Elizabẹt n’efu ka k’odu-wñ kọ Meri, i la dodo ewo Galili ojanẹ Nazarẹt. Meri jẹ k’owñ anẹ Josẹf ki ach’ukọlọ ikapita. Ochu ẹkẹfa k’Elizabẹt ny’efu, onuchẹ Ọjọ ka k’odu-wñ kọ Gebriẹl wa dejudo meri. I ka ñwu kakini: ‘Agba-o Meri, uwẹ k’Ọjọ d’ẹnyọ ñwu.’ Meri kpo yaye ẹñwu ki ch’oji ugwa lẹ. Onuchẹ lẹ ka ñwu kakini: ‘Neti k’ẹ gbọ, uwẹ anya ny’efu, ẹ la abi ọma ọnẹkẹlẹ, tak uwẹ ad’odu-wñ kọ Jisọs. I la aj’Onu, Ojanẹ Ọfẹ-wñ la an’ukpoji n.’

Oñ Meri dohi ñwu kakini: ‘Amaa u m’ọnẹkẹlẹ mama ta n. Abile ki ajẹ che k’u na bi ọma?’ Oñ Gebriẹl ka ñwu kakini: ‘I n’ẹñwu duu ki ma jẹ che ñwu Ọjọ n. Afu ki Afọ awa b’ẹ ma, oñ ẹ bi ọma ọnẹkẹlẹ. Elizabẹt efu-wẹ onugo la ñọ f’efu nyọ mẹ.’ Taki Meri kakini: ‘Omi dẹ, adu Jihofa u che, i ki dabalu k’ẹ ka-i ñwu mi.’

 Meri kwanẹ, oñ i hika lo tef ewo Juda ka ki d’ojuwo todu ki li Elizabẹt. Ẹrẹrẹ ki Meri gw’Elizabẹt, ọma ki defu-wñ mu rọ kpu n’oji uyọ. Afu ki afọ f’Elizabẹt kpẹkọ, taki e-lẹ jẹñwu Elizabẹt kakini: ‘Meri, Jihofa che d’ẹñyọ ñw’ẹ mẹ. Ẹnẹ omi che k’iye Ondu-mi awa ki f’ejudo mi?.’ Oñ Meri ka ñwu kakini: ‘Na ajẹnyu ñwu Jihofa kp’ọgbọ ẹdọ-mi chakaa.’ Meri gwugwu kpai Elizabẹt ochu mẹta, ubilẹ i mu dabi t’unyi-wñ Nazarẹt.

Alu ki Josẹf gbọ kakini Meri f’efu nyọ, e-lẹ jẹñwu f’ibe kpẹ ki m’u du tinyọ yẹẹ ejubi. Amaa, onuchẹ Ọjọ ka lew’ugbo-wñ ef’ọna, oñ i ka ñwu kakini: ‘Ẹ ki railo edu Meri ch’ọya wẹ n, todu i n’ẹbiẹnẹ duu ki che n.’ Oñ Josẹf mu Meri du ch’ọya-wñ, i la mu du wef unyi-wñ.