1-2. Ẹlịyẹ ahị tị́ kụ ẹhị yẹ ẹ-ẹpwụ nya ang ọjẹ́jẹ ọkẹkpẹ? Ịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

 Ẹ-ẸPWỤ nya ang ọjẹ́jẹ ọkẹkpẹ, ahị kụ ẹhị yẹ ala ịhyẹ ịlẹ kahị ka jẹ́-ẹ kpa họ ụkụrwọ bwu ụpwụ nya Ala iLivayị egbeju 19. Ọ-chụ pwokwita, ẹ-ẹpwụ nya ọgba ọhata, iJihova byi ala Isirẹlụ nyori nyị ju ihi nya adaa bala ịnaa. Ahị ya ẹla u-uhye nya abwọlẹ ká ahị alẹ ka kpa ẹlẹwẹ họ ụkụrwọ bwula ọ-kpahị jwaa ẹ-ẹpwụ nya ang nya ugbinyịrọ, ang nya olegu, bala ọhụ o-jwaa ju. Ẹ-ẹpwụ-ẹpwụ nya ọgba ọwẹ, Ohe byi angịnyị nyamwụ nyị ka kpịtịya nya Ẹnụtụrụ Ọhịnyọ Lụkụrwọ. Ahị jẹ́ ang bwu ụwa nyori nanana nyori ehile ọwẹ á ji uhye nyahị alẹ kaka, ahị ka jẹ́-ẹ kpa itiwe nyamwụ họ ụkụrwọ bwula o-hu ụka nọ nyọka kpa họ ụkụrwọ nya iJihova ẹnụ myị́ ẹnụ. Bwula ọ-họ ịnyị, ahị ka mẹjẹ nyori ahị wẹẹ maga nyọka la ịgọgọ jaabwọ ká ụpwụ nya Ala iLivayị 19:2 bala 1 iPita 1:15 ya ahị nyị họ.

² Ẹ-ẹpwụ nya ang ọjẹ́jẹ ọlẹ, ahị ka kịnyaa la ọ-kụ ẹhị yẹ ẹla ịlẹ kahị ka jẹ́ bwu ụpwụ nya Ala iLivayị egbeju 19. Ịyẹ ẹla ịlẹpwụ nya egbeju ọwẹ à tị́ ka mẹjẹ́ẹhị u-uhye nya ọnahị ọhọhọ ẹ-ẹga nya angịlẹ ká ehe họ, ẹla ọ-họ ọnụ-ọnụ ẹ-ẹga nya ụkụrwọ, bala ọháha ọmẹjẹ ẹ-ẹga nya angịkịla? Ahị tịtọ nyọka la ịgọgọ jaabwọ ká Ohe nyahị la ịgọgọ lẹ, ahị kụ ẹhị yẹ ang ọlẹ kahị ka jẹ́ bwu ụwa wẹẹ.

3-4. Ányị ụpwụ nya Ala iLivayị 19:14 à tị́ ya ká ala Isirẹlụ ka họ ẹ-ẹga nya angị kpẹla bala angị kpidu?

³ Wa Ala iLivayị 19:14. IJihova tịtọ ká angịnyị nyamwụ ka họ ọnahị ẹ-ẹga nya angịlẹ ká ehe họ. Ọ-chụ pwokwita, o byi ala Isirẹlụ nyori nyị́ ka ga ọlọ ju ọngọ kpẹla ka. Ọlọ ọlịnyị ka ri uhi  ọ-chị ju ọngịnyị lee o-ya ẹla ọtịpyọ nyamwụ myị́. Ẹla ọlịịwẹ ọ-họ ẹ-ẹga nya ọngọ kpẹla tịpyọ kaka kpoye! Nyọlẹ kọ ka jẹ́-ẹ wo ẹla ọlẹ kị wẹẹ ya ka wẹẹ, ọ́ ka jẹ́-ẹ wẹ ka ịnyịnyị.

