ANG ỌJẸ́JẸ 25
EJE 7 IJihova, Ọngịrị Nyahị
Kpịtịya Nyori IJihova Ri Ohe Ọlẹ kọ “Juwa Hịhị”
“[IJihova] juwa hịhị!”—EJE. 18:46.
ẸHỊ NYA ẸLA
Ahị kaa yé apyobwuna yẹẹyẹẹ kori kahị kpịtịya nyori Ohe ọlẹ kahị wẹẹ gbịgba ha ri Ohe ọlẹ kọ “juwa hịhị.”
1. Ịyẹ à tị́ kaa da angịnyị nya iJihova ụbwọ nyọka gbịgba họọ kịnyaa nanana nyori ị kaa chịpwụrụ bwụ ẹpwụ nya akama?
ỊBAYỊBỤỤ ya ahị nyị wẹẹ hịhị lụka “olujwo nya ịlẹhị-ịlẹhị.” (2 Tim. 3:1) Datị́ hi akama ịlẹ ká ọngọ myị́ ọng wuu wẹẹ yẹ odehe ọlẹ, angịnyị nya iJihova kaa myị́myị́ yẹ akama nya ọtụpyịpyị bala ẹtẹ ọbaba. Ịyẹ á tị́ kaa dahị ụbwọ kịnyaa la ịgba ọgbagba nya iJihova nanana nyori ahị ji ẹpwụ nya akama? Ang ọkpọnchị ọhẹ ri ahị kaa yé ụbwọ ọdada nya iJihova bala ọ-jẹ́ nyori ọ “juwa hịhị.”—Jer. 10:10; 2 Tim. 1:12.
2. Ẹlịyẹ ahị tị́ jẹ́ u-uhye nya iJihova kọ ka jẹ́-ẹ juhị ọngịrị?
2 IJihova jẹ́ akama ịlẹ kahị wẹẹ yẹ wuu, ọ tị nwụlanọ nyọka dahị ụbwọ. (2 Ego. 16:9; Eje. 23:4) Ụka kahị kpịtịya nyori Ohe kaa kpahị juhị bala o-ri ọ nwụlanọ nyọka dahị ụbwọ ụka wuu, ọọwa kaa ya ọngịrị hahị ọlẹ kahị ka kpá bọhụ ẹ-ẹpwụ nya akama nyahị ọnyị myị́ ọnyị. Yẹ jaabwọ kọ lịnyị ẹ-ẹga nya Adịrahụ iDevidi wẹẹ.
3. Ẹlịyẹ à tị́ ri etu nya ẹla ọlẹ ká iDevidi ya nyori iJihova nyị “juwa hịhị”?
3 IDevidi jẹ́ iJihova bala ọ-kaa kpụnịrọọ yẹẹyẹẹ. Ụka ọlẹ ká Adịrahụ ịSọlụ bala angịkịla lẹẹ maga nyọka nwụ iDevidi, ọ raabwọ bịlẹ iJihova nya ụbwọ ọdada. (Eje. 18:6) Ụka ká iJihova wo abwọ ọrịrị nya iDevidi kọ chọọ da kpá, ọ ya nyori iJihova “juwa hịhị” ịlẹhị! (Eje. 18:46) Bwula omyi ẹla ọwẹ, iDevidi á wẹẹ mẹjẹ nyori ọ jẹ́ ká Ohe ji ịịwẹ kem ka. Ụpwụ ọhẹ ya nyori iDevidi nyị wẹẹ ya jaabwọ kọ dahịhile iJihova kaka ba nyori “o juwa hịhị bala ọ-kaa da angịnyị nyamwụ ụbwọ ụka wuu.” Ee, iDevidi jẹ́ bwụla ang ịlẹ kị họ ọ-ọhịhị nyamwụ nyori Ohe nyị juwa hịhị, ọ-jẹ́ myị̀myị̀ ọọwa du kọ cheje nyọka kịnyaa la ọ-gbịgba ha iJihova bala ọ-ka ya ogbo họọ lẹ.—Eje. 18:28, 29, 49.
