1-2. Akama iyina à tị́ ka du ká ịMakị bala iTimoti ka tịtọ nyọka họ ụkụrwọ gụ ọọwa ka ịnọ?

 AANAHỊ ikolobya, anụ tịtọ nyọka họ ụkụrwọ ha iJihova gụ ọọwa bala ọ-ka da aanahị ịlọjịra-jịra ụbwọ gụ olene-ene? Ọ la gbagbịla nyori ọọwa háanụ. Ọ kpụhị ịpyọ yẹẹyẹẹ nyọka yẹ iru nya ikolobya ịlẹ kị nwụlanọ nyọka họ ụkụrwọ ha angịkịla! (Eje. 110:3) Ma, à ka la akama ịhyẹ myị́. À kaa juhi nyọka họ ụkụrwọ ha iJihova gụ ọọwa chajị nyori á jẹ́ jaabwọ ká ijuju ka la ka? À pwa la ọ-ka ye ụkụrwọ ọhẹ myị chajị nyori á dahịhile ịlọng nyọka jwọọ họ ka ẹnẹnẹhẹ lẹ? Kori kọ lịnyị aalẹ, á la ụbwọọng ka.

² Ọ la ịMakị bala iTimoti ị-ịwẹ ịnyịnyị. Ma, ị́ ya ẹga da uhi ojuju nya abwọlẹ ká ijuju ka la lee ọ-la ẹla ọjẹ́jẹ nwà lẹka, hwaa abwọ la ọ-ka họ ụkụrwọ ha iJihova gụ ọọwa ka. Ọ chịkpẹẹ myị́ nyori ịMakị juwa ẹ-ẹpwa ọnyịịla-ọnyịịla bala ịnamwụ ụka ká ọlẹrụ ịPọlụ bala ịBanabasị wụrọọ nyọka kpa ẹrụ ọnyịịla pyẹ balaa ka ẹga ịlụrụ-lụrụ. (Ụkụr. 12:12, 13, 25) Ma, ịMakị rụ hi ẹpwa nyamwụ chajị nyọka jẹ́-ẹ họ ụkụrwọ ha iJihova gụ ọọwa. Ọ rụ ka Antịyọkọ ụka nya ọgbanyẹ. Ba ọọwa ba, ọ ba ịPọlụ bala ịBanabasị jẹ ka ẹga ịlụrụ-ịlụrụ. (Ụkụr. 13:1-5) Ụ-ụgbẹyị ọlịnyị-ịnyị, ọ chịkpẹẹ nyori iTimoti juwa ẹ-ẹga nya adamwụ bala ịnamwụ ụka ká ịPọlụ wụrọọ nyọka kpa ẹrụ ọnyịịla pyẹ balọọ. ITimoti ri onjwo okolobya ụka ọwẹ wẹẹ, lẹ ọ chịkpẹẹ kọ ka lọọ myị́ lala o-ri, ọ́ la ẹla ọjẹ́jẹ nwà nyọka bajẹ bala ịPọlụ ka. (Kụ ẹhị yẹ 1 Ala ịKọrịntị 16:10, 11 bala 1 iTimoti 4:12.) Tị wẹẹ, ọ myọnụ nyọka ba ịPọlụ jẹ du kọ yé āhị ọwawa lụmẹ-lụmẹ ụka ohyẹẹkpẹ.—Ụkụr. 16:3-5.