⁴ Ịnyịnyị, ẹ-ẹpwụ nya ọgba 14, Ohe byi angịnyị nyamwụ nyori nyị ‘ya ang da ị-ịlahị nya olidu kọ ka kịla ata ka.’ Ụpwụ ọhẹ ya ẹla u-uhye nya angịlẹ ká ehe họ yẹkẹẹ: “O-oye nya ẹga ká Isirẹlụ ji, angịnyị kaa họ angị ịlịịwẹ ẹla ọtịpyọ bala ọ-kpaa họ.” Ọhẹka ọngịnyị ọlẹ kọ la ọkịlẹtụ ọtịpyọ ka ya ang da ị-ịlahị nya olidu nyọka kịlọọ ata chajị kọ ka họ ịlọmwụ ang lee ọ-ka hụlọ ẹhụ jwọọ myị́. Ẹla ọlịịwẹ tịpyọ kaka kpoye! Bwula ehile ọlẹ ká iJihova da, ọ mẹjẹ angịnyị nyamwụ nyori ị baba nyọka la ahyẹẹrwẹrwa ẹ-ẹga nya angịlẹ ká ehe họ.

5. Ányị ahị tị́ ka bwu mẹ ahyẹẹrwẹrwa jẹ ẹ-ẹga nya angịlẹ ká ehe họ?

⁵ IJisọsị mẹ ahyẹẹrwẹrwa jẹ ẹ-ẹga nya angịlẹ ká ehe họ. Kpịtịya nya ẹrụ ọlẹ kọ du tọ ịJọn Ọngọ Hu Enyi Ohe yẹkẹẹ: “Alidu jẹ́ wẹẹ yẹ ọyị lẹ. [Ikuku] tị wẹẹ jẹdịyẹ lẹ. Alekpo tị wẹẹ la cheri-cheri lẹ. Angịkpịla tị jẹ́ wẹẹ wo ẹla lẹ. Egu tị jẹ́ wẹẹ wuleji bwula igu juwa hịhị myịmyị lẹ.” Nyọlẹ ká iJisọsị họ ụkụrwọ ẹbyẹbyị ịwẹ, ‘angịlẹ wuu kị juwa ụ-ụwa kị yẹ ụkụrwọ ẹbyẹbyị ọwẹ juwa gwogbo ha Ohe Oluhye ịnyịnyị.’ (Luk. 7:20-22; 18:43) Angịnyị nya ịKịrayịsị kaa tịtọ nyọka gbịla iJisọsị bwula ọ-mẹ ahyẹẹrwẹrwa jẹ ẹ-ẹga nya angịlẹ ká ehe họ. Lẹ ahị kaa họ ẹla me irya nya angị ịlịnyị. Ịlẹhị lẹ, iJihova á ya ọngịrị hahị nyọka họ ụkụrwọ ẹbyẹbyị lala iJisọsị ka. Ma ọ tị ri ihi ọtụka hahị nyọka ya ẹrụ ọnyịịla je angịkịla u-uhye nya ịparadayịsị, kọ ri ẹga ọlẹ ká angịnyị ka la ịlaa bwu ẹpwụ nya idu ọkpụkpụ nya ugbẹhị bala ịnya olegu. (Luk. 4:18) Ẹrụ ọnyịịla ọwẹ wẹẹ da iru nya angịnyị ụbwọ nyọka ya ogbo ha Ohe Oluhye lẹ.

6. Ányị ụpwụ nya Ala iLivayị 19 à tị́ dahị ụbwọ nyọka wo etu nya Ehile Iwo gụ́ olene?

⁶ Ịgba ịhyẹ bwu ụpwụ nya Ala iLivayị egbeju 19 da ẹla ịlẹ kị ya ẹ-ẹpwụ nya Ehile Iwo wụlẹ. Ọ-chụ pwokwita, ehile ọhaneku ya chwee yẹkẹẹ: “Ānụ yi oyi ka.” (Ehe. 20:15) Ọngịnyị ka ya myị́ nyori kori kọọwa nyị́ maga kọọwa nyị́ hu ang nya ọngọkịla kaka lẹ, ọwa  nyị kpa ehile ọwẹ lẹ. Ma, ọ tị ka yi oyi a-agbẹyị ịkịla myị́.

