1. Ịyẹ tị́ du ká ịBayịbụụ myịng lẹhị?

 Ọ MYỊHỊ lẹhị yẹẹyẹẹ nyọlẹ ká iJihova ya ịBayịbụụ hahị! Bwulọọ, ọ kaa mẹ ẹla o-ju apyobwuna jẹẹhị. Ọọwa kaa dahị ụbwọ nyọka jẹ́-ẹ bọhụ ẹ-ẹpwụ nya akama ịlẹ kahị kaa la alẹ. Ọ tị ya ẹhị ọrịrịị-rịrị nya ijuju ọnyịịla hahị ịnyịnyị. Ọlẹ kọ tị baba gụ́ wuu ri, iJihova ya abwẹla nyamwụ ịhyẹ bala ịkịla jehi ẹ-ẹpwụ nya ịBayịbụụ ịnyịnyị. Ụka kahị kụ irya ju abwẹla ịnyịịla nyamwụ, ị kaa guhi ọ-ọkịlẹtụ bala ọ-guhị gbịla nyọka tụ ju Ohe chwẹẹ lala aligu.—Eje. 25:14.

2. Agbẹyị iyina iJihova à tị́ kpa ya ịlọmwụ dodehe ụka ọhẹ lẹ?

² IJihova tịtọ ká angịnyị ka jọ́ọ. Lụka onyogo, ọ kaa kpa ụlaa ọlala, ọyị ọyẹyẹ, bala alegu-ẹrụ ya ịlọmwụ dodehe. (Ọwa. 12:6; Ụkụr. 10:3, 4) Ma kori kị da alaa, ọyị ọyẹyẹ, bala ẹla nya alegu-ẹrụ ịịwa jụ ụpwụ ka, áhị ka jẹ́-ẹ jẹ́ ang bwu ụwa alẹ ka. Ịnyị à dudu lẹ ká iJihova byi angịnyị nyị da ẹla ịlẹ kọ tịtọ kahị ka jẹ́ “ju ụpwụ” lẹlẹ. (Jer. 30:2) Nyọlẹ ká ‘ụkụrwọ nya Ohe Oluhye la kpàkpa’ wẹẹ, ahị ka jẹ́ myị̀myị̀ nyori ụgbẹyị ọlẹ kọ wẹẹ kpa ya ẹla tahị ka há bala o-ju apyobwuna.—Eje. 18:30.

3. Ányị iJihova à tị́ họ du ká ịBayịbụụ ji da ụka nyahị ọlẹ? (Ayịsaya 40:8)

³ Wa Ayịsaya 40:8. Omyi Ẹla nya Ohe mẹ ụgbẹyị ọnyịịla-ọnyịịla jẹ alẹng bala anyang ị-la ọmyịmyị ẹ-ẹpwụ nya ẹka ụnọ ịmanyị tị́ lẹ. Ányị ọọwa à tị́ bwu chịkpẹẹ? Ịtọ ẹla ọwẹ baba, chajị ị da ịBayịbụụ lụka ọtata lẹ. Nyọlẹ kị tị dọọ ju apwụ ịlẹ kị jẹ́-ẹ bịrị i-ijata wẹẹ, ọhẹ-lọhẹ nya apwụ ịịwa kpangga á hi ji ẹgẹhẹ alẹ kaka. Ma iJihova tị họ kpụ angịnyị jẹ́ kịla ẹla ọla Omyi Ẹla nyamwụ ju ka apwụ ịkịla. Ịlẹhị lẹ angị họ ụkụrwọ ọwẹ á la kpẹẹkpẹẹ ka, ma ị tị họ ụkụrwọ ọọwa rige-rige. Ọ-chụ pwokwita, ọlẹng ọhẹ kọ jẹ́ ang yẹẹyẹẹ da ụpwụ rụ ụpa nya ịBayịbụụ ọlẹ  kị da la òja nya iHiburu yẹkẹẹ: “Ụpwụ nya alene ọhẹ-lọhẹ-ẹ́ ji kị jẹ́ kịla ju kpẹẹkpẹẹ pwụ ọlịịwẹ ka.” Nanana nyori ụka lụmẹ-lụmẹ chịpwụrụ nyọlẹ kị dọọ lẹ, ị dọọ ju ang-abwọ ịlẹ kị jẹ́-ẹ bịrị hyaa, bala ọ-ri angịlẹ kị kịlọọ ju á la kpẹẹkpẹẹ ka, ahị ka jẹ́ myị̀myị̀ nyori ẹla ọlẹ kọ ji ẹpwụ nya ịBayịbụụ ọlẹ kahị lẹẹ wa alẹ pwoku irya nya iJihova ọlẹ kọ juwa ene-ene wẹẹ.

4. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

⁴ Ẹga nya iJihova “ang o-hu ha ọnyịịla ọnyị myị ọnyị wuu bala ang ọgahị ọkpẹẹkpẹẹ” à bwu lẹ. (Jem. 1:17) ỊBayịbụụ ri ọhẹ lẹpwụ nya āhị ịlẹ kị há gụ́ wuu ká iJihova ya hahị. Ụka ká ọngịnyị á gahị āhị, āhị ọọwa kaa mẹjẹ jaabwọ ká ọngọọwa jẹ́ẹhị kaka ba bala ang ịlẹ kị ri ịbaba nyahị. Ịnyịnyị ọ la ẹ-ẹga nya Ọngọlẹ kọ ya āhị nya ịBayịbụụ hahị lẹ. Kori lahị wụla āhị ọwẹ yẹ, ahị ka jẹ́ ang lụmẹ-lụmẹ u-uhye nya iJihova. Ahị ka yẹ jaabwọ kọ jẹ́ẹhị la ịlọhị kaka ba bala ang ịlẹ kị ri ịbaba nyahị. Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ang ịlẹ kahị ka jẹ́ u-uhye nya abwẹla ịta nya iJihova. Abwẹla nyamwụ ịịwa ri: ẹla ọjẹ́jẹ, ẹla ọ-họ kpakpa, bala ọháha. Ahị dọmwụ bwula ọ-kụ ẹhị yẹ abwọlẹ ká ịBayịbụụ mẹjẹ nyori iJihova jẹ́ ẹla wẹẹ.

5. Ụgbẹyị oyina ịBayịbụụ à tị́ mẹjẹ nyori Ohe jẹ́ ẹla?

⁵ IJihova jẹ́ nyori ahị nyị baba nya ẹla ọmẹjẹ o-bwu ẹga nyamwụ. ỊBayịbụụ kọ tị ri āhị ọ-bwu ẹga nyamwụ myị̀ la ẹla ọjẹ́jẹ nyamwụ ịnyịnyị. Ẹla ọmẹjẹ ọlẹpwụ nya ịBayịbụu kaa da angịnyị nya Ohe ụbwọ. ỊBayịbụụ kaa yẹ ọhịhị da. Ụka ká iMosisi da apwụ ịrụ ịhọhẹ-họhẹ nya ịBayịbụụ, o byi ala Isirẹlụ, kị ri angịnyị nya Ohe Oluhye yẹkẹẹ: “Ọmẹjẹ ịwẹ-ẹ́ ri ẹla nya ayịlọ koo. Ịwa ọhịhị nyanụ à dopịlẹ lẹ.” (Ehile. 32:47) Angịlẹ kị ju ihi nya ịBayịbụụ kaa la ịlahị ọkaka bala ọkẹkẹnị ọchịchị ẹ-ẹpwụ nya ọhịhị. (Eje. 1:2, 3) Nanana nyori ị da Omyi Ẹla nya Ohe lụka ọtata lẹ, ọ la ọngịrị nyọka jẹ́-ẹ yẹ ọhịhị nya angịnyị da wẹẹ. Ọ-chụ pwokwita, ẹ-ẹpwụ nya egbeju nya ẹla ọla jw.org ọlẹ kọ ri “ỊBayịbụụ Kaa Yẹ Ọhịhị Da,” à ka yẹ oja nya angịnyị gụ́ angị 50 ịlẹ kị jẹ́ yẹ ọhịhị nyaa da chajị nyori ị kpa ẹla ọmẹjẹ ọlẹpwụ nya ịBayịbụụ họ ụkụrwọ.—1 Tẹs. 2:13.

6. Ịyẹ tị́ du kahị ka jẹ́-ẹ ya nyori ịBayịbụụ datị hi apwụ ịkịla?