3. (a) Ányị ahị tị họ kahị jẹ́ nyori ẹla nya ịMakị bala iTimoti myị ịPọlụ lẹhị? (2 iTimoti 4:6, 9, 11) (Yẹ ifoto ịnyịnyị.) (b) Ịtọ ẹla iyina ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

 ³ ỊMakị bala iTimoti jẹ́ jaabwọ kị ka bwu họ akụrwọ ịdatị-datị ẹ-ẹpwụ nya ọjịra-jịra bwu ụka kị ri anjwo ikolobya. Ẹla nyaa myị ịPọlụ lẹhị yẹẹyẹẹ dudu kọ du ẹrụ taa kị ka wẹ ka yọọ ụka ọlẹ kọ jẹ́ nyori ọ ja ka gbu lẹ. (Wa 2 iTimoti 4:6, 9, 11.) Abwẹla ịnyịịla iyina ịMakị bala iTimoti à tị́ la du ká ịPọlụ dahịhilaa bala ọ-la ọháha ẹ-ẹga nyaa pwụ ọlịịwẹ? Ányị aanahị ikolobya à tị́ ka bwu gbịla abwẹla nyaa? Ụgbẹyị oyina aanahị ikolobya à tị́ ka bwu yé apyobwuna bwu ẹla ọmẹjẹ ọnyịịla nya ịPọlụ alẹ?

GBỊLA ỊMAKỊ BWULA Ọ-NWỤLANỌ NYỌKA HỌ ỤKỤRWỌ

4-5. Ányị ịMakị à tị́ bwu mẹjẹ nyori ọ nwụlanọ nyọka họ ụkụrwọ ha angịkịla?

⁴ Ụkụrwọ ọ-họ ha angịkịla ri ọ-ka maga nyịlẹhị-ịlẹhị nyọka daa ụbwọ bala ọ-kịnyaa la ụbwọ ọdada ọọwa ụka kọ dọmwụ lujwo wẹwẹ. ỊMakị ya ọgụ-ẹpẹtẹ ọnyịịla deeji ụ-ụgbẹyị ọlịịwẹ. Ọ tị ịMakị olujwo bala ọ-jwọọ yẹẹyẹẹ nyọlẹ ká ịPọlụ á myọnụ nyọka kpọọ ba ịlọmwụ la ogu-ediye nya ẹrụ ọnyịịla ọ-kpa pyẹ nyamwụ oheeye ka. (Ụkụr. 15:37, 38) Ma, ọọwa du ká abwọ chọọ pyẹpyẹ la ọ-họ ụkụrwọ ha angịkịla? Ehe.

⁵ ỊMakị myọnụ nyọka họ ụkụrwọ ẹ-ẹga ọkịla bala ịBanabasị kị bwu bala awụlẹ. Lala ẹka iwo kụrụ ookpokpo ị-ịlahị nyọọwa kị wu ịPọlụ ju agba i-iRom, ịMakị ka ẹga nyamwụ nyọka jwoo ọhụ. (Filim. 23, 24) Ụbwọ ọdada nyamwụ myị ịPọlụ lẹhị yẹẹyẹẹ kpụ ọ ya nyori ịMakị nyị ‘hu ẹjẹ ọkpụ́kpụ họwa lụmẹ.’—Kol. 4:10, 11.

6. Ányị ịMakị à tị́ yé apyobwuna bwula ọ-yẹ jula angịgbahị ịlẹ kị la ọmyịmyị? (Yẹ ọdawụlẹ oleji.)

⁶ ỊMakị la ẹla ọjẹ́jẹ yẹẹyẹẹ chajị nyọlẹ kọọ yẹ jula angịgbahị ịlẹ kị la ọmyịmyị. Nyọlẹ kọ hụ ta ịPọlụ chẹẹ i-iRom, ọ rụ ka ịBabịlọn nyọka họ ụkụrwọ bala iPita. Ị ri aligu la apatabwọ kiwa ka kpụ iPita wụrwọọ nya ‘ịMakị ọnyị nyam.’ (1 Pit. 5:13) Jaabwọ kị wẹẹ họ ụkụrwọ lawụlẹ, ọ chịkpẹẹ myị́ ká iPita ka ja oligu nyamwụ ọwẹ kọ ri okolobya, oja yẹẹyẹẹ u-uhye nya ọhịhị bala ẹrụ ọnyịịla ọ-kpa pyẹ nya iJisọsị. Ị-ịlahị nyọọwa, ịMakị da oja ịịwa ẹ-ẹpwụ nya ụpwụ nya ịBayịbụụ ọlẹ kị ya wụrụ ẹnyị nyamwụ. a

7. Ányị ọọnahị okolobya ọlẹ ko ri Seung-Woo à tị́ bwu gbịla ịMakị? (Yẹ ifoto ịnyịnyị.)