4. Apyobwuna iyina ahị tị́ ka yé kori kahị yẹ iJihova lala Ohe ọlẹ kọ jụwa hịhị?
4 Ahị ọ-jẹ́ myị̀ymyị̀ nyori iJihova ri Ohe ọlẹ kọ jụwa hịhị kaa gụhị gbịlaa nyọka gbịgba họọ la ila ọchị-chị. Ahị ka la ọngịrị nyọka bọhụ ẹ-ẹpwụ nya ịmayẹ bala ọ-ka cheri kịnyaa ẹ-ẹpwụ nya ụkụrwọ nyamwụ ọhọhọ. Ahị tị ka jẹ́-ẹ cheje nyọka tụ́ ju iJihova chwẹẹ.
OHE ỌLẸ KỌ JUWA HỊHỊ KA JUNG ỌNGỊRỊ
5. Ẹlịyẹ à tị́ ka ya ọ-jẹ́ myị̀myị̀ hahị ụka kahị ja chịpwụrụ bwụ ẹpwụ nya akama? (Ala iFilipayị 4:13)
5 Ahị ka jẹ́-ẹ bọhụ ẹ-ẹpwụ nya akama nyahị, tụ ịtụka bala ichiche, kori kahị kpịtịya nyori iJihova juwa hịhị bala o-ri ọ juwa nyọka dahị ụbwọ. Ọ ka jẹ́-ẹ dahị ụbwọ ẹ-ẹpwụ nya akama ọnyị myị́ ọnyị chajị ịngịngịhyẹ á lọọ ujwo la ọhọhọ ka. Owa ri Ohe agụgụ lẹ, ọ ka ya ọngịrị ọlẹ kahị baba hahị nyọka bọhụ. (Wa Ala iFilipayị 2:13.) Chajị nya ọọwa lẹ, ahị lang odudu ọlẹ kahị ka jahị da akama nyahị la o-juhi kpong-kpong ka. Ụka kahị yẹ ụbwọ ọdada nya iJihova ẹ-ẹpwụ akama ichiche-ichiche ịlẹ kị wẹẹ chịhị ọgụ, ọ kaa ya ọ-jẹ́ myịmyị hahị nyori ọ ka dahị ụbwọ ẹ-ẹpwụ nya akama ịtụka ịlẹ kị ka chịhị ọgụ ị-ịlahị.
6. Ịyẹ à tị́ họ ọ-ọhịhị nya iDevidi ụka ko ri onjwo du kọ jụ ahị ọdahile nyamwụ ẹ-ẹga nya iJihova ọngịrị?
6 Kụ ẹhị yẹ ẹla imiiye ịhyẹ ịlẹ kị họ ta iDevidi du ká ahị ọdahile nyamwụ ẹ-ẹga nya iJihova la ọngịrị gụ ọọwa wẹẹ. Ụka ká iDevidi ri onjwo kọ kaa gbe ịkpịlọ, ọnarwọ bala ugẹbẹ wẹ ka wu ọkpịlọ nya adamwụ ịlẹ kọ wẹẹ kpẹhị rịrị. Ẹ-ẹpwụ nya iwe-ahụrụ imimiiye ịwẹ, iDevidi kwaa rụ kpụ ọ jẹ́ chị ịkpịlọ ị-ịwa da. Ma, iDevidi á kụ irya ẹnẹnẹhẹ nyori ọngịrị nya ịlọmwụ ọ kpa kụrụ lẹ ka. Ọ jẹ́ nyori iJihova à jẹkpẹ nyamwụ lẹ. (1 Sam. 17:34-37) IDevidi á deeri nya ẹlẹwẹ ẹnẹnẹhẹ ka. Bwụla ọ-kụ irya ju ẹlẹwẹ, iDevidi la ahị ọdahile nyori Ohe ọlẹ kọ juwa hịhị ka ya ọngịrị họọ ị-ịlahị.
7. Ányị ẹla ọ-yẹ ụ-ụgbẹyị ọdatị à tị́ da iDevidi ụbwọ nyọka dẹwụ ta iGoloyatị?
