IMAHỊ omeme ka jẹ́-ẹ lala olo olilo ọtụka-ọtụka myị́. (Etu 12:25) À yẹ akama o-oluhye nya imahị omeme ẹnẹhẹ lẹ? Ọọ lang nyori á ka jẹ́-ẹ kịnyaa kaka? Kori kọ lang ịnyị aalẹ, á la ụbwọng ka. Iru nyahị kaa me imahị, la ọkịlẹtụ ọ-kpụ enyi bala ịnyịrọ ọ-chị pyẹpyẹ chajị nya iwe-ahụrụ ịdatị-ịdatị. Ọ-chụ pwokwita, angịhyẹ juwa kpẹhị rịrị olugbiyegu nyaa ọlẹ kọ jụ́ ẹdụrụ, olikẹjẹ nya angịkịla gbu hyaa, angịkịla tị kaa yẹ akama ọọlajị nya ayịreji o-bwu agaga. Ma ịyẹ à tị́ ka dahị ụbwọ nyọka yé okpunyi bala ọkẹkẹnị ẹ-ẹpwụ nya imahị omeme? *

Ahị ka jẹ́ ang yẹẹyẹẹ u-uhye nya abwọlẹ kahị ka bwu yé okpunyi nya ọkịlẹtụ bwu ọgụ-ẹpẹtẹ nya Adịrahụ iDevidi ụka kahị me imahị. Ọ chịpwụrụ bwu ẹpwụ nya iwe-ahụrụ ilujwo ụka lụmẹ-lụmẹ ọ-ọhịhị, ọ dọmwụ hi pyịnyẹng kọọ gbu ụka ọhẹ. (1 Sam. 17:34, 35; 18:10, 11) Ịyẹ à tị́ da iDevidi ụbwọ nyọka bọhụ? Ányị ahị tị́ ka bwu ba ọgụ-ẹpẹtẹ nyamwụ jẹ?

Akama lụmẹ-lụmẹ wẹ chị iDevidi ọgụ ụka ookpokpo. Kụ irya nya ẹla ọhẹ ọlẹ kọ họ ụka kọ wẹẹ rụnyẹ rụ hi Adịrahụ ịSọlụ kọ wẹẹ maga nyọka nwọọ wẹẹ. Ụka ká iDevidi bala angịnyị nyamwụ nyà bwu ẹwụ, ị yẹ nyori aluji nyaa bwu ẹkpẹ nyaa ka go ang nyaa yoyi, chị ẹpwa nyaa ila, bala o-wu ugbiyegu nyaa kpa rụ. Ányị iDevidi à tị́ họ? “IDevidi bala angịnyị nyamwụ . . . kamm lida juwa gbokiri gbee kị chị ẹpẹtẹkẹẹ.” Ajụjụ nya iDevidi gụ ọọwa ụka ká angịnyị nyamwụ “juwa hụrụ jahị dọọ kị ka mịlọọ ajwọ.” (1 Sam. 30:1-6) Lẹ iDevidi la akama ịta-ịta ụka ookpokpo: Aluji wu ugbiyegu nyamwụ kpa rụ, angịnyị nyamwụ tịtọ nyọka nwọọ, Adịrahụ ịSọlụ tị wẹẹ kwoo wẹẹ. Lẹ iDevidi ka chuko lụmẹ!