 ⁷ ỊMakị kịnyaa la ọ-kpa ụka nyamwụ họ ụkụrwọ ha iJihova bala ọ-tụ́ ju angịgbahị ịlẹ kị nwà-nwà ẹ-ẹpwụ nya ang nya olegu chwẹẹ ịnyịnyị. Ányị a tị́ ka bwu gbịla ịMakị? Ọhẹka, à tịtọ nyọka họ ụkụrwọ ha iJihova gụ ọọwa bwula o-ri ọngọ myị ẹrụ lee ọngọgbahị nya ọjịra-jịra, ma á tị la iwe ọọwa lẹka. Kori kọ lịnyị, ọkịlẹtụ a kpụng enyi ka. Ọkọkọ nyọọwa, kịnyaa la ọ-ya ẹhị reeji nya ang ịlẹ ká ka jẹ́-ẹ họ ha iJihova bala ọjịra-jịra myị́. Kụ ẹhị yẹ ẹla ọlẹ kọ họ ta Seung-Woo kọ ri ọngọgbahị nya ọjịra-jịra lẹẹlẹẹ lẹ wẹẹ. Ụka ọlẹ ko ri okolobya, ọ kaa chụ ịlọmwụ ka pwoku aanahị ikolobya ịkịla. Ọ yẹ nyori angịgbahị nya ọjịra-jịra ya iwe ha angịhyẹ nyaa nyọka họ ụkụrwọ gụ ọọwa ene nyamwụ. Ẹla ọọwa wụ́ ọọnahị ọwẹ ẹjẹ bala ọ-tọọ olujwo yẹẹyẹẹ. Ọ tị ya je angịgbahị nya ọjịra-jịra jaabwọ ká ẹlẹwẹ lọọ ụka ohyẹẹkpẹ. Ọngọhẹ nya angịgbahị ịịwa ya irya họọ nyori nyị maga nyọka họ ang myị́ ang ọlẹ kọ ka jụ họ ha angịkịla mẹ, kori kọ dọmwụ lala o-ri ọngọngọhẹ nyị yẹ ang ịnyịịla ịlẹ kọ wẹẹ họ ka wẹwẹ. Ọ kpa ẹla ọmẹjẹ ọọwa họ ụkụrwọ, lẹ ọ dọmwụ nyọka da aanahị ịlẹ kị ri angịgbahị chẹẹ lẹ ụbwọ nyọka ka ọjịra-jịra tụ́ angịkịla ịlẹ kị baba nya ụbwọ ọdada ọlịnyị lẹlẹ. Ụka kọ kụ irya kẹkpẹ, ọ yẹkẹẹ: “M̀ jẹ́ ang gụ ọọwa u-uhye nya abwọlẹ kam ka bwu họ ụkụrwọ ha angịkịla. M̀ tị myị́myị́ yé ọkẹkẹnị yẹẹyẹẹ chajị nyọlẹ kam jẹ́ da angịkịla ụbwọ ẹ-ẹga kị baba nyamwụ.”

