1-2. Ẹlịyẹ ahị tị́ baba nyọka kịnyaa la ọhọhọ ụka kahị hu enyi Ohe kpá?

 ÁNYỊ a tị́ kaa kpa ẹpwa nyang cheri-cheri hyaa-hyaa kaka ba? Ọhẹka à họ ịnyị yẹẹyẹẹ ene kaa mwụ kele. Ma kori ká hwabwọ la ọ-ka họ ịnyị kịlahị-ịlahị bẹẹ? Ọ ka chịrị myịmyị ahyaahị. Nyọka họ ká ẹpwa nyang ka kpẹhị nyii ụka wuu, à baba nyọka kpọọ cheri-cheri ụka myị́ ụka.

² Ahị baba nyọka kịnyaa la ọ-nwụ irya ọkụkụ bala abwẹla nyahị rịrị ịnyịnyị. O ri nyịlẹhị nyori ene kaahị hu enyi Ohe, ahị maga nyịlẹhị-ịlẹhị nyọka ya ọhịhị nyahị da chajị kahị ka “hụ́ ịlọhị cheri-cheri . . . bwu ẹpwụ nya ang myị́ ang ọlẹ kọ ka chị ugbinyịrọ nyahị ịrị lee ọ-chị olegu nyahị ịrị.” (2 Kọr. 7:1) Lẹẹlẹẹ, ahị baba nyọka kpa omyi ẹla nya ọlẹrụ ịPọlụ họ ụkụrwọ nyọka ‘kịnyaa la ọ-ka nwụ olegu ọlẹpwụ ọkịlẹtụ nyahị ma onyeewe.’ (Efe. 4:23) Ịyẹ tị́ du kahị baba nyọka kịnyaa la ọ-nwụ ịlọhị họ? Chajị abwẹla ịchịrị nya alodehe ọlẹ ka jẹ́-ẹ chị wuhi ahyaahị myị́ du kahị ka la cheri-cheri ị-ịlahị nya Ohe ka. Nyọka cheji ba hi ẹla ọlịịwẹ ọ-ka họ tahị bala ọ-ka la cheri-cheri ị-ịlahị nya Ohe, ahị baba nyọka wụla irya ọkụkụ, abwẹla nyahị, bala imyi nya ang ịlẹ kị kaa maahị ma yẹ ụka myị́ ụka.

3. Ịyẹ à tị́ ri etu nyọka la “irya nya ọhịhị onyeewe”? (Ala iRom 12:2)

³ Ịyẹ ahị tị́ ka họ nyọka la irya nya ọhịhị onyeewe, kọ ri ọ-ka nwụ irya ọkụkụ nyahị họ? (Wa Ala iRom 12:2.) Etu nya omyi ẹla nya iGiriki ọlẹ kị yẹda ka ri “irya nya ọhịhị onyeewe ọlala” wẹ ẹgẹwẹ ri ọ-ka “nwụ irya nyang họ.” Lẹ, ọọwa á ri ọ-ka họ ang ịnyịịla ịmanyị-ịmanyị ịịwẹ kem ka. Ma, o-ri opyii kahị ka  wụla ụma nya ọngịnyị ọlẹ kahị ri ẹ-ẹpwụ yẹ rige-rige, bala ọ-ka nwụhọ ẹ-ẹga kọ baba chajị kahị ka ju ihi nya ehile nya iJihova jaabwọ kahị ka jụ́ họ ba myị́. Áhị ka họ ịnyị ụka ookpokpo kem ka, ma kịnyaa kịlahị-ịlahị.

4. Ányị ahị tị́ ka cheji ba hi ọ-ka ya iwe da ká odehe ọlẹ ka yẹ irya ọkụkụ nyahị da?

