Kpehe ka ala ịlẹpwụ

Kpehe ka ẹga kị da egbeju nya ala ju

Ju Ka Ẹpwụ (opens new window)
Mwahị ẹ-ẹpwụ nya JW.ORG

ANG ỌJẸ́JẸ 50

Ányị Ugbiyegu Nyang à Tị́ ka Bwu Chị Ọkẹkẹnị?—Ụpa 2

Ányị Ugbiyegu Nyang à Tị́ ka Bwu Chị Ọkẹkẹnị?—Ụpa 2

Anyị ri āhị bwu ẹga nya iJihova. O tị yẹhị rịrị ká adịda bala ịnịna ka kpẹhị rịrị āhị ọwẹ yẹẹyẹẹ. IJihova mẹ ang lụmẹ-lụmẹ jẹ ịlẹ kị ka jẹ́-ẹ da adịda bala ịnịna ụbwọ nyọka họ ịnyị. Ẹla ọmẹjẹ nyamwụ ka jẹ́-ẹ da anjwo ụbwọ ịnyịnyị nyọka họ ụpa nyaa chajị ká ugbiyegu ka chị ọkẹkẹnị.

1. Ẹlịyẹ iJihova à tị́ byi adịda bala ịnịna nyị họ?

IJihova tịtọ ká adịda bala ịnịna ka la ọháha ẹ-ẹga nya anyị nyaa bala ọ-ka bịrị ụka balaa yẹẹyẹẹ jaabwọ kọ chịkpẹẹ kaka ba. Ọ myịmyị tịtọ ká adịda bala ịnịna ka chewu ke anyị nyaa hi ang onyobyi bala ọ-ka kpa itiwe nya ehile ịlẹpwụ nya ịBayịbụụ mẹ ang jáa. (Etu 1:8) O byi adịda anyị yẹkẹẹ: “Anụ́-ụ juwa kpa anyị nyanụ nwa ẹ-ẹpwụ nya ẹla . . . ọmẹjẹ nya Ọngọlahị la ayịdang mẹ.” (Wa Ala Efesọsị 6:4.) Ọ kaa kpụ iJihova ịpyọ kori ká adịda bala ịnịna á ba ẹla nyamwụ jẹ ụka kị ja kpa ọnyị nyaa nwà, kị pẹhi ụkụrwọ nyaa ọwẹ ju ọngọkịla ụ-ụbwọ ka.

2. Ẹlịyẹ iJihova à tị́ byi anjwo nyị họ?

IJihova da anjwo ehile yẹkẹẹ: “Anụ́-ụ juwa ju ihi nya ịnanụ bala adanụ anyị . . . mẹ.” (Wa Ala iKolosi 3:20.) Ụka ká anjwo á ju ihi nya adaa bala ịnaa bala o-ke ụrụ wo ẹla nyaa, iJihova kaa chị ọkẹkẹnị, adaa bala ịnaa tị kaa chị ọkẹkẹnị ịnyịnyị. (Etu 23:22-25) IJisọsị ya ọgụ-ẹpẹtẹ ọnyịịla deeji ụka ko ri onjwo. Nanana nyori ọ la kpẹẹkpẹẹ, o ju ihi bala o-ke ụrụ wo ẹla nya adamwụ bala ịnamwụ ịlẹ kị la kpẹẹkpẹẹ ka.—ILuku 2:51, 52.

3. Ányị ugbiyegu nyang lẹpwụ-lẹpwụ à tị́ ka bwu tụ́ ju Ohe chwẹẹ?