GBỊLA ITIMOTI BWULA Ọ-MẸ ỌHÁHA JẸ Ẹ-ẸGA NYA ANGỊKỊLA

8. Ịyẹ tị́ du ká ịPọlụ chụ iTimoti nya ologu-ẹdịyẹ nyamwụ? (Ala iFilipayị 2:19-22)

⁸ ỊPọlụ baba nya angịlẹ kị la ugbodu ojuju nyọka bajẹ balọọ ụka kọ wẹẹ tịrẹkpẹ ka epweji ịlẹ ká angịnyị tọọ pyịpyị ụ-ụwa. Họhẹ-họhẹ, ọ chụ ịSayịlasị kọ gbịgba ha iJihova la ụka ọtata lẹ nyọka bajẹ balọọ. (Ụkụr. 15:22, 40) ỊPọlụ tị chụ iTimoti nyọka ri ologu-ẹdịyẹ nyamwụ ịnyịnyị. Ịyẹ tị́ du kọ chụ iTimoti? Ang odudu ọhẹ ri, ọ la ẹnyị ọnyịịla. (Ụkụr. 16:1, 2) Ọ tị kaa kpahị ju angịnyị nyịlẹhị-ịlẹhị ịnyịnyị.—Wa Ala iFilipayị 2:19-22.

9. Ányị iTimoti à tị́ mẹjẹ nyori ọ kpahị ju angịnyị nya ịKịrayịsị ịkịla yẹẹyẹẹ?

⁹ Bwu ụka ọlẹ ká iTimoti dọmwụ nyọka họ ụkụrwọ bala ịPọlụ, ọ mẹjẹ nyori ọ kpahị ju angịkịla gụ́ ịlọmwụ. Chajị nyọọwa lẹ, ịPọlụ pehyọọ hụ iBeriya la ahị ọdahile nyori ọ ka jẹ́-ẹ ju angịjụgbẹyị inyeewe ịlụwa ọhụ. (Ụkụr. 17:13, 14) Lụka ọwẹ, iTimoti ka jẹ́ ang yẹẹyẹẹ bwu ẹga nya ịSayịlasị kọ hi hụ epweji ọwẹ ịnyịnyị. Ma ị-ịlahị nyọọwa, ịPọlụ du iTimoti ẹrụ ka ịTẹsalonika ụbwọọmwụ nyọka ju angịnyị nya ịKịrayịsị ịla epweji ọwẹ ọhụ. (1 Tẹs. 3:2) Ẹ-ẹpwụ nya ẹka lala 15 kịlahị, iTimoti mẹjẹ nyori ọ kaa mẹ ahyẹẹrwẹrwa jẹ ẹ-ẹga nya  ọng myị́ ọng ọlẹ kọ juwa yẹ akama, ọ ri ọngọlẹ kọ kaa “jida ta angịlẹ ká ẹla nya ida ojeje họ ẹ-ẹga nyaa.” (Rom. 12:15; 2 Tim. 1:4) Ányị aanahị ikolobya à tị́ ka bwu gbịla iTimoti?

10. Ányị ọọnahị ọlẹng ọlẹ ko ri Woo Jae à tị bwu jẹ́ jaabwọ kọ ka kpa angịkịla i-irya gụ olene?

¹⁰ Ọọnahị ọhẹ ká ẹnyị nyamwụ ri Woo Jae jẹ́ ang u-uhye nyọka kpa angịkịla i-irya gụ olene. Ụka kọ ri onjwo wẹẹ, ọ kaa lọọ ujwo nyọka joja bala aanahị ịlẹ kị ri angịgbahị. Lẹ, ọ kaa dọnụ chaa ịịwẹ kem ụka kọ ka ọjịra-jịra. Ọngọgbahị nya ọjịra-jịra ọhẹ tị jwoo irya nyọka dọmwụ nya oja ojaja bala angịkịla bwula ọ-ya ẹla nyaa ịlẹ kị họ́ọ jaa. Ọngọgbahị ọọwa myị́myị́ byoo nyori nyị kụ irya u-uhye nya ang ịlẹ kị ka kpụ angịkịla ịpyọ. Woo Jae kpa ẹla ọmẹjẹ ọwẹ họ ụkụrwọ. Lẹẹlẹẹ, ọ ri ọngọgbahị nya ọjịra-jịra lẹ. Ọ yẹkẹẹ: “Ọ kaa chịm kpẹẹ lẹẹlẹẹ nyọka ya ẹla bala angịnyị ịlẹ kị gu ẹka ịdatị-datị. M̀ chị ọkẹkẹnị nyori m kaa jẹ́ iwe-ahụrụ nya angịkịla yẹẹyẹẹ lẹẹlẹẹ lẹ. Ọọwa tị du kam jẹ́-ẹ da aanam ịkịla ụbwọ.”