7. Ányị ọlọhị à tị́ ka bịrị ehile ọhaneku ọlẹ kọ ya ẹla u-uhye nya oyi oyiyi myị́?

⁷ Ọngịnyị ọlẹ kọ kaa da ọhị ka chị ọgọm nyori ọwa nyị́ hu ang nya ọngọkịla yi oyi ẹnẹhẹ lẹka myị́. Ma ọ kaa họ ẹla kpẹẹkpẹẹ ụka wuu ẹ-ẹpwụ nya ọhị ọdada nyamwụ? Jaabwọ kahị wa ụ-ụpwụ nya Ala iLivayị 19:35, 36, iJihova yẹkẹẹ: “Ānụ họ ọngịnyị ri bwula ọ-kpa ang ọ-jẹ́ ẹla me ịngịngịhyẹ ha ọngịnyị ka. Anụ ka kpa ang i-me ang ịlahịchịng me ang ha ọngịnyị.” Ọlọhị ọlẹ kọ kpa ang o-me ang ọ-jẹ́ ẹla me ang nyọka họ alihi nyamwụ ri aalẹ, oyi ọ wẹẹ yi bwu ẹga nyaa lẹ. Ịgba ịkịla bwu ụpwụ nya Ala iLivayị egbeju 19 họ ká ẹla ọwẹ la gede-gede.

8. Ányị ẹla ọlụpwụ nya Ala iLivayị 19:11-13 à tị́ da ala iJuu ụbwọ nyọka wo etu nya Ehile ọhaneku? Ịyẹ ọọwa tị́ ka dahị ụbwọ nyọka họ?

⁸ Wa Ala iLivayị 19:11-13. Ọmwụ ọdada nya Ala iLivayị 19:11 yẹkẹẹ: “Ānụ yi oyi” ka. Ọgba 13 chụ oyi oyiyi kaka pwoku ọngịnyị ọ-họ ri ẹ-ẹpwụ nya ihi ọrara nyọlẹ kọ yẹkẹẹ: “Ā họ ọngịnyị ehe ọọnang ri” ka. Lẹ ọngịnyị ọ-họ ri ẹ-ẹpwụ nya ihi ọrara bala oyi oyiyi lee ọngịnyị o-nu ang la agbụrụ, da ori wu awụlẹ. Ehile ọhaneku hile oyi oyiyi ị-ịwẹ kwọnggọọ, ma ụpwụ nya Ala iLivayị tị dọọ wụlẹ ụ-ụgbẹyị ọlẹ kọ ka da ala iJuu ụbwọ nyọka jẹ́-ẹ kpa ẹla ọlụwa họ ụkụrwọ. Ahị ka yé apyobwuna bwula ọ-kụ irya u-uhye nya abwọlẹ ká iJihova yẹ ọngịnyị ọ-họ ri bala oyi oyiyi. Ahị ka tọ ịlọhị wo myị́ yẹkẹẹ: ‘Kori kam kụ irya u-uhye nya ẹla ọlụpwụ nya Ala iLivayị 19:11-13, m̀ kaa yẹ ịngịhyẹ ọlẹ kam baba nyọka nwụhọ ẹ-ẹpwụ nya ọhịhị nyam lee ẹ-ẹpwụ nya ụkụrwọ ọlẹ kam kaa họ?’

9. Ányị ehile ọlụpwụ nya Ala iLivayị 19:13 à tị́ da alụkụrwọ ụbwọ?

⁹ Ụpa ọkịla nya ẹla ọ-họ ọnụ-ọnụ tị juwa ká Ọngịnyị nya ịKịrayịsị ọlẹ kọ ye angịnyị nya ụkụrwọ ka me irya ju. Ocheju nya Ala iLivayị 19:13 yẹkẹẹ: “Ā wu uri nya ọlụkụrwọ nya ahyẹẹnụ ọlẹ ká diro kpa ụ-ụwa lodu gbe ụtụrụ koo.” Ụ-ụwa ọ-ọpyị nya Isirẹlụ, ụmụmẹ nya angịnyị kaa họ ụkụrwọ nya ẹrụ, ị tị kaa nwụ alụkụrwọ ịlẹ kị ye uri la ocheju nya ahyẹẹnụ ọlẹ kị họ ụkụrwọ. Uri nya ọlụkụrwọ o-wu kpa ka dudu kọ ka la okpoko ọlẹ kọ baba nyọka ya ang oriri ha ugbiyegu nyamwụ la ahyẹẹnụ ọwẹ ka. IJihova wụlẹ yẹkẹẹ: “O ri ọlẹbyahị lẹ, uri ọwẹ kẹnẹ-kẹnẹ ọ daku lẹlẹ.”​—Ehile. 24:14, 15; Mat. 20:8.