⁴ Ụka kahị ka la kpẹẹkpẹẹ, ahị ka jẹ́-ẹ họ ẹla kpụ iJihova ịpyọ ẹ-ẹpwụ nya ang myị́ ang wuu. Ma lẹẹlẹẹ, ahị baba nyọka kịnyaa la ọ-họ ụkụrwọ yẹẹyẹẹ nyọka jẹ́-ẹ họ ẹla kpụ iJihova ịpyọ. Ụ-ụpwụ nya Ala iRom 12:2, ịPọlụ ya nyori ahị nyị baba nyọka nwụ irya nyahị me nyọka jẹ́ ang ọlẹ kọ ri irya nya Ohe. Ọkọkọ nyọka ya iwe da ha odehe ọtịpyọ ọlẹ kọ ka mehi lẹ, ahị baba nyọka wụla ịlọhị yẹ họhẹ-họhẹ nyọka jẹ́ jaabwọ ọlẹ kahị ya iwe da họ irya nya Ohe ọ-ka kpahị ụgbẹyị ọkọkọ nya odehe ọlẹ ẹ-ẹpwụ nya eje ọchịchị nyahị bala ang ịlẹ kahị kaa chị nọ ha ịlọhị.

5. Ányị ahị tị́ ka bwu wụla irya ọkụkụ nyahị yẹ ẹ-ẹga nya o-ju chwẹẹ nya ahyẹẹnụ nya iJihova? (Yẹ ifoto.)

⁵ Ọ-chụ pwokwita, iJihova tịtọ kahị ka “juwa kụ ọlọyị gbe ọwẹwẹ nya ẹnụtụrụ ọtụka nya Ohe Oluhye . . . giri-giri.” (2 Pit. 3:12) Tịlọng wo: ‘Ọhịhị nyam mẹjẹ nyori m̀ jẹ́ ká odehe onyobyi ọlẹ ja ka tayịreji lụka o-kpii? Eje ọchịchị nyam u-uhye nyọka ka ube-ụpwụ ọgbẹgbịlẹ bala ụkụrwọ ọlẹ kam kaa họ mẹjẹ nyori ịgba ọgbagba ha iJihova à baba ham gụ wuu ọ-ọhịhị lẹ? M̀ la ọmyịmyị nyori iJihova ka họ ịbaba nyam bala ugbiyegu nyam ham, lee m̀ tị́ kaa chị uko ụka myị́ ụka u-uhye nya ịbaba nya ugbinyịrọ?’ Ọ kaa kpụ iJihova ịpyọ yẹẹyẹẹ ụka kọ yẹhị juwa maga nyọka họ irya nyamwụ ẹ-ẹpwụ nya ang myị́ ang wuu.—Mat. 6:25-27, 33; Filip. 4:12, 13.

6. Ẹlịyẹ ahị tị́ baba nyọka kịnyaa la ọhọhọ?

⁶ Ahị baba nyọka wụla irya ọkụkụ nyahị yẹ ụka myị́ ụka bala ọ-nwụhọ ẹ-ẹga ọlẹ kọ baba.  ỊPọlụ byi Ala ịKọrịntị yẹkẹẹ: “Anụ wụla ọhịhị nya ịlọnụ yẹ yẹẹyẹẹ, . . . chajị kanụ ka jẹ́-ẹ jẹ́ datị ó-ri kaanụ ayịdang á juwa yụbwọ chị ọmyịmyị ọlala nyanụ kpa ụ-ụwa gogo pyịyọọ daalẹ wẹẹ. Anụ ma ịlọnụ yẹ yẹẹyẹẹ wẹẹ!” (2 Kọr. 13:5) Ọ-ka “yụbwọ chị ọmyịmyị ọlala . . . gogo” á ba ọọjịra-jịra nya Angịnyị nya ịKịrayịsị ọ-kaka bala ẹrụ ọnyịịla ọ-kpa pyẹ ịịwẹ kem ka. O gu abwọlẹ kahị kaa kụ irya, ang ịlẹ kị kaa háahị bala irya ọlẹ kahị kaa kpa họ ang ịnyịnyị. Lẹ ahị baba nyọka kịnyaa la ọ-nwụ irya nyahị họ bwula ọ-wa Omyi Ẹla nya Ohe, maga nyọka kụ irya lala ọwa bala ọ-họ ang myị́ ang ọlẹ kọ ka kpụ iJihova ịpyọ.—1 Kọr. 2:14-16.