Ịyẹ iDevidi à tị́ họ mẹ? Ọ maga nyọka ju ịlọmwụ ọhụ bwu ẹga nya iJihova ahyaahị. Ụgbẹyị oyina iDevidi à tị́ ka bwu họ ịnyị myị́? Ahị jẹ́ nyori iDevidi kaa raabwọ bịlẹ iJihova kọ ka dọọ ụbwọ bala ọ-kụ irya u-uhye nya abwọlẹ ká iJihova dọọ ụbwọ lụka ọkẹkpẹ. (1 Sam. 17:37; Eje. 18:2, 6) IDevidi jẹ́ nyori ọwa nyị baba nyọka tọ iJihova wo nya ẹla ọlẹ kọ ka họ, lẹ o byi Abiyata ọngọkiliya nyị ‘kpa ẹfọdụ wọwa,’ chajị kọ ka tọ iJihova wo nya ang ọlẹ kọ ka họ. Ụka ká iJihova ya joo jaabwọ kọ ka họ bwaa, iDevidi bọọ jẹ ahyaahị. Chajị nya ọọwa, iJihova wahị kụrwọọ ọwa bala angịnyị nyamwụ, ị tị myịmyị jẹ́ chị ugbiyegu nyaa da bala o-ye ang ụdụ nyaa tịrẹkpẹ bwu ẹga nya aluji nyaa. (1 Sam. 30:7-9, 18, 19) À yẹ ang ịta ịlẹ ká iDevidi họ wẹ? Ọ raabwọ bịlẹ iJihova kọ ka dọọ ụbwọ, ọ kụ irya u-uhye nya ang ịlẹ ká iJihova họ họọ lụka ọkẹkpẹ, bala ọ-họ ụkụrwọ la ẹla ọlẹ ká iJihova byoo. Ányị ahị tị́ ka bwu gbịla iDevidi? Kụ ẹhị yẹ agbẹyị ịta lẹẹ wẹẹ.

1. Raabwọ. Ụka myị́ ụka kahị juwa me imahị, ahị ka jẹ́-ẹ raabwọ bịlẹ ụbwọ ọdada bala ẹla ọjẹ́jẹ bwu ẹga nya iJihova. Ahị ka jẹ́-ẹ hiri olo ọwẹ hi ịlọhị e-egbeju bwula ọ-bịrị ụka ẹ-ẹpwụ nya abwọ ọrịrị bala o-ya je iJihova jaabwọ kọ wẹẹ lahị kpangga. Lee ahị ka jẹ́-ẹ raabwọ o-kpii ọhẹ ẹ-ẹpwụ nya ọkịlẹtụ nyahị myị́, kori kọọwa kem à ka chịkpẹẹ lụka ọwẹ. Ụka myị́ ụka kahị bịlẹ iJihova kọ ka dahị ụbwọ, ahị wẹẹ mẹjẹ nyori ahị dahịhiloo lala iDevidi, ko yẹkẹẹ: “Amkpaa a ri ọngọ chẹwụ kem lẹ. Ọ ri ẹga ọkpịbaa ogiri-giri nyam. Ohe Oluhye a ri ẹwụ ọ-chị ke nyam lẹ, ẹ-ẹga nyamwụ lẹ, m̀ kụ lokpunyi.” (Eje. 18:2) Abwọ ọrịrị kaa họ ụkụrwọ ịnyịlẹhị? Kahlia, ko ri ọọnahị ọnyang ọhẹ ọlẹ kọ kaa ye ịlahị nya ụgbẹyị yẹkẹẹ: “Ụka myị́ ụka kam raabwọ, m̀ kaa yé okpunyi. Abwọ ọrịrị kaa dam  ụbwọ nyọka kụ irya lala iJihova bala ọ-ka dahịhiloo gụ ọwọwa.”

2. Kụ irya. Ụka ká kụ irya u-uhye nya ang ịlẹ kị họ ọ-ọhịhị nyang, à kaa kpịtịya nya akama ịlẹ ká jẹ́ bọhụ ẹ-ẹpwụ nyaa myị́ bwula ụbwọ ọdada nya iJihova? Kori kahị kpịtịya nya abwọlẹ ká iJihova dahị ahị bala anchẹ nyamwụ ụbwọ lụka ọkẹkpẹ, ahị kaa la okpunyi bala ọ-dahịhile iJihova gụ ọọwa. (Eje. 18:17-19) Ọngọgbahị nya ọjịra-jịra ọhẹ ọlẹ ká ẹnyị nyamwụ ri Joshua yẹkẹẹ: “M̀ la ẹgẹhẹ ọlẹ kam kaa da abwọ ọrịrị nyam ịlẹ ká iJihova wẹm ju. Ọọwa kaa dam ụbwọ nyọka kpịtịya nya ụka ịlẹ kam bịlẹ iJihova ang, kọ tị họ ang ịịwa ham kpangga.” Ee, kori kahị kụ irya u-uhye nya ụka lụmẹ-lụmẹ kẹkpẹ ịlẹ ká iJihova dahị ụbwọ, ọ kaa juhi ọngịrị nyọka kịnyaa la ọ-ka ma uya ta imahị ọmeme nyahị.