⁶ Ụpwụ ọhẹ-lọhẹ á ji kọ lala Omyi Ẹla nya Ohe ka. Ịyẹ à tị́ du? Chajị iJihova, kọ ri Ọngọ la ịBayịbụụ ri agụgụ, ọ kaa hịhị gboyi myị́ oyi, ẹla ọjẹ́jẹ nya ọngọngọhẹ á tị taahị ju ịnyamwụ ka. Ịlẹhị lẹ, apwụ ịhyẹ ji ká angịnyị kaa wa ụka ká angị daa á gbu kpá. Ma ụka kọ nọ chẹẹ, ẹla ọmẹjẹ ọlẹpwụ nya apwụ ịịwa á kaa da angịnyị ụbwọ kaka. Itiwe nya ehile ịlẹpwụ nya ịBayịbụụ tị kaa ju apyobwuna ụka wuu. Ị jẹ́-ẹ da angịnyị ịla oyi ọnyị myị́ ọnyị ụbwọ. Jaabwọ kahị wẹẹ wa ụpwụ ọwẹ bala ọ-kụ irya ju ẹla ọlẹ kahị jẹ́ bwu ụwa, iJihova Ọngọ lọọ kaa kpa ọngịrị nya olegu ịgọgọ dahị ụbwọ nyọka yẹ jaabwọ kahị ka jẹ́-ẹ kpa ẹla ọlụwa họ ụkụrwọ ọ-ọhịhị nyahị. (Eje. 119:27; Mal. 3:16; Hib. 4:12) Ee, iJihova Ọngọ la ịBayịbụụ juwa charịnya nyọka dang ụbwọ. Ọọwa du kahị ka nwụlanọ nyọka wa ịBayịbụụ ụka myị́ ụka!

7. Ányị ịBayịbụụ à tị́ bwu yẹ angịnyị nya Ohe jula awụlẹ lụka ọkẹkpẹ?

⁷ Ụgbẹyị ọkpọnchị ọkịla ọlẹ ká ịBayịbụụ mẹjẹ nyori Ohe la ẹla ọjẹ́jẹ ri, ẹla ọlẹpwụ nyamwụ jẹ́-ẹ yẹ angịnyị nya Ohe jula awụlẹ. Ụka ká ala Isirẹlụ pwụ Ọpyị ọ-Myị Ọnụ Ha, ị kụ ẹga ịdatị-datị. Angịhyẹ ri angị da urwe-enyi, angịkịla ri angị kpa ịgọdọ ri, angịkịla tị kaa wu ẹrụ ịnyịnyị. Ọ chịkpẹẹ myị́ ịnọ ká ala Isirẹlụ ịlẹ kị kụ oye ọhẹ ka deeri nya ẹla nya ala Isirẹlụ aanaa ịlẹ kị kụ oye ọkịla nya ẹpwụma ọwẹ. Ma iJihova tị nwụla iwe nọ họ ala  Isirẹlụ nyọka tụguru ụka ọhẹ bala ụka ọkịla kị ka ke ụrụ wo Omyi Ẹla nyamwụ ọlẹ kị ka wa bala ọ-dawụlẹ. (Ehile. 31:10-13; Neh. 8:2, 8, 18) Kụ irya jaabwọ kọ ka la ọla Isirẹlụ ọ-la ọmyịmyị ọlẹ kọ pwụ eji i-iJerusalẹm, ụka kọ yẹ uku ịmanyị tị́ nya angịkịla ịlẹ kị kaa gbịgba ha iJihova bwu ụpa ịkịla nya ẹpwụma ọwẹ wẹẹ! Bwula ụgbẹyị ọwẹ, iJihova da angịnyị nyamwụ ụbwọ nyọka yẹ jula awụlẹ. Nyọlẹ kọ nọ chẹẹ ká ọjịra-jịra nya angịnyị nya ịKịrayịsị yeji, alẹng bala anyang ịlẹ kị kaa ya ìja ịdatị-datị à juwa lẹ. Angịhyẹ nyaa kpụdụ bala ọ-la ehe, angịkịla á tị lịnyị ka. Ma chajị nyọlẹ ká ẹla ọla Ụpwụ Ịgọgọ háa wẹẹ, ị jẹ́ yẹ jula awụlẹ ẹ-ẹpwụ nya ịgba ọgbagba nya Ohe Oluhye. Angịlẹ kị wẹ ka ye ẹlịlẹhị myị kaa wo etu nya Omyi Ẹla nya Ohe Oluhye bwula ụbwọ ọdada nya aanaa bala ọjịra-jịra ọkaka.—Ụkụr. 2:42; 8:30, 31.