7. Jaabwọ ká Ala Efesọsị 4:31, 32 mẹjẹ, ẹlịyẹ ahị tị́ baba nyọka họ myịmyị? Ịyẹ tị́ du kọ ka lujwo hahị myị́?

⁷ Wa Ala Efesọsị 4:31, 32. Datị hi ọ-ka nwụ irya ọkụkụ nyahị họ, ahị baba nyọka “hu ọhịhị onyeewe nya Ohe Oluhye dakụrụ.” (Efe. 4:24) Ọ-họ ịnyị ju aga ọmama ẹ-ẹpwụ. Ọ-chụ pwokwita nya abwẹla ịtịpyọ ịhyẹ ịlẹ kahị baba nyọka tụụbwọ hi pyii ri ọkịlẹtụ ujujwo ọlala, agbama ojuju, bala ịkẹjẹ-awụrụ ọwụwụ. Ịyẹ à tị́ ka du kọ ka lujwo hahị? Chajị abwẹla ịtịpyọ ịhyẹ ri ịlẹ kị da ụtẹ yeji yẹẹyẹẹ ẹ-ẹpwụ nya ọkịlẹtụ nya ọngịnyị. Ọ-chụ pwokwita, ịBayịbụụ ya nyori angịhyẹ nyị ri ‘alagbama.’ (Etu 29:22) Ọngịnyị ọlẹ kọ la abwẹla ụma ọlịịwe baba nyọka kịnyaa la ọ-maga nyọka yẹda, kori kọ dọmwụ hu enyi Ohe kpá, jaabwọ ká oja nya ọọnahị ọlẹ kahị wẹẹ ka kụ ẹhị yẹ mẹjẹ.

8-9. Ányị oja nya Stephen à tị́ mẹjẹ nyori ahị baba nyọka kịnyaa la ọ-maga nyọka tụụbwọ hi abwẹla inyogo?

⁸ Ọọnahị ọhẹ ká ẹnyị nyamwụ ri Stephen la akama ẹ-ẹga nya agbama o-wu kpa. Ọ yẹkẹẹ: “Nyọlẹ kam dọmwụ hu enyi Ohe kpá, m̀ kaa kịnyaa la ọ-maga nyọka wu agbama nyam kpa. Ọ-chụ pwokwita, ụka ọhẹ ọlẹ kahị juwa ya ẹla nya Ohe bwu ẹpwa ka ẹpwa, m̀ ku oloyi ọhẹ ọlẹ kọ hu irediyo ọla omoto nyam yoyi chàchaachà. Nyọlẹ kọ yẹ nyori m̀ jwoo chwẹẹ lẹ, ọ pehi irediyo ọọwa deeji lẹ, ọ rụnyẹ rụ lẹlẹ. Ụka kam tịrọnụ nya ẹla ọọwa je angịkịla jaabwọ kam bwu ye irediyo nyam tịrẹkpẹ, ọngọgbahị nya ọjịra-jịra ọhẹ tọm wo yẹkẹẹ, ‘Stephen, ányị a tị́ ka họ ịnọọ kori ká woo?’ Ịtọ ẹla ọwẹ du kam kụ irya bala o-gum gbịla nyọka kịnyaa la ọ-maga nyọka ri ọngịnyị nya okpunyi.” b

⁹ Oja nya Stephen ọwẹ mẹjẹ́ẹhị nyori ahị ka mẹ abwẹla ọtịpyọ ọhẹ jẹ la ọ-yahị me ka myị́, ụka ọlẹ kahị dọmwụ me irya kpá nyori ahị tụụbwọ hi abwẹla ọọwa lẹ. Kori ká ẹla ọlịnyị á họ tang, ọkịlẹtụ a kpụng enyi ka, à tị me nyori à ri ọngịnyị ọtịpyọ lẹ ka. Ọlẹrụ ịPọlụ dọmwụ myị ọnụ yẹkẹẹ: ‘Ụka myị́ ụka kam juwa tịtọ nyọka họ ang ọnyịịla, ang onyobyi ọhọhọ mwọọgịlẹ kaa hu gẹgịlẹ ị-ịlahị nyam dachichi.’ (Rom. 7:21-23) Angịnyị nya ịKịrayịsị ị-la kpẹẹkpẹẹ ka wuu la abwẹla ịtịpyọ ịlẹ kị kaa maga nyọka tịrẹkpẹ lala ekuruwa bala ajeyi ịlẹ ki kaa chị ẹpwa nyahị ịrị. Ahị baba nyọka kịnyaa ja maga nyọka la cheri-cheri. Ányị ahị tị́ ka bwu họ ịnyị?