10. Ẹla oyina ahị tị́ ka jẹ́ bwu ụpwụ nya Ala iLivayị 19:13?

¹⁰ Alẹ iru nya alụkụrwọ kaa ye uri ụka ookpokpo lee ụka imiiye ẹ-ẹpwụ nya ọya, ọkọkọ nya ahyẹẹnụ ọnyị myị́ ọnyị. Ma itiwe nya ehile ọlụpwụ nya Ala iLivayị 19:13 tị ju apyobwuna daalẹ wẹẹ. Angịhye ịlẹ kị ye angịnyị nya ụkụrwọ kaa haa ri bwula ọ-nwaa uri weji kpoye nya abwọlẹ kọ chịla. Ị jẹ́ nyori alụkụrwọ ịwẹ nyị baba nya ụkụrwọ, lẹ ị ka kịnyaa la ụkụrwọ ọwẹ nanana nyori uri nyaa la pyịnyẹng. Ọwẹ lala ‘uri nya alụkụrwọ kị wẹẹ wụ kpa.’ O ri ọ-pyii ká ọngịnyị nya ịKịrayịsị ọlẹ ko ye angịnyị nya ụkụrwọ ka kpa ẹlẹwẹ i-irya. Ahị kụ ẹhị yẹ ẹla ọkịla ọlẹ kahị ka jẹ́ bwu ụpwụ nya Ala iLivayị egbeju 19 wẹẹ.

11-12. Ẹlịyẹ iJisọsị à tị́ chị chẹẹ nyọlẹ kọ ya ẹla bwu ụpwụ nya Ala iLivayị 19:17, 18?

¹¹ Ang ọlẹ ká Ohe tịtọ kahị ka họ á ba ọọ-ka cheji ba hi ọ-ka họ angịkịla ang ọtịpyọ kem ka. Ahị ka yẹ ẹlẹwẹ ẹ-ẹpwụ nya Ala iLivayị 19:17, 18. (Wọọ.) IJihova ya gbagbịla yẹkẹẹ: “Ọngịnyị ọọnang ka hán̄g lala ịlọng.” Ọngịnyị nya ịKịrayịsị baba nyọka họ ịnyị pyii kori ká ẹla nyamwụ á ka há Ohe aalẹ.

¹² IJisọsị mẹjẹ nyori ehile ọlụpwụ nya Ala  iLivayị 19:18 ọwẹ baba yẹẹyẹẹ. Ọla ịFarịsii ọhẹ tọ iJisọsị ịtọ wo yẹkẹẹ: “Ehile oyina kpangga lẹpwụ nya ehile nya Ohe Oluhye à tị́ ri ehile ọgụgụ wuu?” IJisọsị wẹ nyori ehile ọlẹ kọ ri “ọ-kụ ịlahị wuu bala ehile ọlẹ kọ baba kpá gụ ehile nya Ohe Oluhye ịkịla wuu” nyị ri ọ-ka la ọháha ẹ-ẹga nya iJihova la ọkịlẹtụ nyahị wuu, la ugbodu okpukpuru nyahị wuu, bala irya omeme nyahị wuu. Ọọwa lẹ iJisọsị à ya ẹla bwu ụpwụ nya Ala iLivayị 19:18 yẹkẹẹ: “Ehile oheeye ọọnamwụ ọlẹ kọ ba ọwẹ ba ẹ-ẹpwụ nya ịlahị ojiji a lẹẹ ịnyịnyị lẹ. Ọngịnyị ehe ọọnang ka háng nya ịlẹhị-ịlẹhị lala ịlọng.” (Mat. 22:35-40) Agbẹyị lụmẹ-lụmẹ ji kahị ka jẹ́-ẹ mẹ ọháha jẹ ẹ-ẹga nya angịkịla. Ahị ka jẹ́ agbẹyị ịhyẹ lẹpwụ nyaa bwu ụpwụ nya Ala iLivayị egbeju 19.