7 Ụka ọkịla, ká iDevidi ka gu ẹka lala iwo kụrụ anyị wẹẹ, ọ ka ịkampụ nya angị dẹwụ nya ala Isirẹlụ. Ọ yẹ nyori angịdẹwụ nya ala Isirẹlụ nyị wẹẹ juhi nya iGoloyatị ọgẹwụ ọtụka nya ala iFilisitiya ọọlajị nyọlẹ ọ wẹẹ ‘da alẹwụ nya ala Isirẹlụ uya.’ (1 Sam. 17:10, 11) ISoja ịwẹ juhi chajị ị ya irya nọ u-uhye ọlala nya iGoloyatị bala ala ịlẹ kọ wẹẹ ya. (1 Sam. 17:24, 25) Ma abwọlẹ ká iDevidi yẹ ẹlẹwẹ datị gbang-gbang. Ọ yẹ nyori á-ala Isirẹlụ kem ọlẹng ọwẹ à wẹẹ da uya ka, ma wẹẹ “ya ẹhị da angịdẹwụ nya Ohe Oluhye ọlẹ kọ juwa hịhị bwee” ịnyị. (1 Sam. 17:26) IDevidi ọwa kpa irya ka ẹga nya iJihova họhẹ-họhẹ. IDevidi la ahị ọdahile nyori Ohe ọlẹ kọ dọọ ụbwọ ụka kọ lẹẹ kpa ịkpịlọ ri ka dọọ ụbwọ ẹ-ẹpwụ nya iwe-ahụrụ ọwẹ ịnyịnyị. La ọ-jẹ́ myị̀myị̀ nyori iJihova nyị ka ji ẹkpẹ nyamwụ, iDevidi hụ ang kele kaka dẹwụ ta iGoloyatị, ọ tị kụrụ ịlẹhị!—1 Sam. 17:45-51.
8. Ányị ahị tị́ ka jẹ́-ẹ la ọ-jẹ myị̀myị̀ nyori iJihova ka dahị ụbwọ ụka kahị ja chịpwụrụ bwụ ẹpwụ nya akama? (Yẹ ifoto ịnyịnyị.)
8 Ahị ịnyịnyị ka jẹ́-ẹ jahị da akama nyahị myị́ kori kahị kpịtịya nyori Ohe ọlẹ kọ juwa hịhị nwulanọ nyọka dahị ụbwọ. (Eje. 118:6) Ahị ka jẹ́-ẹ ju ọmyịmyị nyahị ẹ-ẹga nya iJihova ọngịrị nyori ọ ka dahị ụbwọ kori kahị kụ ẹhị yẹ ang ịlẹ kọ họ lụka onyogo. Wa ịBayịbụụ ịlẹ kị ya ẹla u-uhye nya abwọlẹ ká iJihova chị angịnyị nyamwụ da. (Ayị. 37:17, 33-37) Ịnyịnyị, ahị ka jẹ́-ẹ yẹ ifim lee ọ-wa apwụ nyahị ịlẹ kị ya ẹla u-uhye nya abwọlẹ ká iJihova kaa bwụ da aanahị alẹng bala anyang ụbwọ ụka nyahị ọlẹ ị-ịwẹbsayịtị nya jw.org. Maga ká kpịtịya nya ụka ọhẹ ọlẹ ká iJihova ma uya yẹng dada. Kori kọ tị lang lala o-ri Ohe nyị́ họ ụkụrwọ ọla ẹbyẹbyị ọhẹ ẹ-ẹpwụ nya ọhịhị nyang, ọlẹ kọ lala ahụ nyị ma uya kụrụ ugẹbẹ lee ọnarwọ ka bẹẹ? Ẹlịlẹhị ri iJihova họ ang lụmẹ-lụmẹ hang ẹ-ẹpwụ nya ọhịhị! Ọwa à wụrụng nyọka wẹ ka ri oligu nyamwụ lẹ. (Jọn. 6:44) Ụbwọ ọdada nyamwụ à du ká ji ẹpwụ nya ẹlịlẹhị da ọlẹẹlẹẹ lẹ. Lẹ raabwọ bịlẹ iJihova kọ dang ụbwọ kpịtịya nya ụka ọlẹ kọ wẹ abwọ ọrịrị nyang, ụka ọlẹ kọ ya ang ọlẹ ká baba kpangga hang lụka o-pwoku, lee ụka ọlẹ kọ kpahị jung ẹ-ẹpwụ nya iwe-ahụrụ olujwo. Irya ọ-kwụ ju ang ịlịịwẹ ka jụ ahị ọdahịlẹ nyahị ẹ-ẹga nya iJihova ọngịrị nyori ọ ka kịnyaa la ọ-ma ụya yẹhị dada.
