Nyọlẹ ká iJochuwa kpa angịnyị nya iJihova ụgbẹyị ẹ-ẹpwụ nya ẹka lụmẹ-lụmẹ kpá, o gbu ụka kọ gu ẹka 110. Lụka ọlẹ kọ ji la ọhịhị wuu, ala Isirẹlụ kaa gbịgba ha iJihova. Ma nyọlẹ ká iJochuwa gbu kpá, ị dọmwụ nyọka gbịgba ha ihye ijiga jaabwọ ká ala iKenan kaa họ. Nyọlẹ ká ala Isirẹlụ á ba iJihova jẹ kpẹẹkpẹẹ kaka wẹẹ, ọ ya iwe da adịrahụ nya ala iKenan ọhẹ ká ẹnyị nyamwụ ri ịJabịn yaa ụhị. Ị bịlẹ iJihova kọ ka daa ụbwọ. Ọọwa iJihova à ya ọngọ kpa ịlahị onyeewe haa lẹlẹ. Ọngọọwa à ri ịBarakị lẹ. Ọ ka daa ụbwọ kị ka tịrẹkpẹ wẹ ẹga nya iJihova.

IDibora kọ ri ọlọmwụ, du ẹrụ kaka wụrụ ịBarakị. Ẹrụ ọlẹ ká iJihova du ọnyang ọwẹ tọọ ri yẹkẹẹ: ‘Yile angịdẹwụ angị 10,000, ká kele kaka tọ alẹwụ nya ịJabịn ọ́-ọ̀bá nya iKichọn mẹ. Ụ-ụwa a ka kụrụ iSisẹra, kọ ri olegbeju nya alẹwụ nya ịJabịn lẹlẹ.’ ỊBarakị byi iDibora yẹkẹẹ: ‘Kene-kene kori ká kpam chị lẹ aalẹ, m ka ka ẹẹ.’ IDibora wọọ yẹkẹẹ: ‘M̀ ka kpang chị. Ma tị jẹ́ mẹ, a-ahụ à ka nwụ iSisẹra kaka. IJihova ya nyori ọnyang nya-à ka nwọọ lẹ.’

IDibora ba ịBarakị bala alẹwụ nyamwụ ka Ọgbọdọ ịTabọ kaka nwụlanọ gbe ẹwụ. Ụka ká iSisẹra wo ẹlẹwẹ bwaa lẹ, ọ tụ́ ang-abwọ  nya ẹwụ bala angịdẹwụ nyamwụ guru ọ-ọkpọọ ọlụwa lẹlẹ. IDibora byi ịBarakị yẹkẹẹ: ‘Alẹ à ri ahyẹẹnụ ọlẹ ká iJihova ka ya ọkụrụ-kụrụ hang lẹlẹ.’ ỊBarakị bala alẹwụ nyamwụ angị 10,000 hireji bwu ọgbọdọ jahị da alẹwụ ịtụka nya iSisẹra ịwẹ.

Ọọwa iJihova à họ enyi ọla ọ̀bá nya iKichọn à mwụ kpoye nya ụ̄ka nyamwụ lẹlẹ. Ang ịrụnyẹ ị-kpa dẹwụ nya iSisẹra wụ́ ta ẹpwụ nya ịwa. ISisẹra gba cheji lẹ, ọ rụnyẹ la ẹta lẹlẹ. ỊBarakị bala alẹwụ nyamwụ kụrụ iSisẹra bala alẹwụ nyamwụ, ma iSisẹra ọwa tị be! Ọ rụnyẹ kaka kpịbaa ọ-ọdụ nya ọnyang ọhẹ ká ẹnyị nyamwụ ri ịJayẹlụ. Ọnyang ọọwa ya enyi-ẹmẹ nya ẹna họọ nwà, ọọwa lẹ, ọ ya apwụ ọchụka ọhẹ da kụrwọọ lẹlẹ. Ọgẹwụ ọwẹ nune i-ijata. ỊJayẹlụ jẹ ka ẹga nyamwụ chwee, lẹ ọ ya ang tụ́ iloo nya ọdụ dụrwọọ e-egbeju pyịị lẹlẹ. O gbu i-ijata.

ỊBarakị wẹ ka mwahị nya iSisẹra ụ-ụwa. ỊJayẹlụ kpehe wẹ ọnang nya ọdụ nyamwụ, lẹ ọ yẹkẹẹ: ‘Kẹwẹ wẹ ẹpwang mẹ. M̀ ka mẹ ọngọlẹ ká wẹẹ mwahị jẹ́ng.’ ỊBarakị ka ẹpwang lẹ, ọ yẹ ogu nya iSisẹra nụwa lẹlẹ. ỊBarakị bala iDibora mwu eje gwogbo ha iJihova chajị nyọlẹ kọ ya ọkụrụ-kụrụ ha ala Isirẹlụ u-uhye nya aluji nyaa. Ẹ-ẹpwụ nya ẹka 40 kịlahị nya ọọwa, ala Isirẹlụ la okpunyi.