IJihova byi iMosisi yẹkẹẹ: ‘Kpụ uhye bam warị wẹ ọgbọdọ wẹẹ. M̀ ka da ehile nyam u-uhye nya ajwọ ịpapịla hang.’ IMosisi kpụ uhye nya ọgbọdọ. Ọ hụ ụ-ụwa jịra a-ahị ọpyẹpyẹ bala odu 40. Ụ-ụwa, iJihova da Ehile Iwo nyamwụ ju u-uhye nya ajwọ ịpapịla imiiye ha iMosisi.

Nyọlẹ kọ nọ chẹẹ, ala Isirẹlụ me ká iMosisi rụ hyaa lẹ. Lẹ, ị byi Ẹrọn yẹkẹẹ: ‘Ahị baba nya ọngọ ka kpahị ụgbẹyị. Họ ohe hahị mẹ!’ Ẹrọn waa yẹkẹẹ: ‘Anụ ya okpoko ịgọm nyanụ ham mẹ.’ Nyọlẹ kị họ ịnyị, ọ ya okpoko ịgọm nyaa wulo ju awụlẹ, lẹ ọ ya họ ukpeku nya ẹna lẹlẹ. Ala Isirẹlụ yẹkẹẹ: ‘Ẹna ọlẹ à ri Ohe nyahị ọlẹ kọ gbahị kpehe bwu Ijipiti lẹ!’ Ị dọmwụ nyọka gbịgba ha ẹna nya okpoko ịgọm ọọwa bala ọ-họ ọhụhụ nya ụya ọyaya. Ẹlẹwẹ tịpyọ? Ee, chajị ala Isirẹlụ myị ọnụ nyọka gbịgba ha iJihova ụbwọọmwụ kem. Ma, ị́ tị họ ọnụ ọmyịmyị nyaa ọọwa jịra ka.

IJihova yẹ ang ọlẹ ká ala Isirẹlụ họ, lẹ ọ byi iMosisi yẹkẹẹ: ‘Hireji kele ka ẹga nya angịnyị nyang mẹ. Ị juwa bịrị  ehile nyam bala ọ-gbịgba ha ohe nya ọnọọkịla lẹ.’ IMosisi hireji bwu ọgbọdọ ọwẹ la ajwọ imiiye ịwẹ a-abwọ.

Nyọlẹ ká iMosisi wẹẹ ka pwụ́ ẹga nya ala Isirẹlụ, ọ wo kị juwa mwu eje. Ọ myịmyị yaa kị juwa chị ewo bala o-hirikpẹẹ ha ukpeku nya ẹna ọọwa. Ẹla ọọwa ju iMosisi agbama ọtụka-ọtụka. Ọọwa lẹ, ọ ya ajwọ ịlẹ kọ kpa ụ-ụbwọ mileji lẹ, ị bene yịgẹ-yịgẹ lẹlẹ. Ọ ta ukpeku ọọwa ayịreji ahyaahị. Ọọwa lẹ, ọ tọ Ẹrọn wo yẹkẹẹ: ‘Ányị angịwẹ à tị́ pịrịng ju kaka ba dudu ká họ ang onyobyi ọlịịwẹ?’ Ẹrọn wẹ yẹkẹẹ: ‘A wẹẹjẹ ka. À jẹ́ jaabwọ ká angịwẹ la ene. Ị tịtọ nya ohe, lẹ m̀ ya okpoko ịgọm nyaa wulo ju awụlẹ ẹ-ẹpwụ nya ila, lẹ m ya me ẹna ọwẹ lẹlẹ!’ Ẹrọn á chịla kọ ka họ ẹla ọlịịwẹ ka. IMosisi tịrẹkpẹ ka uhye nya ọgbọdọ kaka bịlẹ iJihova kọ ka hịnyọhi ha angịnyị nyamwụ.

IJihova hịnyọhi ha angịlẹ kị nwụlanọ nyọka jwoo ihi. À yẹ ang odudu kọ baba yẹẹyẹẹ ká ala Isirẹlụ ka ba iMosisi jẹ jaabwọ kọ wẹẹ kpaa ụgbẹyị lẹ?