Abwọlẹ kahị họ ụka kahị ja chịpwụrụ bwụ ẹpwụ nya akama kaa gu iJihova (Yẹ ọgba 8-9)
9. Ẹlịyẹ ahị tị́ baba nyọka kpịtịya ụka kahị ja yẹ akama? (Etu 27:11)
9 Ọ-yẹ iJihova lala Ọngọlẹ kọ juwa hịhị ka dahị ụbwọ nyọka yẹ akama nyahị ụ-ụgbẹyị ọlẹ kọ pwoku. Ụka kahị ja yẹ akama, ahị ka ya ẹhị rịrị u-uhye nya ang ọlẹ kọ baba gụ́ wuu. Olegu Onyobyi ya nyori kori kahị nyị́ ja yẹ akama, ahị nyị ka ji ẹkpẹ da iJihova. Lẹ abwọlẹ kahị họ ụka kahị ja yẹ akama kaa gu iJihova. (Job. 1:10, 11; wa Etu 27:11.) Ụka kahị dayị giri-giri ha iJihova nanana nyori ahị ji ẹpwụ nya akama, ahị wẹẹ mẹjẹ nyori iJihova háahị bala ọ-mẹjẹ nyori Olegu Onyobyi ri ọla ọnọọkịla. Ọhẹka à juwa ẹ-ẹga ọlẹ ká igomenti ja ba aanahị ẹtẹ lẹẹlẹẹ, lee á la ang nwa ká, lee angịnyị á kaa myị-ị̀ ke ụrụ wo ẹrụ ọnyịịla nwa ká, lee ọ ka ri akama ọkịla myị́. Kori kọ la ịnyị aalẹ, kpịtịya nyori iwe-ahụrụ ọlịnyị wẹẹ ya iwe da hang nyọka họ ká iJihova ka chị ọkẹkẹnị. Kpịtịya ịnyịnyị nyori ọ ka myị-ị ya iwe da ọmayẹ ọlẹ kọ kịlahị kịla ka chịhị ọgụ ka. (1 Kọr. 10:13) Ọ ka ya ọngịrị ọlẹ ká baba nyọka bọhụ hang.
OHE ỌLẸ KỌ JUWA HỊHỊ KA NWỤNG URI
10. Ịyẹ Ohe ọlẹ kọ juwa hịhị à tị́ ka họ ha angịlẹ kị-ị gbịgba họọ?
10 IJihova kaa nwụ angịlẹ kị kaa gbịgba họọ uri ụka wuu. (Hib. 11:6) Ọ kaa ya okpunyi hahị bala ọ-họ ká ang ọlẹ kahị la ka nwahị, ọ tị ka ya ọhịhị ọmyị́myị́ ka hahị ị-ịlahị. Ahị la ahị ọdahile ẹ-ẹga nya iJihova nyori ọ nwụlanọ nyọka nwụhị uri, ọ tị la ọngịrị nyọka họ ịnyị ịlẹhị. Chajị nya ọọwa, ahị kịnyaa la ịgba ọgbagba nyamwụ jaabwọ kahị ka ju họ ba myị, lala anchẹ nyamwụ ịla ụka onyogo mẹ. Inyị iTimoti à họ lẹ.—Hib. 6:10-12.