10. Ányị ahị tị́ ka bwu ma uya tọ abwẹla ịtịpyọ? (1 ịJọn 5:14, 15)

¹⁰ Raabwọ ha iJihova u-uhye nya abwẹla ọtịpyọ ọlẹ ká wẹẹ maga nyọka tụhi, lahị ọdahile nyori ọ-ka wo bala ọ-dang ụbwọ. (Wa 1 ịJọn 5:14, 15.) IJihova-á ka họ ụkụrwọ ẹbyẹbyị nyọka gba abwẹla ọtịpyọ ọọwa hing ka, ma ọ ka jẹ́-ẹ ya ọngịrị hang chajị ká ka họ abwẹla ọọwa ka. (1 Pit. 5:10) Lẹẹlẹ,  họ ụkụrwọ ba abwọ ọrịrị nyang jẹ bwula ọ-hwabwọ la ọ-ka ha ang ịlẹ kị ka kpa abwẹla inyogo ịịwa tịrẹkpẹ. Ọ-chụ pwokwita, dụmwọ-dụmwọ la ọ-ka yẹ ifim, iprogram, lee ọ-wa apwụ nya oja ịlẹ kị ka họ ká abwẹla ịtịpyọ ịlẹ ká wẹẹ maga nyọka tụhi ka lala ang ọnyịịla. À tị myị ká irya nyang a nọ u-uhye nya ang ịtịpyọ ka.—Filip. 4:8; Kol. 3:2.

11. Ịyẹ ahị tị́ ka họ nyọka kịnyaa la o-hu abwụma nya ọhịhị onyeewe dakụrụ?

¹¹ Nanana nyori à nyẹ ụhụ la ọngịnyị onyogo ọlẹpwụ nyang deeji lẹ, ọ baba ká ka hu abwụma nya ọhịhị onyeewe dakụrụ. Ányị a tị́ ka bwu họ ịnyị? Maga nyọka gbịla iJihova jaabwọ ká wẹẹ jẹ́ ang u-uhye nya abwụma nyamwụ. (Efe. 5:1, 2) Ọ-chụ pwokwita, ụka ká wa oja ọhẹ bwu ịBayịbụụ ọlẹ kọ ya ẹla nya abwọlẹ ká iJihova hịnyọhi, tịlọng wo, ‘M̀ kaa hịnyọhi ha angịkịla?’ Ụka ká wa ẹla u-uhye nya abwọle ká iJihova mẹ ahyẹẹrwẹrwa jẹ ẹ-ẹga nya angịlẹ kị ji ẹpwụ nya ọbaba, tịlọng wo, ‘M̀ kaa la irya ọlịnyị-ịnyị ẹ-ẹga nya aanam alẹng bala anyang ịlẹ kị la ọbaba, bala ọ-mọọ jẹ?’ Kịnyaa la ọ-nwụ irya nyang họ bwula o-hu abwụma nya ọhịhị onyeewe dakụrụ, bala ọ-ju ugbodu jaabwọ ká wẹẹ họ ịnyị.

12. Ányị Stephen à tị́ wẹ ka yẹ nyori ịBayịbụụ la ọngịrị nyọka yẹ ọhịhị nya ọngịnyị da?

¹² Stephen, ọlẹ kahị ya ẹla nyamwụ ene-ene wẹ ka yẹ nyori ọ jẹ́ hu abwụma nya ọhịhị onyeewe dakụrụ dụmwọ-dụmwọ. O yẹkẹẹ: “Dọmwụ bwu ụka-ụka kam hu enyi Ohe, m̀ yẹ ịlọm ẹ-ẹpwụ nya iwe-ahụrụ lụmẹ-lụmẹ ịlẹ kam baba nya ịlọm o-wu kpa. M̀ jẹ́ ang nyọka rụ bwu ẹga nya angịlẹ kị juwa tịtọ nyọka hu agbama jum lee ọ-ka kpụ ẹla ọọwa ba ene kọ ka kpa oyomo-oyomo. Angịnyị lụmẹ-lụmẹ, tụ́ ahụ nyam, kaa mịla oja ham chajị nya abwọlẹ kam kaa mẹ ịlọm o-wu kpa jẹ ẹ-ẹpwụ nya iwe-ahụrụ ịwẹ. Ọ dọmwụ kaa lam am ẹbyẹbyị! Ḿ kaa ye ogbo chajị nya ọ-jẹ́ yẹ abwẹla nyam da ka. Ọkọkọ nyọọwa, m̀ kaa yọọ nya ang ẹjẹ́ẹ nyori ịBayịbụụ ka jẹ́-ẹ yẹ ọhịhị nya ọngịnyị da.”