Ịwẹẹ ọdada á juwa ka, kori ká ri adịda lee ịnịna, à tịtọ ká iJihova ka há anyị nyang jaabwọ kọ háng ịnyịnyị. Ányị a tị́ ka bwu jụ́ ẹlẹwẹ họ? Bwula ọ-họ ẹla ọlẹ ká ịBayịbụụ ya: “Anụ ka kpa [ẹla nya iJihova] ma ya je anyị nyanụ. Anụ ka ya ẹla rwaa ụka kanụ juwa ẹ-ẹpwa lee ụka kanụ juwa ụ-ụgbẹyị.” (Ehile Ọmada 6:7) Etu nyọka “kpa ma ya” ri ọ-mẹ ang jẹ bwula ọ-ma ẹla ookpokpo ya. À jẹ́, o ri o-pyii ká ka kpa ẹla ookpokpo ma ya je anyị nyang ụka ịmanyị tị́ chajị kị ka kpịtịya nyamwụ lẹ. Etu nya ẹla ọlụpwụ ịgọgọ ọwẹ ri, à ka mwahị nya iwe ọlẹ á ka kpa ya ẹla nya iJihova je anyị nyang. Ọ há ká ugbiyegu ka hu ụka ọhẹ nọ ẹ-ẹpwụ nya epwihi ọnyị myị́ ọnyị nyọka jẹ́ ịBayịbụụ lawụlẹ. Kori ká ma anyị lẹka, à ka yé apyobwuna bwula o-hu ụka nọ epwihi ọnyị myị́ ọnyị nyọka jẹ́ Omyi Ẹla nya Ohe.

JẸ́ GỤ ỌỌWA

Kụ ẹhị yẹ ẹla ọmẹjẹ ịlẹ kị ka da ọng myị́ ọng ugbiyegu ụbwọ nyọka la ewu ọ-chị ke bala ọ-ka chị ọkẹkẹnị.

4. Me ẹla jẹ anyị nyang la ọháha

Ẹla ọ-mẹjẹ onjwo kaa lujwo. Ányị ịBayịbụụ à tị́ ka jẹ́-ẹ dang ụbwọ? Wa iJemsi 1:19, 20, kanụ ya ẹla u-uhye nya ịtọ ẹla ịlẹ:

  • Ụka ká adịda bala ịnịna á ja ya ẹla bala anyị nyaa, ányị ị tị́ ka bwu mẹjáa nyori ị la ọháha ẹ-ẹga nyaa?

  • Ịyẹ tị́ du ká adịda lee ịnịna ka yalibyi ta anyị nyamwụ ẹnẹnẹhẹ ụka ko ju agbama ka? a

5. Chewu ke anyị nyang

Nyọka chewu ke anyị nyang, à baba nyọka ya ẹla balaa u-uhye nya ọnyang bala ọlẹng ọ-ka ẹga nya awụlẹ. Ọ ka lang ilo ọ-ọnụ myị́. Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

IFIM: Chewu Ke Anyị Nyang Bwu Ang “Onyobyi” (2:58)

  • Ịyẹ tị́ du kọ kaa lujwo ha adịda bala ịnịna nyọka ya ẹla bala anyị nyaa u-uhye nya ọlẹng bala ọnyang ọ-ka ẹga nya awụlẹ?

  • Ụgbẹyị oyina adịda bala ịnịna ịhyẹ à tị́ jẹ́ bwu da ẹla nya ẹga nya awụlẹ ọkaka wụlẹ je anyị nyaa?

Jaabwọ ká ịBayịbụụ ya neeji, odehe nya Olegu Onyobyi ọlẹ jam tịpyọ ẹ-ẹpwụ nya ang onyobyi ọhọhọ kụ ọyọyị. Wa 2 iTimoti 3:1, 13, kanụ ya ẹla u-uhye nya ịtọ ẹla ọlẹ:

  • Angị inyibyi ịhyẹ ịlẹ ká ọgba 13 ya ẹla rụ́, kaa wu anjwo ichiche bịrị. Lẹ, ịyẹ tị́ du ká adịda bala ịnịna ka mẹ ang jẹ anyị nyaa u-uhye nya ẹga nya awụlẹ ọkaka nya ọnyang bala ọlẹng bala abwọlẹ kị ka bwu chewu ke ịlaa hi angị bịrị anjwo?

À jẹ́ ẹla ọlẹ?

Alibeenu nya iJihova họ ang-abwọ lụmẹ-lụmẹ ịlẹ kị ka da adịda bala ịnịna ụbwọ nyọka ya ẹla ta anyị nyaa u-uhye nya ẹga nya awụlẹ ọkaka bala ọ-ka chewu kaa hi angị bịrị anjwo. Ọ-chụ pwokwita, yẹ:

6. Ju adang bala ịnang ihi

Anjwo ichiche, bala ikolobya bala ịyẹẹnọ ka jẹ́-ẹ mẹjẹ nyori ị ju adaa bala ịnaa ihi bwula abwọlẹ kị kaa ya ẹla taa. Yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.