11. Ịyẹ à tị́ gu iTimoti gbịla nyọka họ ụkụrwọ la ọngịrị-ọngịrị ọọjịra-jịra? (1 iTimoti 4:10)
11 Wa 1 iTimoti 4:10. ITimoti ya ẹhị rịrị ka ẹga nya Ohe ọlẹ kọ juwa hịhị nyori ọ ka nwọọ uri. Ọọwa du kọ họ ụkụrwọ yẹẹyẹẹ ha iJihova bala angịkịla. Ụ-ụgbịyẹ oyina ọ tị́? Ọlẹrụ ịPọlụ jwọọ ọhụ nyọka nwa kịlahị ẹ-ẹpwụ nya ang ọmẹjẹ nyamwụ ẹ-ẹrụ ọnyịịla ọ-kpa pyẹ bala ọjịra-jịra. ỊPọlụ tị myịmyị byọọ nyori nyị ya ọgụ ẹpẹtẹ ọnyịịla deeji ha angịkịla, tụ angịgbahị bala anjwo. Ị tị ya ụkụrwọ olujwo ọhẹ họọ ịnyịnyị, kọ ri ọ-ka ya alibyi la angịlẹ kị baba nya ọnwụ rịrị, ma ọ tị ka họ ịnyị ụ-ụgbẹyị nya ọháha. (1 Tim. 4:11-16; 2 Tim. 4:1-5) ITimoti la ọ-jẹ́ myị̀ymyị̀ nyori kori ká angịkịla á yẹ ụkụrwọ ọlẹ kọ wẹẹ họ wẹwẹ ka, iJihova ka nwọọ uri.—Rom. 2:6, 7.
12. Ịyẹ à tị́ ka gu angịgbahị nya ọjịra-jịra gbịla nyọka kịnyaa la ụkụrwọ nyaa? (Yẹ ifoto ịnyịnyị.)
12 Alẹ, angịgbahị nya ọjịra-jịra ịnyịnyị ka jẹ́-ẹ jẹ́ myị̀myị̀ nyori iJihova yẹ ụkụrwọ ọlẹ kị wẹẹ họ bala o-ri ọ myọọ lẹhị. Datị hi ịkpịlọ ọ-kpẹhị rịrị, ang ọmẹjẹ, bala ẹrụ ọnyịịla ọ-kpa pyẹ, iru nya angịgbahị nya ọjịra-jịra kaa da ụbwọ ẹ-ẹpwụ nya ebe ị-kpa gbịgba ọnwụ-nwụ bala ọ-da ụbwọ ẹ-ẹga ká ayịreji ọ-bwụ agaga á họ. Angịkịla kaa họ ụkwụrọ ta ebwo nya aanahị ịlẹ kị ri Patient Visitation Groups lee ịKọmitii nya Angị Me Obyi bala Angị Họ Utoji. Angịgbahị ịlẹ kị wẹẹ kpa ụka nyaa họ ụkụrwọ ọlịịwẹ jẹ́ nyori iJihova à la ọjịra-jịra lẹ, ọ-ọngịnyị ehe ka. Ọọwa du kị kaa họ ụkụrwọ la ọkịlẹtụ nyaa wuu, la ahị ọdahile nyori iJihova ka nwaa uri nya ịngịngịhyẹ ọlẹ kị wẹe họ.—Kol. 3:23, 24.
Ohe ọlẹ kọ juwa hịhị ka nwụng uri nya ang ịlẹ ka wẹẹ họ wuu ẹ-ẹpwụ nya ọjịra-jịra (Yẹ ọgba 12-13)
13. Ányị ang ịlẹ kahị kaa họ ẹ-ẹpwụ nya ịgba ọgbagba nya iJihova à tị́ ka lọọ?
