ỊNasareti iJosẹfụ, iMeri, iJisọsị bala anyịnamwụ ịkịla à kụ lẹ. IJosẹfụ kaa yé okpoko kpa kpẹhị rịrị ugbiyegu nyamwụ bwula ụkụrwọ nya ekeji ọkọkọ nyamwụ, ọ tị myịmyị kaa mẹ ang jáa u-uhye nya iJihova bala Ehile nyamwụ. Ugbiyegu nyamwụ kaa ka ube ọ-mẹ ẹla nya Ohe jẹ ụka myị́ ụka bala ọ-ka iJerusalẹm kaka họ ọhụhụ nya Ang Oriri Ọchịpwụrụ ẹka ọnyị myị́ ọnyị.

Ụka ọlẹ ká iJisọsị gu ẹka 12, ugbiyegu nyamwụ ka anyị ka iJerusalẹm jaabwọ kị kaa họ ene-ene. Angịlẹ kị warị nyọka họ ọhụhụ nya Ang Oriri Ọchịpwụrụ myị̀ epweji ọwẹ kpọrịkọọ. Nyọlẹ kị họ kpá lẹ, iJosẹfụ bala iMeri à dọmwụ nyọka rụ tịrẹkpẹ ka ẹpwa lẹlẹ. Ị me ká iJisọsị juwa bala alogu ẹdịyẹ nyaa. Ma nyọlẹ kị mwahị nyamwụ ka ẹga nya aanaa, ị́ yọọ ka.

Ị tịrẹkpẹ ka iJerusalẹm juwa mwahị nya ọnyị nyaa ẹ-ẹpwụ nya ẹnụtụrụ ịta gbẹgbịlẹ. Ụka ohyẹẹkpẹ lẹ, ị ka ube ịgọgọ lẹlẹ. Ị yẹ iJisọsị hụwa ẹ-ẹpwarịrị nya angịmẹjẹ, juwa ke ụrụ wo ang ọmẹjẹ nyaa bala  o-juwa taa ịtọ ẹla wo. Ẹla nya iJisọsị kpụ angịmẹjẹ ịwẹ ịpyọ yẹẹyẹẹ, kpụ ị juwa tọọ ọwa ịtọ ẹla wo ịnyịnyị. Ọwẹwẹ nyamwụ laa ẹbyẹbyị kaka kpoye. Ị yẹ nyori nyị wo etu nya Ehile nya iJihova.

IJosẹfụ bala iMeri chuko lụmẹ ịnọ. Lẹ, iMeri byi iJisọsị yẹkẹẹ: ‘Ọnyị nyam, am bala adang lẹẹ pịlahị nyang amalẹ kaka. Ale a tị́ rụ ka?’ IJisọsị wọọ yẹkẹẹ: ‘Ánụ jẹ́ nyị chịla káam nyị ka jam ẹ-ẹpwa nya Adam ka?’

IJisọsị ba adamwụ bala ịnamwụ anyị rụ ka ẹpwa. IJosẹfụ mẹ ụkụrwọ nya ekeji ọkọkọ jẹ iJisọsị. Ọngịnyị ụma ọlanyị a tị́ me irya ká iJisọsị ri ụka nya onjwo? Jaabwọ ká iJisọsị wẹẹ nwà adam ọlẹng, ọ jẹ́ ẹla gụ ọọwa, ẹla nyamwụ myịmyị há Ohe Oluhye bala angịnyị yẹẹyẹẹ.