8. Ányị ịBayịbụụ à tị́ kaa bwu yẹ angịnyị nya iJihova jula awụlẹ alẹ?

⁸ IJihova Ohe nya ẹla ọjẹ́jẹ wẹẹ kịnyaa la ọ-mẹ ang jẹ angịnyị nyamwụ bala ọ-yaa jula awụlẹ bwula ịBayịbụụ. Ẹpwụ nyamwụ ang oriri nya olegu ọlẹ kahị kaa ri alẹ à bwu lẹ. Ahị kaa tụguru lawụlẹ ụka myị́ ụka ọọjịra-jịra nya epwihi, ọjịra-jịra nya isekut bala ọtụka, nyọka wo jaabwọ kị ka wa ụpwụ ịgọgọ, dọọ wụlẹ bala o-ya ẹla u-uhye nyamwụ. Lẹ, ịBayịbụụ ri ang ọkpọnchị ọhẹ ọlẹ ká iJihova kaa kpa da angịnyị nyamwụ ụbwọ nyọka jẹ́-ẹ ‘gbịgba họọ lawụlẹ.’—Sẹf. 3:9.

9. Abwẹla oyina ọngịnyị à tị́ baba nyọka jẹ́-ẹ wo etu nya ẹla ọlẹpwụ nya ịBayịbụụ? (ILuku 10:21)

⁹ Yẹ ang ẹjẹẹ ọkịla ọlẹ kọ mẹjẹ nyori iJihova jẹ́ ẹla lẹẹ. Ọ họ ị da apa lụmẹ-lụmẹ nya ịBayịbụụ ụ-ụgbẹyị ọlẹ ká angị kpịlaa keji kem à ka jẹ́-ẹ wo etu nya ẹla ịlụwa. (Wa iLuku 10:21.) Angịnyị ịla ẹga myị́ ẹga kaa wa ịBayịbụụ. Ọngọ jẹ́ ang ọhẹ ya nyori “ịBayịbụụ nya-à ri ụpwụ ọlẹ ká angịnyị nyị kaa wa gụ́ wuu lẹ. Ọwa nya-à tị́ ri ụpwụ ọlẹ ká angịnyị kaa wa rige-rige gụ́ wuu ịnyịnyị lẹ.” Ma angị kpịlaa keji kem à jẹ́-ẹ wo etu nyamwụ bala ọ-kpa ẹla ọlụwa họ ụkụrwọ lẹ.—2 Kọr. 3:15, 16.

10. Ụgbẹyị ọkịla oyina ịBayịbụụ à tị́ mẹjẹ nyori iJihova la ẹla ọjẹ́jẹ?

¹⁰ Ahị kaa jẹ́ ang u-uhye nya ẹla ọjẹ́jẹ nya iJihova ọlẹpwụ nya ịBayịbụụ ụ-ụgbẹyị ọkịla. IJihova á kaa kpa ẹla ọla Ụpwụ Ịgọgọ mẹ ang jẹ angịnyị nyamwụ lawụlẹ kem ka, ma ọ kaa kpa mẹ ang jẹ ọngọngọọng nyahị bala ọ-kpa kpụ́ụhị ẹjẹ. Ụka kahị wa Ụpwụ Ịgọgọ, ahị kaa yẹ nyori iJihova kpahị ju ọngọngọọng nyahị. (Ayị. 30:21) Ụka ká juwa ẹ-ẹpwụ nya akama, ụka lụmẹ-lụmẹ à kaa jahị da ka ẹga nya ịBayịbụụ nyọka wọọ. À tị kaa yẹ ọgba ọhẹ ọlẹ kọ pwoku iwe-ahụrụ nyang kpangga. Ịnyịnyị ọ tị kaa la ẹ-ẹga nya angịkịla lẹ, chajị Ohe họ ị da ịBayịbụụ ká uku ịmanyị tị́ nya angịnyị ka yé apyobwuna bwu ụwa. Ányị ẹla ọlẹpwụ nya ịBayịbụụ à tị́ họ kọ jẹ́-ẹ pwoku iwe-ahụrụ nyang ahụ kpangga ịịwẹ? Ọ jẹ́ lịnyị myị́ chajị nyori Ọngọlẹ ká ẹla ọjẹ́jẹ nyamwụ gụ́ wuu e-epwoohe bala odehe à la ịBayịbụụ lẹ.—2 Tim. 3:16, 17.