13 Ọ́ngọ myị́ ọng wuu à ka jẹ́-ẹ ri ọngọgbahị nya ọjịra-jịra ka. Ma ahị wuu lang ọlẹ kahị ka jẹ́-ẹ họ ha iJihova. Ọ kaa myị̀ Ohe nyahị lẹhị nya abwọlẹ kahị wẹẹ maga nyọka gbịgba họọ. Ọ jẹ́ jaabwọ kahị wẹẹ hu ha chajị nya ụkụrwọ ọla odehe wuu kori kọ la pyịnyẹng wẹwẹ. Ọ kaa myọọ lẹhị kori kahị kpa ụbwọ ka uhye nyọka wẹ ẹla nanana nyori ahị ka ju oyi myị́, ọ tị kaa kpọọ ịpyọ kori kahị chịpyị ba ịhọbịrị nya aanahị kahị hịnyọhi haa. Jẹ́ myị̀myị̀ nyori ụkụrwọ ọlẹ ká jụ họ myị̀ iJihova lẹhị yẹẹyẹẹ, kori ká dọmwụ jẹ́ họ jaabwọ kọ ri irya nyang ka wẹwẹ. Ọlẹ ká wẹẹ họ du ká ẹla nyang họ́ọ, ọ tị ka nwụng uri ịnyịnyị.—Luk. 21:1-4.
JI BA OHE ỌLẸ KỌ JUWA HỊHỊ BA
14. Ányị ọ-tụ ju iJihova chwẹẹ à tị́ kaa dahị ụbwọ nyọka dayị giri-giri họọ? (Yẹ ifoto ịnyịnyị.)
14 Kori kahị ri igu o-chii bala iJihova, ọ ka chịhị kpẹẹ la ọ-ka dayị giri-giri họọ. Ọ la ịnyị ẹ-ẹga nya iJosẹfụ. Ọ pwa ọ-ka họ ụya gbang-gbang. Ọ jẹ́ nyori ẹla myị́ ẹla kọ họ nyị kaa gu iJihova, ọ́ tị tịtọ kọ ka họ ẹla wọọ ẹjẹ ká. (Ọmwụ. 39:9) Nyọka ri igu o-chii bala iJihova, ahị baba nyọka hu ụka nọ kahị ka raabwọ họọ bala ọ-ka jẹ́ Omyi Ẹla nyamwụ. Kori kahị họ ịnyị igu nyahị ka wu yẹẹyẹẹ. Kori kahị ri igu ọ-chii bala iJihova lala iJosẹfụ, ahị ka myị-ị̀ họ ịngịngịhyẹ ọlẹ kọ ka wọọ ẹjẹ kaka.—Jem. 4:8.
Ọ-tụ ju Ohe ọlẹ kọ juwa hịhị chwẹẹ ka dahị ụbwọ nyọka jẹ́-ẹ dayị girigiri họọ (Yẹ ọgba 14-15)
15. Ẹlịyẹ ahị tị́ ka jẹ́ u-uhye nya ẹla ọlẹ kọ họ ta Ala Isirẹlụ u-ugbileji? (Ala iHiburu 3:12)
15 Angịlẹ kị deeri nyori iJihova juwa hịhị à kaa ji lụrụ hyọọ i-ijata lẹ. Kụ ẹhị yẹ ang ọlẹ kọ họ ta ala Isirẹlụ ụka kị ji ugbileji wẹẹ. Ị jẹ́ nyori iJihova juwa hịhị, ma ị dọmwụ nyọka juhi kori kọ kaa kpa ẹhị rịraa wẹẹ. Ị tọ wo yẹkẹẹ: “Anụ ya ká [iJihova] jam tahị lẹẹ wẹẹ-ẹ́?” (Ehe. 17:2, 7) Ị dọmwụ nyọka la egbeju ọngịrị ta Ohe lẹlẹ. Ahị-ị́ tịtọ nyọka ba ọgụ ẹpẹtẹ ọtịpyọ nyaa jẹ ka, ọhọhọ nyaa ri ụbwọ o-gbile ụ-ụrụ hahị alẹ.—Wa Ala iHiburu 3:12.
16. Ịyẹ à tị́ ka mẹ ọmyịmyị nyahị yẹ ụka ọhẹ myị́?