13. Ányị oja nya iJosẹfụ à tị́ ka dahị ụbwọ nyọka wo etu nya ẹla ọlụpwụ nya Ala iLivayị 19:18?

¹³ Ụgbẹyị ọhẹ ọlẹ kahị ka jẹ́-ẹ la ọháha ẹ-ẹga nya ọngịnyị ọọnahị ri ọ-ka kpa ẹla ọlụpwụ nya Ala iLivayị 19:18 họ ụkụrwọ. Ụwa yẹkẹẹ: “Ā họ kwiwa lee ọ-kpa ẹla ẹ-ẹpwụ . . . ka.” Iru nyahị ka jẹ́ angịhyẹ ịlẹ kị kaa kpa ẹla nya angịlẹ kị kaa họ ụkụrwọ lawụlẹ, alube-ụpwụ nyaa lee alugbiyegu nyaa ọ-ọkịlẹtụ ẹ-ẹpwụ nya ẹka lụme-lụmẹ! Kpịtịya nyori aanịna nya iJosẹfụ kpa ẹla nyamwụ ẹ-ẹpwụ, gbee kịị họọ ẹla ọtịpyọ chajị nya ẹtẹ ọbaba nyaa ọọwa. (Ọmwụ. 37:2-8, 25-28) Ma iJosẹfụ á tị kpaa la ụbwọ ọtịpyọ ka! Ụka kọ la ọngịrị nyọka wa aanamwụ uri ịnọ, ọ yaa ahyẹẹrwẹrwa. IJosẹfụ á kpa ẹla ẹ-ẹpwụ ka. Ọkọkọ nya ọọwa, ọ họ ẹla ọlẹ ká ụpwụ nya Ala iLivayị 19:18 ya ahị nyị ka họ pyii.​—Ọmwụ. 50:19-21.

14. Ịyẹ à tị́ mẹjẹ nyori ahị baba nyọka ju ihi ẹla ọlụpwụ nya Ala iLivayị 19:18 kịnyaa?

¹⁴ Angịnyị nya ịKịrayịsi ịlẹ kị tịtọ nyọka họ ẹla kpụ Ohe ịpyọ ka gbịla iJosẹfụ, kọ hịnyọhi ha aanamwụ ọkọkọ nyọka haa ẹla kwiwa. Ịnyị iJisọsị à ya ẹ-ẹpwụ nya abwọ ọrịrị ọlẹ kọ mẹjẹ́ẹhị lẹ. O juhị ọhụ nyori ahị nyị hịnyọhi ha angịlẹ kị họ ọhọbịrị baahị. (Mat. 6:9, 12) Ụ-ụgbẹyị ọlịnyị-ịnyị, ọlẹrụ ịPọlụ ju Angịnyị nya ịKịrayịsị aanamwụ irya yẹkẹẹ: “Anụ angị hám ha, anụ họ ọngọngọhẹ kwiwa nya ang onyobyi ọlẹ kọ họnụ kpong-kpong ka.” (Rom. 12:19) Ọ jwaa ọhụ myịmyị yẹkẹẹ:  “Kanụ juwa la ugbodu ojuju onyudiyo ẹ-ẹga nya awụlẹ mẹ. Ó ri ká angịhyẹ lẹpwụ nyanụ á họ ẹla o-hi awụlẹ ọnụ juwa aalẹ, anụ-ụ́ juwa la ọhịnyọhi hawụlẹ mẹ.” (Kol. 3:13) Itiwe nya ehile nya iJihova á kaa yẹda ka. Ahị ka ju ihi nya ẹla ọmẹjẹ ọlụpwụ nya Ala iLivayị 19:18 daalẹ wẹẹ.