11. Ányị Ohe à tị́ mẹjẹ nyori ọ́ kaa yẹ oye-oye ka ụka kị wẹẹ da ịBayịbụụ?

¹¹ Ẹla ọ-họ kpakpa ri abwẹla ọkịla nya iJihova. (Ehile. 32:4) Ọngịnyị ọlẹ kọọ họ ẹla ọ-la kpakpa á kaa yẹ oye-oye ka ịnyịnyị, iJihova tị ri Ohe ọlẹ kọ kaa yẹ oye-oye ka. (Ụkụr. 10:34, 35; Rom. 2:11) Ìja ịlẹ ká iru nya angịnyị kaa wo lụka ọkẹkpẹ ị kpa da ịBayịbụụ lẹ. Ọọwa mẹjẹ nyori iJihova á kaa yẹ oye-oye ka ịlẹhị. Òja nya iHiburu ị kpa da ụmụmẹ nya apwụ 39 kị ri ụpa ọhọhẹ nya ịBayịbụụ lẹ, chajị ọwa à ri òja ọlẹ kọ kaa chị angịnyị nya Ohe kpẹẹ la owowo ụka ọwẹ lẹ. Ma ọ ka pwụ oyi ọhọhẹ wẹẹ, òja nya iGiriki angịnyị à kaa ya gụ́ lẹ. Lẹ òja ọwẹ ị kpa da apwụ 27 ihihi nya ịBayịbụụ lẹ. IJihova á ya nyori òja ookpokpo ọhẹ kem nya-à ka kpa da Omyi Ẹla nya ọwa lẹ ka. Angịnyị tahị ju uku-ụnọ ineku ịlẹ kị jam odehe ọlẹ alẹ kaa ya ìja ịdatị-datị. Ányị iru nya angịnyị ịwẹ à tị́ ka bwu jẹ́ ang u-uhye nya iJihova?

12. Ụgbẹyị oyina ụpwụ nya ịDanẹlụ 12:4 à tị́ wẹẹ họ jịra la ahyẹẹnụ ihyẹẹkpẹ ịlẹ?

¹² Bwula ọlọmwụ ịDanẹlụ, iJihova chehe gbe ụka ohyẹẹkpẹ nyori angịnyị nyị ka “jẹ ang gụ ọọwa” bwu ịBayịbụụ. Iru nyaa tị ka wo etu nya ẹla ọlụwa ịnyịnyị. (Wa ịDanẹlụ 12:4.) Ịngịhyẹ ọlẹ kọ wẹẹ da iru nya angịnyị ụbwọ nyọka jẹ́ ang bwu ịBayịbụụ gụ́ ọọwa ri ọlẹ kị wẹẹ yẹ ịBayịbụụ bala apwụ ị-da ịBayịbụụ wụlẹ da ka ìja ịkịla, ị kaa haa kpehe bala ọ-ya ha iru nya angịnyị ịnyịnyị. ỊBayịbụụ à ri ụpwụ ọlẹ kị yẹda ka ìja ịkịla bala o-ji ha iru nya angịnyị odehe ọlẹ gụ́ wuu ẹẹ. ỊBayịbụụ ọnyị ká angị da ọhyị á yẹda kaa la ịnya lụmẹ ụka ọhẹ. Anchẹ nya iJihova ịwa tị yẹ ụpa nya ịBayịbụụ lee ọlẹpwụ-lẹpwụ nyamwụ da ka ìja gụ́ 240 lẹ, ị tị kaa ya ha ọng myị́ ọng la ọ-nwụ uri nyamwụ ka. Ọọwa dudu ká angịnyị bwu ẹpwụma ọnyị myị́ ọnyị wẹẹ jẹ́ ang u-uhye nya “ẹrụ ọnyịịla chajị nya ịpyị-adịrahụ” ene ká ọmyịmyị nya odehe ka pwụ eji. (Mat. 24:14) Ohe nyahị ri Ohe ọlẹ kọ kaa yẹ oye-oye ka, lẹ ọ tịtọ kọ ka ya iwe da ha ọng myị́ ọng nyọka wẹ ka jọ́ọ bwula ọ-wa Omyi Ẹla nyamwụ. Ahị wuu họ́ọ yẹẹyẹẹ à du kọ họ ịnyị lẹ.

