Ụka kọ nọ chẹẹ nyọlẹ ká Adịrahụ iNebukadinesa la ụlaa u-uhye nya ukpeku kpá, ọ me ukpeku nya okpoko ịgọm ọtụka-ọtụka, lẹ ọ ya yeji ụteeji nya iDura lẹlẹ. Ọọwa ọ du ẹrụ ka diro alihi i-ju apyobwuna gụgụ wuu ọ-ọpyị nyamwụ, tụ́ iChedirakị, iMechakị bala Abedinego, kaka jịra ị-ịlahị nya ukpeku nya okpoko ịgọm ọọwa lẹ, ọ da ehile yẹkẹẹ: ‘Ahyaahị kanụ wo anụ nya ẹkụrwẹ, òkó, bala ẹnwụ lẹ, anụ hirikpẹẹ juwa kpụ eteji ha ukpeku nya okpoko ịgọm ọlẹ kam ya yeji mẹ! Ọng myị́ ọng ọlẹ kọ hirikpẹẹ kpụ eteji ha ukpeku ọwẹ ka aalẹ, ị ka hwoo ju ka ẹpwụ nya ẹmwụ nya ila ọtụka-ọtụka.’ Ala iHiburu angị ịta ịwẹ ka kpụ eteji ha ukpeku ọwẹ ịnyịnyị lee iJihova kem ị tị́ ka gbịgba ha?

Ọọwa adịrahụ à ya nyị du ang mẹ lẹlẹ. Ụka kị dọmwụ nya ayịlọ odudu lẹ, ọng myị́ ọng à hirikpẹẹ juwa gbịgba ha ukpeku nya okpoko ịgọm ọwẹ kẹnẹ-kẹnẹ kaka hi iChedirakị, iMechakị bala Abedinego lẹlẹ. Ma nyọlẹ ká alẹng ịhyẹ yaa, ị kele kaka ya ju adịrahụ yẹkẹẹ: ‘Ala iHiburu ịta ịlaanyị á myị gbịgba ha ukpeku nyang ka.’ INebukadinesa du ẹrụ kaka wụrwaa lẹ, o byaa yẹkẹẹ: ‘M̀ ka ya iwe ọkịla da hanụ kanụ ka gbịgba ha ukpeku ọwẹ. Kori kanụ myị họ ịnyị ka aalẹ, m̀ ka goonu ju ka ẹpwụ nya ẹmwụ nya ila. Ohe ọhẹ-lọhẹ á ji kọ ka chịnụ da myị́ bwu ẹpwụtụbwọ nyam ka.’ Ọọwa ị wọọ yẹkẹẹ: ‘Agaba Idu ee, áhị baba nya iwe ọkịla ka. Ohe ọlẹ kahị kaa gbịgba ha la ọngịrị nyọka chịhị da. Ọ́ tị ri kọ họ ịnyị ka wẹwẹ, áhị ka kpụ eteji ha ukpeku nyang ka.’

INebukadinesa ju agbama ọtụka-ọtụka. Ọ byi angịnyị nyamwụ yẹkẹẹ: ‘Anụ du ila ju kọ chị ila pwuu  ugbabwọ irwiye gụ olene!’ Ọọwa ọ byi isoja nyamwụ yẹkẹẹ: ‘Anụ chị alẹng ịwẹ ori, kanụ gyaa ju ka ẹpwụ nya ila!’ Ọchịpwuu nya ila ọlẹ kị du ju lụmẹ kpụ ọ nwụ isoja ịlẹ kị go ala iHiburu ịta ịwẹ kpa kaka ju ka ẹpwụ nya ila ahyaahị. Ma ụka ká iNebukadinesa chị ẹhị ka ẹpwụ nya ila, ọ yẹ alẹng angị ine kị juwa jẹdịyẹ tụ́ gaaa ẹ-ẹpwụ nya ila ọkọkọ nya angị ịta. Ọ lọọ uhihi lụmẹ lẹ, ọ tọ alụkụrwọ nyamwụ wọ yẹkẹẹ: ‘A-angịnyị angị ịta ahị go ju ẹpwụ nya ila ka? M̀ tị yẹ angịnyị angị ine, ọngọhẹ nyaa lala olegu-ẹrụ!’

INebukadinesa jẹ ka ẹga nya ila lẹ, ọ be ẹkọ wụrwaa yẹkẹẹ: ‘Anchẹ nya Ohe Oluhye Agụgụ ee, anụ kpehe warị!’ Ọ la ọng myị́ ọng ẹbyẹbyị nyọlẹ ká iChedirakị, iMechakị bala Abedinego kpehe bwu ẹpwụ nya ila la ịngịngịhyẹ ọ-haa ka. Ila á waa ị-ịnyịrọ, lee inyi, lee ịwụrụ ịlẹ kị kụrụ ka. Ị́ dọmwụ choru ịmwụ-ila ka.

INebukadinesa yẹkẹẹ: ‘Ohe nya iChedirakị, iMechakị bala Abedinego à gụgụ wuu lẹ. Ọ du olegu-ẹrụ nyamwụ kaka chaa da. Ohe ọhẹ-lọhẹ á ji kọ lala Ohe nyaa ka.’

Lala anyị alẹng ịla iHiburu ịta ịwẹ, ahụ cheje nyọka godayị giri-giri ha iJihova jaabwọ myị́ abwọ ká iwe-ahụrụ á la?