15. Ọ-chụ pwokwita oyina à tị́ ka dahị ụbwọ nyọka hịnyọhi bala o-deeri hi ẹla ọlẹ kị họ wụụhị ẹjẹ?

¹⁵ Kụ ẹhị yẹ ọ-chụ pwokwita ọlẹ wẹẹ. Ahị ka jẹ́-ẹ chụ ịkẹjẹ-awụrụ kaka me abwọlẹ ká ang kaa kọ ọngịnyị ị-ịnyịrọ ọlam-ọlam. Ẹgẹhẹ ka pyẹ pyịnyẹng, ịkịla tị ka lụmẹ myị. Ọ-chụ pwokwita, ụka kahị ja nwụ ugo-ụkụchụ, ang ka kọhị pyịnyẹng myị́. Ọ kaa jụjụ yẹẹyẹẹ, ma ụka kọ nọ chẹẹ kọ myị lẹ, ọ́ kaa jụ́ụhị kaka. Ọ́ ka la ahyẹẹnụ ookpokpo lee imiiye kịlahị dọmwụ wẹ lẹ, ọhẹka áhị ka kpịtịya nya ẹga ọlẹ ká ang kọhị kpangga kaka. Ịnyịnyị-ịnyịnyị, ala ịhyẹ ịlẹ kị kaa họ wụụhị ẹjẹ á kaa la gbuu ka. Ọ-chụ pwokwita, oligu nyahị ọhẹ ka ya ẹla lee ọ-họ ẹla ọlẹ kọ ka wụụhị ẹjẹ myị́, ma ahị tị ka jẹ́-ẹ hịnyọhi họọ i-ijata. Ma ó ri ká ang á kọ ọngịnyị kẹpwụ, olutoji ka baba nyọka gọ́ọ bala ọ-ya abacha chọọ myị́. Kori kahị ja kpa ụbwọ tudoo ụka myị́ ụka, ọ́ ka myị̀ hyaa ka, ọọwa tị ka tịpyọ gụ́. Ịnyịnyị-ịnyịnyị ọ kaa la ụka ká ọngịnyị á wẹẹjẹ nya ẹla kpoye-kpoye lẹ. Ọhẹka ọ ka kịnyaa la ọ-kụ irya u-uhye nya abwọlẹ ká ẹla ọlẹ kị họọ wọọ ẹjẹ bala ọ-jwọọ kaka ba. Ma ó-ri ká ọngịnyị á kpa ẹla ẹ-ẹpwụ, ịlọmwụ ọ họ jụ lẹ. Lẹ ọ ka há gụ́ nyọka ju ihi nya ehile ọlụpwụ nya Ala iLivayị 19:18!

16. Jaabwọ ká ụpwụ nya Ala iLivayị 19:33, 34 ya, ányị iJihova à tị́ tịtọ ká ala Isirẹlụ ka kpa angga? Ẹlịyẹ ahị tị́ ka jẹ́ bwu ụwa?

¹⁶ Nyọlẹ ká iJihova byi ala Isirẹlụ nyị la ọháha ẹ-ẹga nya ọngịnyị ọọnaa lẹ, ọọwa á ri ị ka la ọháha ẹ-ẹga nya angịlẹ kị ri alẹpwụma nyaa kem ka. Ọ byaa nyị ka la ọháha ẹ-ẹga nya angga ịlẹ kị kụ balaa ịnyịnyị. Ẹlẹwẹ hyehe gede-gede ụ-ụpwụ nya Ala iLivayị 19:33, 34. (Wọọ.) IJihova tịtọ kị ka kpa ọngga lala ‘ọla Isirẹlụ ọọnaa’ bala ọ-ka ‘háa lala ịlaa.’ Ọ-chụ pwokwita, Ehile ya nyori ala Isirẹlụ nyị ka ya iwe da ha alẹbyahị, tụ́ angga nyọka dụmwọ ẹ-ẹrụ nyaa. (Liv. 19:9, 10) Angịnyị nya ịKịrayịsị ka jẹ́-ẹ kpa itiwe nya ehile ọlẹ ko ya nyị la ọháha ẹ-ẹga nya angga họ ụkụrwọ alẹ. (Luk. 10:30-37) Ụgbẹyị oyina tị́? Ụnọ ịmanyị tị́ nya angịnyị ji chị odehe ọnụ wuu kị mwụ kaka kụ ẹpwụma ịkịla, ọhẹka angịhyẹ nyaa tị ka kụ bang ba myị́. Ahị baba nyọka kpa alẹng, anyang, bala anjwo ịwẹ la ihi-ihi.