IFIM: Ányị M Tị́ ka Bwu Ya Ẹla Ta Adam Bala Ịnam? (2:19)

  • Ịyẹ tị́ du kọ há nya onjwo ọ-ka ya ẹla la ihi-ihi ta adamwụ bala ịnamwụ?

  • Ányị onjwo à tị́ ka bwu ya ẹla ta adamwụ bala ịnamwụ ụ-ụgbẹyị ọ-la ihi?

Wa Etu 1:8, kanụ ya ẹla u-uhye nya ịtọ ẹla ọlẹ:

  • Ányị onjwo ochiche à tị́ ka họ ụka ká adamwụ bala ịnamwụ á byoo nyị họ ịngịhyẹ?

7. Gbịgba ha iJihova lala ugbiyegu

Ugbiyegu nya Alibeenu nya iJihova kaa hu ụka nọ epwihi ọnyị myị́ ọnyị nyọka gbịgba ha iJihova lawụlẹ. Ányị ang ọjẹ́jẹ nya ugbiyegu ịlịnyị à tị́ ka la myị́? Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

IFIM: Ang Ọjẹ́jẹ nya Ugbiyegu—Akama Bala Ahị Ọwawa Ịlẹpwụ Nyamwụ (8:04)

  • Ányị ugbiyegu à tị́ ka họ kị ka jẹ́ ang lawụlẹ epwihi ọnyị myị́ ọnyị?

  • Ịyẹ adịda bala ịnịna à tị́ ka họ chajị ká ang ọjẹ́jẹ nya ugbiyegu nyaa ka ju apyobwuna bala ọ-kpịpyọ?—Yẹ ụrụrụ ọhọhẹ ọlẹpwụ nya ang ọjẹ́jẹ ọlẹ.

  • Ịyẹ à tị́ ka du myị́ kọ ka lujwo ha ugbiyegu nyang nyọka jẹ́ ang lawụlẹ?

Lụka onyogo ọ-ọpyị nya Isirẹlụ, iJihova tịtọ ká ugbiyegu ka ya ẹla u-uhye nya Ụpwụ Ịgọgọ lawụlẹ hyaayaa? Wa Ehile Ọmada 6:6, 7, kanụ ya ẹla u-uhye nya ịtọ ẹla ọlẹ:

  • Ányị a tị́ ka bwu kpa ẹla ọwẹ họ ụkụrwọ?

Ang ịlẹ kanụ ka jẹ́-ẹ họ ụka nya ang ọjẹ́jẹ nya ugbiyegu:

  • Nwụlanọ nya ọjịra-jịra lawụlẹ.

  • Wa ụpa nya Ụpwụ Ịgọgọ ọhẹ ọlẹ kọ ka kpụ ugbiyegu nyang ịpyọ, kanụ ya ẹla u-uhye nyamwụ.

  • Kori ká anyị nyang á ri ichiche wẹẹ, kịla ụpa nya ụkụrwọ nya anjwo ọhẹ ju bwu jw.org lee dọọ kpehe.

  • Kori ká anyị nyang á ri ikolobya lee ịyẹẹnọ lẹ, anụ kụ ẹhị yẹ egbeju nya ẹla ịhyẹ bwu jw.org u-uhye nya ikolobya bala ịyẹẹnọ lawụlẹ.

  • Anụ kọ ịdịrama ọhẹ bwu ịBayịbụụ lawụlẹ bala anjwo nyanụ.

  • Anụ yẹ ifim ọhẹ bwu jw.org bala o-ya ẹla u-uhye nyamwụ.

ANGỊHYẸ KAA YẸKẸẸ: “ỊBayịbụụ la kpori-kpori kpoye nyọka mọ́ọ jẹ anjwo.”

  • Ányị a tị́ ka wẹ?

ẸLỊYẸ A TỊ́ JẸ́?