11. Ányị aanahị ikolobya à tị́ ka bwu kpahị ju angịkịla ịlọjịra-jịra yẹẹyẹẹ? (Yẹ ifoto ịnyịnyị.)

¹¹ Anụ aanahị ikolobya ka jẹ́-ẹ kpa angịkịla i-irya ụ-ụgbẹyị ọlịwịịwẹ ịnyịnyị. Ụka kanụ juwa ọọjịra-jịra, ya ẹla bala angịnyị ịdatị-datị, tụ́ anjwo bala angịgbahị. Taa wo nya iwe-ahụrụ nyaa, ka ke ụrụ kpẹnẹẹ wo laa. Ọọwa ka du ká ka jẹ́ jaabwọ á ka bwu daa ụbwọ. Ọhẹka, à ka yẹ nyori ahụ bala ọrụ ịhyẹ ịlẹ kị ri angịgbahị lẹ, ka baba nya ụbwọ ọdada nyọka kpa JW Library^® họ ụkụrwọ myị́. Lee, à ka jẹ́ nyori ị yé ọngọhẹ ka kpa ẹrụ ọnyịịla pyẹ balaa lẹka myị́. À ka jẹ́-ẹ mẹjáa jaabwọ kị ka bwu kpa iFon nyaa họ ụkụrwọ lee o-kpehe nya ẹla Ohe balaa myị́? Kori ka hu ẹta-ẹdịyẹ jene nyọka da angịkịla ụbwọ, à ka ya ọgụ-ẹpẹtẹ ọnyịịla deeji ha ọng myị́ ọng wuu.

YÉ APYOBWUNA BWU ẸLA ỌMẸJẸ ỌNYỊỊLA NYA ỊPỌLỤ

12. Ụgbẹyị oyina anjwo ikolobya à tị́ ka yé apyobwuna bwu ẹla ọlẹ ká ịPọlụ mẹjẹ iTimoti?

¹² ỊPọlụ mẹ ẹla ọnyịịla jẹ iTimoti, ọlẹ kọ ka jẹ́-ẹ dọọ ụbwọ nyọka chị ọkẹkẹnị ẹ-ẹpwụ nya ọhịhị nyamwụ bala ọ-ka gbịgba ha Ohe yẹẹyẹẹ. (1 Tim. 1:18; 2 Tim. 4:5) Anụ aanahị ikolobya ka jẹ́-ẹ yé apyobwuna bwu ẹla ọmẹjẹ ọnyịịla nya ịPọlụ ọọwa ịnyịnyị myị́. Ụ-ụgbẹyị oyina tị́? Wa ileta imiiye ịlẹ ká ịPọlụ da du kịla iTimoti lala o-ri ịPọlụ nyị da apwụ ịịwa du tọng, ka yẹ jaabwọ á ka bwu kpa ẹla ọọwa họ ụkụrwọ. Kụ ẹhị yẹ ị-chụ pwokwita ịmanyị-manyị lẹẹ wẹẹ.

13. Ịyẹ à tị́ ka dang ụbwọ nyọka godayị giri-giri ha iJihova gụ ọọwa?