16 Odehe ọlẹ họ du kọ lujwo hahị nyọka jẹ́-ẹ tụ ju iJihova chwẹẹ. Iru nya angịhyẹ á dọmwụ myị nyori Ohe ji ka. Ụka lụmẹ-lụmẹ, ọ kaa lala o-ri angịlẹ kị myị họ irya nya Ohe ka à kaa dachichi pyẹ pyọọ lẹ. Ụka kahị yẹ kọ lịnyị, ọ ka ma ọmyịmyị nyahị yẹ myị́. Nanana nyori ahị myị ká Ohe ji, ma ahị ka ja da ịwẹẹ kori ká Ohe á ka dahị ụbwọ myị́. Ọla ọngọ da ụpwụ nya Eje Ọnyịịla 73 ịịwẹ ịnyịnyị pwu ụka ọhẹ. Ọ yẹ nyori angị kụ́ dagaga jwọọ nyị́ myị ju ihi nya Ohe ka, ma ị tị wẹẹ chị ọkẹkẹnị. Chajị nya ọọwa, ọ dọmwụ nyọka kụ irya nyori apyobwuna ọhẹ nyị́ ji nya ọngịnyị ọ-ka gbịgba ha iJihova kaka.—Eje. 73:11-13.
17. Ịyẹ à tị́ ka dang ụbwọ nyọka dayị giri-giri ha iJihova kịnyaa?
17 Ịyẹ a tị́ da ọngọ da Eje Ọnyịịla ọwẹ ụbwọ nyọka nwụ irya nyamwụ họ? Ọ kụ irya u-uhye nya ang ọlẹ kọ ka họ ta angịlẹ kị deeri hi iJihova. (Eje. 73:18, 19, 27) Ọ myị́myị́ kụ irya u-uhye nya apyobwuna ịlẹ ká ọngịnyị kaa yé kori kọ gbịgba ha Ohe. (Eje. 73:24) Ahị ịnyịnyị ka jẹ́-ẹ kụ irya u-uhye nya ahị ọwawa ịlẹ wuu kahị ye bwu ẹga nya iJihova. Bala ọ-kụ irya ju abwọlẹ ká ọhịhị nyahị ka la ịnọ kori kahị jẹ́ iJihova ka. Kori kahị kpịtịya nya ang odudu kọ há nya ahị ọ-ka gbịgba ha iJihova, ọọwa ka dahị ụbwọ nyọka godayị giri-giri họọ. Ọọwa ahị ka jẹ́-ẹ ya lala ọngọ da eje ọnyịịla kọ ya nyori: “Am tị lẹ, m̀ yẹ nyori ọ chakpa hiigu nyọka ju Ohe Oluhye chwẹẹ.”—Eje. 73:28.
18. Ịyẹ à tị́ du kahị baba nyọka juhi nya ijuju ka?
18 Ahị ka jẹ́-ẹ bọhụ ẹ-ẹpwụ nya akama ọhẹ-lọhẹ ọlẹ kọ ka chịhị ọgụ ụka ọhyẹẹkpẹ ọlẹ chajị ahị wẹẹ “myị ẹrụ ha Ohe Oluhye ọlẹ kọ juwa hịhị bala o-ri Ohe Oluhye nya ịlẹhị-ịlẹhị.” (1 Tẹs. 1:9) Ohe nyahị kaa kpahị juhi, ọ tị nwụlanọ nyọka dahị ụbwọ ụka wuu. Ọ da anchẹ nyamwụ ịla ụka onyogo ụbwọ, ọ tị jam tahị alẹ ịnyịnyị. Lụka okpii ahị ja ka ju ka ẹpwụ nya akama ọtụka okpelego, ma iJihova-á ka tụụbwọ hihi ụbwọọhị ka. Ọ ka dahị ụbwọ. (Ayị. 41:10) Lẹ ahị angịnyị nya Ohe Oluhye a ya ọnụ da awụlẹ ya nyori “Ọngọlahị Ohe Oluhye a ri Ọngọ da ụbwọ nyam lẹ. Chajị nya ọọwa lẹ, ḿ ka juwa juhi kpong-kpong kaka” mẹ.—Hib. 13:5, 6.
EJE 3 Ahị Kpụnịrong, Ahị Yẹhị Rịrị ẹ-Ẹga Nyang