13. Ịyẹ tị́ ka dahị ụbwọ nyọka la irya nya ang ọnyịịla ọhọhọ? (Ala ịGaletiya 5:16)

¹³ Wa Ala ịGaletiya 5:16. IJihova ya olegu ịgọgọ nyamwụ hahị nyọka dahị ụbwọ kụrụ uya ọmama nyọka họ ang ọnyịịla. Ụka kahị wa Omyi Ẹla nya Ohe, ahị wẹẹ ya iwe da ha olegu ịgọgọ nya Ohe nyọka kpahị ụgbẹyị. Ịnyịnyị ahị kaa ye olegu ịgọgọ ụka kahị ka ọjịra-jịra nyahị. Ọọjịra-jịra nyahị ịwẹ, ahị kaa bịrị ụka bala aanahị alẹng bala anyang ịlẹ kị kaa maga nyọka họ ang ọnyịịla lala ahị-ahị, ọọwa tị kaa ri ọhụ ojuju hahị. (Hib. 10:24, 25; 13:7) Ịnyịnyị, ụka kahị bịlẹ iJihova ẹ-ẹpwụ nya abwọ ọrịrị nyọka dahị ụbwọ tuhi abwẹla ịtịpyọ ịlẹ kahị la, ọ ka ya olegu ịgọgọ nyamwụ hahị ọlẹ kọ ka juhi ọngịrị nyọka kịnyaa la ọ-ma uya. Ịlẹhị lẹ, ọ-ha ang ịwẹ á ka du ká irya ịtịpyọ-ọ́ ka wẹ ọkịlẹtụ nyahị ka lẹ ka, ma ị ka dahị ụbwọ cheji ba hi ọ-ka hu irya ịịwa họ. Jaabwọ ká Ala ịGaletiya 5:16 ya, angịlẹ kị kaa ya ẹga da ha olegu ịgọgọ nyọka kpaa ụgbẹyị á “ka ri ọnyọhị nya imyi nya ang myị́ ang ịlẹ kị kaa ma ugbinyịrọ . . . ma kaka.”

14. Ịyẹ tị́ du kọ baba nyọka kịnyaa la ọ-la irya nya ang ọnyịịla ọhọhọ?

¹⁴ Ụka kahị dọmwụ nya ọ-họ ang ịlẹ kị ka dahị ụbwọ ri igu ọlam-ọlam bala iJihova, ahị baba nyọka kịnyaa ẹ-ẹpwụ nyaa bala ọ-ka la irya nya ang ọnyịịla ọhọhọ kịlahị-ịlahị. Ịyẹ tị́ du? Chajị oluji nyahị ọhẹ á nune kpong-kpong ka. Oluji ọọwa à ri ọmayẹ nyọka họ ang ọtịpyọ lẹ. Kori kahị dọmwụ hu enyi Ohe kpá, ahị ka yẹ ká imyi nya ang ịtịpyọ ịhọhọ ka juwa nwụhị wẹẹ, tụ́ ang lala ẹchị nya  okpoko ọdada, ere ọ-nwa kpoye, lee arụrụ nya angịnyị i-ji lọhị-lọhị ọyẹyẹ. (Efe. 5:3, 4) Ọọnahị ọlẹng ọhẹ yẹkẹẹ: “Ịngịhyẹ ọlẹ kọ lam ujwo nya ịlẹhị-ịlẹhị kam kaa ma uya ta ri irya nya alẹng-alẹng ọ-ka ẹga nya awụlẹ. M̀ me ká irya ọwẹ ka rụ kọ ka tịrẹkpẹ kaka, ma ọ kaa wẹ ọkịlẹtụ nyam wẹẹ.” Ịyẹ à tị́ ka dang ụbwọ kori ká imyi nyọka họ ang ọtịpyọ ọlẹpwụ nyang á la ọngịrị yẹẹyẹẹ?