¹³ “Mẹ ụgbẹyị nya ọngịnyị nya Ohe Oluhye oriri jẹ ịlọng ọgwọgụ.” (1 Tim. 4:7) Ịyẹ à tị́ ri  etu nyọka ri ọngịnyị nya Ohe? Ọ ri ụka ká ọngịnyị-ị́ godayị giri-giri ha iJihova bala ọ-họ ẹla ọlẹ kọ kpọọ ịpyọ. Ị́ mahị la abwẹla ịwẹ ka, lẹ ahị ka maga nyịlẹhị-ịlẹhị nyọka laa. Ányị ahị tị́ ka bwu họ ịnyị? Omyi ẹla ọlẹ ká ịPọlụ kpa ya ẹla ụka kọ ya nyị mẹ ụgbẹyị jẹ ịlọng, chabwọ nya abwọlẹ ká angị rụnyẹ kaa nwụla ịlaa nọ yẹẹyẹẹ gbe awụlẹ ọ-chọnụ nya ụnyẹ ọrụrụ. Angị rụnyẹ ịịwa baba nyọka họ ang ịnyịịla ịlẹ kị ka daa ụbwọ nyọka kụrụ. Ahị ịnyịnyị baba nyọka họ ang ịlẹ kị ka du kahị ka la abwẹla ịnyịịla, chajị kahị ka jẹ́-ẹ tụ́ ju iJihova chwẹẹ gụ ọọwa.

14. Ẹlịyẹ ahị tị́ ka kpịtịya ụka kahị ja wa ịBayịbụụ? Ya ọ-chụ pwokwita ọhẹ wẹẹ.

¹⁴ Ọ baba kahị ka ja wa ịBayịbụụ ẹnụ myị́ ẹnụ bala ọ-ka kpịtịya nya ang odudu kahị kaa wọọ, kọ ri ọ-ka tụ ju iJihova chwẹẹ gụ olene-ene. Ọ-chụ pwokwita, ụka ká ja wa oja nya iJisọsị bala okolobya ọlẹ kọ kpụdụ, ẹlịyẹ ọ tịị mẹjẹ́ng u-uhye nya iJihova? (Mak. 10:17-22) Okolobya ọọwa myị nyori iJisọsị à ri iMesaya lẹ, ma ọ́ la ọmyịmyị nwà nyọka ri ọngọjụgbẹyị nyamwụ ka. Ọ tị lịnyị odu lẹ, iJisọsị la ọháha ẹ-ẹga nyamwụ. IJisọsị ya ẹla kpẹnẹẹ tọ okolobya ọwẹ. Ọ la gbagbịla nyori iJisọsị tịtọ ká okolobya ọwẹ ka gbịgba ha Ohe juwa chị ọkẹkẹnị ẹ-ẹpwụ nya ọhịhị. Abwọlẹ ká ẹla nya okolobya ọwẹ la iJisọsị wẹ, ọ la iJihova ịnyịnyị lẹ. (Jọn. 14:9) Jaabwọ ka wẹẹ kụ irya ju oja ọwẹ bala iwe-ahụrụ nyang, tịlọng wo nyori, ‘Ẹlịyẹ m tị́ baba nyọka họ kam ka tụ́ ju iJihova chwẹẹ gụ ọọwa bala ọ-ka da angịkịla ụbwọ yẹẹyẹẹ?’

15. Ịyẹ tị́ du kọ baba ká ọọnahị okolobya ka ri ọgụ-ẹpẹtẹ ọnyịịla ha angịkịla? Ya ọ-chụ pwokwita ọhẹ wẹẹ. (1 iTimoti 4:12, 13)