IJihova tịtọ ká adịda bala ịnịna ka la ọháha ẹ-ẹga nya anyị nyaa, mẹ ẹla jáa, bala o-chewu kaa; ọ tịtọ ká anyị ka ju adaa bala ịnaa ihi bala o-ke ụrụ wo ẹla nyaa; ọ myịmyị tịtọ ká ugbiyegu ka gbịgba họọ lawụlẹ.

Ẹlịyẹ A Tị́ Yụbwọ Chị?

  • Ányị adịda bala ịnịna à tị́ ka bwu mẹ ẹla jẹ anyị nyaa bala o-chewu kaa?

  • Ányị anjwo à tị́ ka bwu chị ihi ju adaa bala ịnaa?

  • Ịyẹ à tị́ ri apyobwuna nya ugbiyegu ọ-ka hu ụka nọ epwihi ọnyị myị́ ọnyị nyọka gbịgba ha iJihova lawụlẹ?

Ụkụrwọ ọlẹ á ka họ

JẸ́ ANG ỊLẸ DỌỌ U-UHYE

Ẹlịyẹ ọjẹ́jẹ à tị́ ka jẹ́-ẹ nwụla anyị nyang nọ gbe ọngọgbahị oriri?

“Six Lessons Children Need to Learn” (Awake! No. 2 2019)

Yẹ ẹla o-ju apyobwuna ọlẹ ká ịBayịbụụ mẹjẹ angị kaa kpẹhị rịrị adaa bala ịnaa ịlẹ kị chị okwirichi lẹ.

“Ẹlịyẹ ỊBayịbụụ à Tị́ Ya u-Uhye nya Ẹhị ọ-Kpa Rịrị Adịda Bala Ịnịna Ịlẹ Kị Chị Okwirichi lẹ?” (Ụpwụ ọla intanẹtị)

Yẹ jaabwọ ká ọlẹng ọhẹ ọlẹ kọ jẹ́ jaabwọ kị kaa kpa anyị nwà ka, wẹ ka ri adịda ọnyịịla.

IJihova Mẹjẹ́ẹhị Jaabwọ Áhị Ka Bwu Kpa Anyị Nyahị Nwà (5:58)

Yẹ jaabwọ ká adịda anyị ka bwu ju igu oriri nyaa bala anyị alẹng nyaa ọngịrị.

“Ányị Adịda Anyị à Tị́ ka Tụ́ Ju Anyị Nyaa Chwẹẹ Kịlahị-ịlahị?” (Ẹpwang ọ-Kụ Gbeji nya ahyẹẹnụ 1 nya Ọya Ọkụrụ Ọhọhẹ, 2011)

a Ẹ-ẹpwụ nya ịBayịbụụ, alibyi lee “ọmẹjẹ” datị hi ọ-ka yẹ ọngịnyị akama lee ọ-họọ ọkwọ. Ọ ri ọ-ka mẹ ang jẹ ọngịnyị, kpọọ ụgbẹyị, bala ọ-ka nwọọ rịrị.—Etu 4:1.

CHỊ ỌKẸKẸNỊ GBOYI MYỊ́ OYI!—ỊBAYỊBỤỤ Ọ-JẸ́ LAWỤLẸ

Ányị Ugbiyegu Nyang à Tị́ ka Bwu Chị Ọkẹkẹnị?—Ụpa 2

Igede
Ányị Ugbiyegu Nyang à Tị́ ka Bwu Chị Ọkẹkẹnị?—Ụpa 2
https://cms-imgp.jw-cdn.org/img/p/1102021250/univ/art/1102021250_univ_sqr_xl.jpg
lff ang ọjẹ́jẹ 50
Ẹga á ka chụ ang ịlẹ á ka kịla ju
Ányị Ugbiyegu Nyang à Tị́ ka Bwu Chị Ọkẹkẹnị?—Ụpa 2
Jaabwọ á ka kịla ang ịlẹ á ka jẹ́-ẹ wa ẹ-ẹpwụ nya intanẹtị ju Chị Ọkẹkẹnị Gboyi Myị́ Oyi!—ỊBayịbụụ ọ-Jẹ́ Lawụlẹ.