13. Ịyẹ tị́ du kahị ka jẹ́-ẹ ya nyori ịBayịbụụ mẹ ọháha nya iJihova jẹ? (ỊJọn 21:25)

¹³ ỊBayịbụụ họ kahị jẹ́ nyori abwẹla nya Ohe ọlẹ kọ gụ́ wuu à ri ọháha lẹ. (1 Jọn. 4:8) Ọ ya ang ọlẹ kahị baba kpangga hahị nyọka jẹ́-ẹ ri igu balọọ, nyọka jẹ́-ẹ chị ọkẹkẹnị ẹ-ẹpwụ nya ọhịhị, bala ọ-ka yé ọhịhị o-gboyi myị́ oyi. Ma, nyọlẹ kahị há iJihova wẹẹ, ọ́ kaa ya olo nya ẹla ịlẹ kahị baba nyọka kpa gbịgba họọ ka chụụhị ka.—Wa ịJọn 21:25.

14. Ụgbẹyị ọkịla oyina ẹla ọlẹpwụ nya ịBayịbụụ à tị́ mẹjẹ nyori ahị há Ohe?

¹⁴ IJihova myịmyị mẹjẹ nyori ọ la ọháha bwula ọ-kaa ya ẹla tahị ụ-ụgbẹyị ọlẹ kọ ka chị ihi juhi. Ọ́ da ehile kpoye-kpoye ẹ-ẹpwụ nya ịBayịbụụ u-uhye nya ang myị́ ang ịlẹ kahị ka họ bala ịlẹ kahị ka họ ka lẹ ka. Ọkọkọ nyọọwa, ọ kpa oja nya angịkịla, ọmwụ ọyẹyẹ ịkpịpyọ-kpịpyọ, bala ẹla ọmẹjẹ ọlam-ọlam dahị ụbwọ nyọka jẹ́-ẹ cheje ọnyịịla. Bwula ụgbẹyị ọlịịwẹ, Omyi Ẹla nya Ohe kaa guhị gbịla nyọka la ọháha ẹ-ẹga nya Ohe bala ọ-ka jwoo ihi bwu ọkịlẹtụ nyahị.

15. (a) Ányị ịBayịbụụ à tị́ mẹjẹ nyori iJihova kaa kpahị juhi? (b) Ẹ-ẹpwụ nya ifoto ọwẹ, oja nya owo ọnyị ọnyang, okolobya, bala ọọnahị ọgbahị à tị́ wẹẹ kụ irya ju bwu ịBayịbụụ? (Ọmwụ. 39:1, 10-12; 2 Ịdị. 5:1-3; Luk. 2:25-38)

¹⁵ ỊBayịbụụ họ kahị jẹ́ nyori Ohe kpahị juhi yẹẹyẹẹ. Ányị ọ tị́ bwu lịnyị? Oja ịlẹ kị kaa gu ọngịnyị ehe o-olegu juwa ẹ-ẹpwụ nya Omyi Ẹla nyamwụ yẹẹyẹẹ. Ahị jẹ́-ẹ wo etu nya ẹla ọlẹ kọ họ ta angị ịlụka onyogo chajị ị “ri ọngịnyị ehe ọlam-ọlam lala ahị angịkịla.” (Jem. 5:17) Ọlẹ kọ tị baba gụ́ wuu ri, bwula ọ-yẹ jaabwọ kọ họ ẹla ẹ-ẹga nya angịkịla ị-lala ahị, ahị kaa yẹ gede-gede nyori iJihova  “ri Ọlọnahị bala Ọngọ la ahyẹẹrwẹrwa lụmẹ.”—Jem. 5:11.