15. Ịyẹ tị́ du kọ ri ọhụ ojuju nyọka jẹ́ nyori imyi nya ang ọtịpyọ ọhọhọ kaa wẹ chị “angịnyị nya Ohe Oluhye ịkịla” ọgụ ịnyịnyị? (Yẹ ifoto.)

¹⁵ Jaabwọ ká wẹẹ ma uya nyọka kụrụ imyi nya ang ọtịpyọ ọhọhọ ọlẹ kọ la ọngịrị yẹẹyẹẹ, jẹ́ nyori á la ụbwọọng ka. ỊBayịbụụ yẹkẹẹ: “Ọmayẹ nya ang onyobyi ọhọhọ ọhẹ-lọhẹ á ka jẹ́-ẹ wẹ chịnụ ọgụ, ọlẹ kọ lala ịnya angịnyị nya Ohe Oluhye ịkịla ka lẹ ka.” (1 Kọr. 10:13) Ị da omyi ẹla ọwẹ du ta Angịnyị nya ịKịrayịsị alẹng bala anyang ịla ịKọrịntị ịnyị. Angịhyẹ nyaa ri angị da ẹla-ahụ, alẹng-alẹng lee anyang-anyang ị-họ ụya tọ awụlẹ, bala angị kaa nwa ere juwa ya, ene kịị jẹ́ ẹlịlẹhị. (1 Kọr. 6:9-11) À me irya nyori nyọlẹ kị hu enyi Ohe kpá lẹ, ị́ ka la irya nya ang onyobyi ọhọhọ ọhe-lọhẹ ọlẹ kị kaa ma uya ta kaka? Ọ́ ka jẹ́-ẹ lịnyị ka. Ịwa wuu ri angịlẹ kị ya ida wụ́, ma ọngọngọhẹ nyaa á la kpẹẹkpẹẹ ka. Ịwẹẹ ọdada á juwa ka, ị kaa juwa ma uya ta imyi nya ang onyobyi ọhọhọ ụka ọhẹ bala ụka ọkịla. Ọwẹ chịla kọ ka ri ọhụ ojuju hahị. Ịyẹ tị́ du? Chajị ọọwa mẹjẹ nyori imyi nya ang onyobyi ọhọhọ ọhẹ-lọhẹ ọlẹ ká wẹẹ ma uya ta, ọngọhẹ jẹ́ kụrwọọ myị́ lẹ. Lẹ, à ka jẹ́-ẹ ‘godayị rịrị giri-giri ẹ-ẹpwụ nya ọmyịmyị. Chajị, akama ọyẹyẹ ọọwa á ba ẹ-ẹga nyang ụbwọọng kem ka. Ịnyịnyị-ịnyịnyị, angịnyị nya Ohe Oluhye ịkịla a wẹẹ yẹ akama ẹ-ẹga myị́ ẹga wuu lẹ.’—1 Pit. 5:9.