¹⁵ “Ọhịhị nyang a ri ang o-ju ẹjẹẹ ha angị myị la Ohe Oluhye ịkịla.” (Wa 1 iTimoti 4:12, 13.) Ụ-ụpwụ ọwawa bala ang ọ-jẹ mẹjẹ kem ịPọlụ à byi iTimoti nyị họ ka, ma o jwoo ọhụ nyọka la abwẹla ịnyịịla lala ọháha, ọmyịmyị bala abwẹla ocheri-cheri. Ịyẹ tị́ du? Chajị ẹla ọlẹ ká ọngịnyị-ị̀ họ baba gụ ẹla ọlẹ kọ kaa ya. Kụ irya nyori ị ya ụpa hang ọọjịra-jịra nyọka ya ẹla u-uhye nya abwọlẹ kahị ka bwu kpa ẹrụ ọnyịịla pyẹ yẹẹyẹẹ wẹẹ. Ọ ka chịng kpẹẹ nyọka ya ẹla u-uhye nya egbeju nya ẹla ọwẹ kori á kaa maga da ịlọng ẹ-ẹrụ ọnyịịla ọ-kpa pyẹ. Ọgụ-ẹpẹtẹ ọnyịịla ọlẹ ka ya deeji ka gu alọjịra-jịra o-olegu nyọka kpa ẹla ọmẹjẹ nyang ọọwa họ ụkụrwọ gụ.—1 Tim. 3:13.

16. (a) A-agbẹyị iyina aanahị ikolobya à tị́ ka bwu ya ọgụ-ẹpẹtẹ ọnyịịla deeji ha angịkịla? (b) Ányị ọọnahị okolobya à tị́ ka bwu ri ọgụ-ẹpẹtẹ ọnyịịla ẹ-ẹpwụ nya “ẹla oyaya”?

¹⁶ Ụ-ụpwụ nya 1 iTimoti 4:12, ịPọlụ gu ẹnyị nya agbẹyị ịlẹ ká ọọnahị okolobya ka bwu ya ọgụ-ẹpẹtẹ ọnyịịla deeji ha angịkịla. À ka jẹ́-ẹ hu ụka nọ nyọka jẹ́ ang u-uhye nya ọnyọnyọọnyị nyaa myị́? Ọ-chụ pwokwita, ọhẹka à tịtọ nyọka ri ọgụ-ẹpẹtẹ ọnyịịla ẹ-ẹpwụ nya “ẹla oyaya.” Kụ irya nya ẹla ọlẹ ká ka jẹ́-ẹ ya nyọka ju angịkịla ọhụ. À ka jẹ́-ẹ ji adang bala ịnang obe ọhọhọ ụka myị́ ụka chajị nya ang ịlẹ kị kaa họ hang? Kori ká ọjịra-jịra á tị tụ ku kpá, à ka jẹ́-ẹ ya ẹla ọlẹ kọ myịng lẹhị u-uhye nya ụpa ọlẹ ká ọọnahị ọhẹ họ joo? À tị ka jẹ́-ẹ maga nyọka wẹ ịtọ ẹla la omyi ẹla nyịlọng ọọjịra-jịra ịnyịnyị myị́. Aga ọmama nyang nyọka ya ọgụ-ẹpẹtẹ ọnyịịla deeji ẹ-ẹpwụ nya ẹla oyaya mẹjẹ nyori à wẹẹ nwà kịlahị ẹ-ẹga nya ang nya olegu.—1 Tim. 4:15.

17. Ịyẹ à tị́ ka da ọọnahị okolobya ụbwọ nyọka họ ụkụrwọ ha iJihova gụ ọọwa? (2 iTimoti 2:22)

