taa?’

Ubilẹ, Zẹkaraya chẹ kọ ñwu Afu Ki Afọ, oñ i kachẹ kakini: ‘Jihofa ki n’ele. Todu i gbalu ñwu Ebraham  kakini owñ achi ẹn’Ajadu ñwu wa todu ki gba wa tanẹ. Jọn ach’akachẹ, todu owñ at’ọgba Ondu alo ki f’ọna-wñ ñwọche.’

Ẹñwu ọmẹmẹlẹ omunẹ wa che ñwu efu Elizabẹt k’odu-wñ kọ Meri. A akọchẹ lugbo e-kide ef’ukọchẹ ki awa-i.