16. Akama oyina ahị tị́ ka cheji ba hi? Ịyẹ tị́ du?

¹⁶ Hwabwọ la ọ-ka kụ irya nyori ọngọngọhẹ nyị́ ka jẹ́-ẹ jẹ́ akama ọlẹ ká wẹẹ chịpwụrụ bwu ka. Ọ-kụ irya ụ-ụgbẹyị ọlịịwẹ ka du ká ka yẹ ịlọng lala olinyiribyi bala o-ri á la ọngịrị nwà  nyọka nyẹẹkpẹ da imyi nya ang ịtịpyọ ọhọhọ ka. Ma ịBayịbụụ tị yẹkẹẹ: ‘Ohe Oluhye ri ọngọ chịla o-hu ọkịlẹtụ ha lụmẹ lẹ, ọ́ ka myị-ị ya ẹga da ha ụma nya ọmayẹ ọ-ka kịlaanụ kịla ọ-ka wẹ chịnụ ọgụ ka. Ma, ụka nya ọmayẹ ọlịnyị wuu, Ohe Oluhye ka ya ọngịrị nyamwụ bala ugbodu ojuju hanụ bala ọ-ka mẹ ụgbẹyị ọlẹ kanụ ka jẹ́-ẹ bwu be hi ọmayẹ ọọwa jẹẹnụ ịnyịnyị.’ (1 Kọr. 10:13) Lẹẹlẹ, kori ká imyi nya ang ọtịpyọ ọhọhọ ọlẹpwụ nyahị á dọmwụ la ọngịrị yẹẹyẹẹ wẹwẹ, ahị ka jẹ́-ẹ godayị giri ha iJihova. Bwula ụbwọ ọdada nyamwụ, ahị ka jẹ́-ẹ cheji ba hi ọ-ka hu irya ịịwa họ.

17. Nanana nyori áhị ka jẹ́-ẹ hu imyi nya ang ịtịpyọ ọhọhọ abwọ la ọ-ka wẹ ẹpwụ nyahị ka, ịyẹ ahị tị́ ka jẹ́-ẹ họ myị́?

¹⁷ Aa kpịtịya nya ẹla ọlẹ ụka wuu: Chajị nyọlẹ kahị la kpẹẹkpẹẹ ka lẹ, áhị ka jẹ́-ẹ hu imyi nya ang ịtịpyọ ọhọhọ abwọ la ọ-ka wẹ ẹpwụ nyahị ka. Ma ụka kị wẹ, ahị ka jẹ́-ẹ nyẹẹkpẹ daa ahyaahị jaabwọ ká iJosẹfụ họ ụka kọ rụnyẹ rụ hi ahụ nya ịPọtịfa la ọbịrị ụka ka. (Ọmwụ. 39:12) Á baba nyọka họ ẹla ba imyi nya ang ịtịpyọ ịlẹ kị wẹ ẹpwụ nyang jẹ ka!

18-19. Ịtọ ẹla iyina ahị tị́ ka jẹ́-ẹ tọ ịlọhị jaabwọ kahị wẹẹ maga nyọka nwụ irya nyahị họ?

¹⁸ Irya nyahị ọ-nwụ họ ri ọ-ka kịnyaa ja maga ká irya ọkụkụ bala abwẹla nyahị ka pwoku irya nya iJihova. Nyọka jẹ́-ẹ họ ịnyị, ahị baba nyọka wụla ịlọhị yẹ bala ọ-tọ ịlọhị wo: ‘M̀ kaa họ ẹla ụ-ụgbẹyị ọlẹ kọ mẹjẹ nyori ocheju nya odehe ọlẹ ju chwẹẹ lụmẹ lẹ? M̀ kaa maga ẹ-ẹpwụ nyọka hu abwụma nya ọhịhị onyeewe dakụrụ? M̀ kaa ya iwe da ha olegu ịgọgọ nya iJihova nyọka kpam ụgbẹyị ọ-ọhịhị nyam chajị kam ka họ ẹla ba imyi nya ang ịtịpyọ ịlẹ kị wẹ ẹpwụ nyam jẹ ka?’

¹⁹ Jaabwọ ká wẹẹ wụla ịlọng yẹ, a yẹhị rịrị ọ-ka jẹ́-ẹ họ kpẹẹkpẹẹ ka, ma a-abwọlẹ ká wẹẹ nwà kịlahị. Kori ká yẹ nyori à baba nyọka nwụhọ ẹ-ẹga ịhyẹ, ọkịlẹtụ a kpụng enyi ka. Ọkọkọ nyọọwa, kpa ẹla ọlụpwụ nya Ala iFilipayị 3:16, NW họ ụkụrwọ. Ụwa yẹkẹẹ: “Jaabwọ myị́ abwọ kahị nwà kịlahị kaka ba lẹ, ahị kịnyaa la ọ-jẹdịyẹ ụ-ụgbẹyị ọwọwa mẹ.” Kori ká họ ịnyị, jẹ́ myị̀myị̀ nyori iJihova ka wahị kụrụ aga ọmama nyang nyọka kịnyaa la ọ-nwụ irya nyang họ.