3. Họ ụkụrwọ. Ene kahị ka cheje u-uhye nya ang ọlẹ kahị ka họ ẹ-ẹpwụ nya iwe-ahụrụ ọọwa, ahị ka ka ẹpwụ nya Omyi Ẹla nya Ohe ka mwahị nya irya ojuju ọlẹ kọ há gụ wuu. (Eje. 19:7, 11) Angịnyị lụmẹ-lụmẹ wẹ ka yẹ nyori ụka kị jẹ́ ang gụ ọọwa u-uhye nya ụpwụ ịgọgọ ọhẹ, ị kaa jẹ́ jaabwọ kị ka kpa họ ụkụrwọ ọ-ọhịhị nyaa gụ ọọwa. Ọngọgbahị nya ọjịra-jịra ọhẹ ọlẹ ká ẹnyị nyamwụ ri Jarrod yẹkẹẹ: “Ụpwụ ọwawa u-uhye nya ọgba nya ịBayịbụụ ọhẹ kaa dam ụbwọ nyọka jẹ́ ang u-uhye nya ọgba ọọwa yẹẹyẹẹ bala ọ-dam ụbwọ nyọka wo etu nya ẹla ọlẹ ká iJihova wẹẹ byim. Ọọwa kaa dam ụbwọ nyọka myị ju ẹla ọlẹ kam wẹẹ wa chajị kam ka jẹ́-ẹ kpa họ ụkụrwọ.” Ụka kahị mwahị nya ẹla ọmẹjẹ nya iJihova bala ọ-kpa ẹla ọlẹ kọ wẹẹ mẹjẹ́ẹhị họ ụkụrwọ, ọ kaa chịhị kpẹẹ nyọka la okpunyi nya ọkịlẹtụ ụka nya imahị omeme.

IDevidi jẹ́ nyori ọwa nyị baba nya ụbwọ ọdada nya iJihova nyọka jẹ́-ẹ la okpunyi bala ọkẹkẹnị ụka nya imahị omeme. Ụbwọ ọdada nya iJihova myọọ lẹhị gbee kọọ ya nyori Ohe nyị ‘ya ọngịrị họwa kpa mwẹla ta aluji nyọwa bala ọngịrị ọ-kpa kụrụ ọngịrị nyaa.’ Ọ myịmyị yẹkẹe: “Ọwa-à ri Ohe Oluhye ọlẹ kọọ jum ọngịrị . . . lẹ.” (Eje. 18:29, 32) Ọ ka lahị lala o-ri akama nyahị lujwo kpoye nyọka cheju lee ahị ọ-ka bọhụ ẹ-ẹpwụ nyamwụ myị́. Ma, bwula ụbwọ ọdada nya iJihova, ahị ka jẹ́-ẹ bọhụ ẹ-ẹpwụ nya akama ọnyị myị́ ọnyị! Ee, kori kahị raabwọ bịlẹ ụbwọ ọdada bwu ẹga nya iJihova, kụ irya ju ang ịlẹ kọ họ hahị lụka ọkẹkpẹ, bala ọ-kpa ẹla ọlẹ kọ byihi họ ụkụrwọ, ahị ka jẹ́-ẹ dahịhile nyori ọ ka ya ọngịrị bala ẹla ọjẹ́jẹ ọlẹ kahị baba hahị nyọka la okpunyi bala ọkẹkẹnị ẹ-ẹpwụ nya imahị omeme!