17-18. (a) Ẹlịyẹ ụpwụ nya Ala iLivayị 19:2 bala 1 iPita 1:15 à tị́ juhi ọhụ nyọka họ? (b) Ụkụrwọ o-ju apyobwuna oyina ọlẹrụ iPita à tị́ juhi ọhụ nyọka họ?

¹⁷ Ụpwụ nya Ala iLivayị 19:2 bala 1 iPita 1:15 byi angịnyị nya Ohe nyị ka la ịgọgọ. Ịgba ịkịla lụmẹ-lụmẹ bwu ụpwụ nya Ala iLivayị egbeju 19 ka dahị ụbwọ nyọka yẹ ang ọlẹ kahị ka họ chajị ká iJihova ka yehi myị. Ahị ya ẹla u-uhye nya ịgba ịhyẹ ịlẹ kị gu ẹnyị nya ang ịnyịịla ịlẹ kahị ka họ bala ang ịtịpyọ ịlẹ kahị ka yabwọ hi lẹ. * ỊBayịbụụ ọlẹ kị da la òja nya iGiriki mẹjẹ nyori iJihova tịtọ kahị ka kpa itiwe nya ehile ịwẹ họ ụkụrwọ ẹ-ẹpwụ nya ọhịhị nyahị wẹẹ. Ma ọlẹrụ iPita tị ya ẹlẹhẹ dọọ uhye.

¹⁸ Ahị ka ja gbịgba ha iJihova bala ọ-họ ang ịnyịịla ha angịnyị ụka myị́ ụka myị́. Ma, iPita tị ju Angịnyị nya ịKịrayịsị ọhụ nyọka họ ẹla ọkpọnchị ọhẹ kpangga. Ene ká iPita ka juhi ọhụ nyọka la ịgọgọ ẹ-ẹpwụ nya abwẹla nyahị wuu, o byihi yẹkẹẹ: “Nwụla ọkịlẹtụ nyang nọ gbe ụkụrwọ ọhọhọ mẹ.” (1 Pit. 1:13, 15, NW ) Ịyẹ à tị́ ri ụkụrwọ ọọwa? IPita ya nyori Angịnyị nya ịKịrayịsị ịlẹ ká Ohe ya ida wụ́ nyị ka ‘ya ụkụrwọ ẹbyẹbyị nya Ohe Oluhye Ọngọlẹ kọ gbaa kpehe bwu ẹpwụ nya ukpowu dodehe je angịnyị.’ (1 Pit. 2:9) Angịnyị nya ịKịrayịsị wuu alẹ tị la iwe nyọka họ ụkụrwọ o-ju apyobwuna ọwẹ, chajị ọ kaa da angịnyị ụbwọ gụ ang ọkịla ọhẹ-lọhẹ ọlẹ kahị kaa họ. O ri ihi ọtụka-ọtụka hahị ahị angịnyị ị-la ịgọgọ nya Ohe Oluhye nyọka ya ẹla nya Ohe ụka myị́ ụka bala ọ-mẹ ang jẹ la ila ọchịchị! (Mak. 13:10) Ụka kahị maga nya ịlẹhị-ịlẹhị nyọka kpa itiwe nya ehile ịlẹpwụ nya ụpwụ nya Ala iLivayị egbeju 19 họ ụkụrwọ, ahị wẹẹ mẹjẹ nyori Ohe bala angịnyị aanahị háahị. Ahị tị mẹjẹ ịnyịnyị nyori ahị tịtọ nyọka “la ịgọgọ” ẹ-ẹpwụ nya abwẹla nyahị wuu.