16. Ẹlịyẹ ahị tị́ kaa jẹ́ u-uhye nya iJihova ụka kahị wa oja nya angịlẹ ká ẹla gwaa họ ẹ-ẹpwụ nya ịBayịbụụ? (Ayịsaya 55:7)

¹⁶ ỊBayịbụụ chị ọháha ọlẹ ká Ohe Oluhye la ẹ-ẹga nyahị ehe ụ-ụgbẹyị ọkịla. Ụpwụ Ịgọgọ họ kahị jẹ́ myị̀myị̀ nyori Ohe nyahị á kaa nyẹẹkpẹ dahị ụka kahị chị ụchụụ ka. Ala Isirẹlụ họ ọhọbịrị ba iJihova mwụba-mwụba; ma ụka kị yẹ irya da ọlam-ọlam, Ohe kaa hịnyọhi haa. (Wa Ayịsaya 55:7.) Angịnyị nya ịKịrayịsị ịla oyi ọhọhẹ jẹ́ ịnyịnyị nyori ịwa nyị há Ohe yẹẹyẹẹ. Olegu ịgọgọ kpa ọlẹrụ ịPọlụ da ụpwụ kaka byi angịnyị nya ịKịrayịsị ịkịla u-uhye nya ọngịnyị ọlẹ kọ họ ọhọbịrị ọtụka kọ tị yẹ irya da lẹ, nyori nyị “hịnyọhi ha ọngọọwa bala o-juwa kpụ́ ọngọọwa ẹjẹ” mẹ. (2 Kọr. 2:6, 7; 1 Kọr. 5:1-5) Ọ kpịpyọ yẹẹyẹẹ nyọka jẹ́ nyori iJihova á kaa nyẹẹkpẹ da anchẹ nyamwụ chajị nyori ẹla gwaa họ ka! Ọkọkọ nyọọwa, ọ kaa daa ụbwọ bala ọ-nwaa rịrị ẹ-epwụ nya ọháha, ọ tị kaa wụraa tịrẹkpẹ wẹ ẹga nyamwụ ịnyịnyị. Ọ myọnụ nyọka họ ịnyị ẹ-ẹga nya alịhọbịrị ịlẹ wuu kị yẹ irya da alẹ.—Jem. 4:8-10.

17. Ịyẹ tị́ du ká ịBayịbụụ ri ụpwụ o-ju apyobwuna pwụ ọlịịwẹ?

¹⁷ IJihova ya āhị ọnyịịla-ọnyịịla hahị lẹ. Ịyẹ tị́ du ká Omyi Ẹla nyamwụ ju apyobwuna pwụ ọlịịwẹ? Jaabwọ kahị yẹ wẹ, ịBayịbụụ họ kahị jẹ́ nyori Ohe jẹ́ ẹla, ọ kaa họ ẹla kpakpa, bala o-ri ahị họ́ọ yẹẹyẹẹ. ỊBayịbụụ mẹjẹ nyori iJihova tịtọ kahị ka wẹ ka jọ́ọ. Ọ tịtọ kahị ka wẹ ka ri aligu nyamwụ.

18. Ányị ahị tị́ ka bwu mẹjẹ nyori āhị nya Ụpwụ Ịgọgọ myịhị lẹhị?

¹⁸ Áhị tịtọ nyọka deeri nyori ịBayịbụụ ri “ang o-hu ha ọnyịịla” bwu ẹga nya Ohe Oluhye ka. (Jem. 1:17) Lẹ ahị kịnyaa la ọ-mẹjẹ nyori āhị ọwẹ myịhị lẹhị mẹ. Ahị ka jẹ́-ẹ họ ịnyị bwula ọ-wa ụpwụ ọwẹ bala ọ-kụ irya ju ẹla ọlẹ kahị wa. Jaabwọ kahị wẹẹ họ ịnyị, ahị ka jẹ́ myị̀myị̀ nyori Ọngọ lọọ ka wahị kụrụụhị, ahị tị ka “jẹ ẹla o-bwu ẹga nya Ohe Oluhye” ịnyịnyị.—Etu 2:5.