¹⁷ ‘Cheji ba imyi nya ịnyịrọ nya ịwọ nya okolobya, ká juwa maga nya abwẹla ọnyịịla ọhọhọ.’ (Wa 2 iTimoti 2:22.) ỊPọlụ ju iTimoti ọhụ nyọka cheji ba hwẹẹ hi ịngịngịhyẹ ọlẹ kọ ka hwoo abwọ la ọ-họ ụkụrwọ ha iJihova gụ ọọwa lee ọ-họ ká igu oriri nyamwụ bala iJihova ka la dẹwụ-dẹwụ. Ọhẹka, à ka yẹ nyori ang ịhyẹ ji kị tịpyọ la ọ-họhọ ka, ma kị tị ka ye ụka ọlẹ ká ka kpa họ ang nya olegu myị́.  Ọ-chụ pwokwita, kụ irya nya ụka ọlẹ á kaa bịrị ju ayịlọ ọkọkọ, intanẹtị ọ-kpa họ ụkụrwọ lee igem ọ-da bwu iFon lee iKomputa wẹẹ. À ka jẹ́-ẹ kpa ụka ọhẹ bwu ẹpwụ nyọlẹ ká kaa kpa họ ang ụma ịlịịwẹ họ ụkụrwọ ha iJihova lee angịkịla myị́? Ọhẹka, à ka jẹ́-ẹ dụbwọ ụka kị ja kpahị ju Ube nya Ịpyị-Adịrahụ lee ọ-kpa ẹrụ ọnyịịla pyẹ la cart myị́. Kori ká ja họ ang ịlịịwẹ aalẹ, ọ ka chịkpẹẹ hang nyọka la aligu inyeewe ịlẹ kị ka jung ọhụ nyọka họ ụkụrwọ ha iJihova gụ ọọwa bala ọ-dang ụbwọ nyọka wu ang ịlẹ ka chị nọ ha ịlọng ọyị myị́.

YÉ AHỊ ỌWAWA BWULA Ọ-HỌ ỤKỤRWỌ HA ANGỊKỊLA

18. Iwe ịnyịịla-ịnyịịla iyina ịMakị bala iTimoti à tị́ la?

¹⁸ ỊMakị bala iTimoti chị ịlaa imyi kpẹpwụ nyịlẹhị-ịlẹhị nyọka jẹ́-ẹ họ ụkụrwọ ha angịkịla yẹẹyẹẹ, ọọwa tị du kị yé ọkẹkẹnị ẹ-ẹpwụ nya ọhịhị bala ọ-la iwe ịnyịịla-ịnyịịla ịnyịnyị. (Ụkụr. 20:35) ỊMakị ka ẹga ịlụrụ yẹẹyẹẹ nyọka da angịnyị nya ịKịrayịsị ịkịla ụbwọ. Ọ myịmyị da oja ịkpịpyọ-kpịpyọ u-uhye nya ọhịhị bala ẹrụ ọnyịịla ọ-kpa pyẹ nya iJisọsị. ITimoti ọwa da ịPọlụ ụbwọ nyọka ya ọjịra-jịra inyeewe yeji bala o-ju angịkịla ọhụ yẹẹyẹẹ. IJihova yẹ jaabwọ ká ịMakị bala iTimoti hu ịlaa ha kaka ba nyọka họ ụkụrwọ họọ, ọọwa tị myọọ lẹhị yẹẹyẹẹ.

19. Ịyẹ tị́ du ká aanahị ikolobya ka kpa ẹla ọlẹ ká ịPọlụ mẹjẹ iTimoti họ ụkụrwọ? Apyobwuna iyina ị tị́ ka yé kori kị họ ịnyị?

¹⁹ Ahị ka yẹ nyori iTimoti há ịPọlụ yẹẹyẹẹ bwula ẹla ọlẹ kọ ya ẹ-ẹpwụ nya ileta ọlẹ kọ da du kịlọọ. Ma iJihova à kpa ịPọlụ da ileta ịwẹ lẹ, lẹ ẹla ịlụwa mẹjẹ nyori anụ anjwo ikolobya há iJihova yẹẹyẹẹ ịnyịnyị alẹ. Ọ tịtọ kanụ ka la ọhịhị ọkpịpyọ-kpịpyọ ẹ-ẹpwụ nya ụkụrwọ nyamwụ. Lẹ, maga nyịlẹhị-ịlẹhị nyọka kpa ẹla ọmẹjẹ nya ịPọlụ họ ụkụrwọ bala ọ-ka da angịkịla ụbwọ gụ ọọwa mẹ. Kori ká họ ịnyị, à ka chị ọkẹkẹnị ẹ-ẹpwụ nya ọhịhị lẹẹlẹẹ bala ọ-ka yé “ọhịhị ọmyịmyị-ka” ị-ịlahị.—1 Tim. 6:18, 19.