ANG ỌJẸ́JẸ 28
Mẹjẹ Nyori Ang Ọlẹ ká IJihova Bala IJisọsị Họ Hang Mying Lẹhị
Ányị ọ tị́ kaa lang ụka ká oligu nyang á ya āhị ọnyịịla ọhẹ hang? Ọhẹka à chị ọkẹkẹnị yẹẹyẹẹ bala ọ-tịtọ nyọka mẹjẹ oligu nyang nyori āhị ọọwa nyị myịng lẹhị. IJihova bala iJisọsị ya āhị ọlẹ kọ gụgụ wuu hahị. Ịyẹ āhị ọọwa à tị́ ri? Ányị ahị tị́ ka mẹjẹ nyori ọ myịhị lẹhị?
1. Ụgbẹyị oyina a tị́ ka mẹjẹ nyori ang ọlẹ ká Ohe bala iJisọsị họ hang myịng lẹhị?
ỊBayịbụụ chehe nyori “ọng myị́ ọng ọlẹ kọ myị [la iJisọsị]” nyị ka la ọhịhị ọmyịmyị-ka. (ỊJọn 3:16) Ányị ahị tị́ ka bwu họ ịnyị? Ahị baba nyọka mẹjẹ nyori ahị la ọmyịmyị bwula eje ịlẹ kahị kaa chị bala ang ịlẹ kahị kaa họ. (IJemsi 2:17) Ụka kahị mẹjẹ nyori ahị la ọmyịmyị bwula ang ịlẹ kahị kaa họ bala ẹla ọlẹ kahị kaa ya, ọọwa kaa du ká igu oriri nyahị bala iJisọsị, tụ́ iJihova Adamwụ kaa la ọngịrị.—Wa ịJọn 14:21.
2. Ọtụguru oyina à tị́ kaa dahị ụbwọ nyọka mẹjẹ nyori ẹla ọlẹ ká iJihova bala iJisọsị họ hahị myịhị lẹhị?
Lobyi ene nya ẹnẹlẹ ká iJisọsị gbu, ọ mẹ ụgbẹyị ọkịla jẹ angịjụgbẹyị nyamwụ, ọlẹ kị ka bwu mẹjẹ nyori iya ọkịlaakịla nyamwụ nyị myaa lẹhị. O byaa nyị tụguru nyọka Kpa Kpịtịya nya Igu nyamwụ. (1 Ala ịKọrịntị 11:20) IJisọsị tịtọ ká angịjụgbẹyị nyamwụ bala Angịnyị nya ịKịrayịsị nyịlẹhị wuu ịlẹ kị hịhị ẹ-ẹkpẹ nyaa, ka kpịtịya nyori nyị hu ọhịhị nyamwụ kiliya wọnụ nyaa ju. Lẹ ọ da ehile yẹkẹẹ: “Anụ́-ụ juwa ri ang oriri ọlẹ ịnyịnyịịnyị, nya ọ-kpa kpịtịya nyam mẹ.” (ILuku 22:19) Ụka ká ka ọ-Họ Kpa Kpịtịya nya Igu nya ịKịrayịsị, à wẹẹ mẹjẹ nyori ọháha ọlẹ ká iJihova bala iJisọsị mẹjẹ ẹ-ẹga nyahị myịng lẹhị.
JẸ́ GỤ ỌỌWA
Kụ ẹhị yẹ agbẹyị ịkịla ịlẹ á ka jẹ́-ẹ bwu mẹjẹ nyori ọháha nya iJihova bala iJisọsị myịng lẹhị. Jẹ́ ang odudu ká ọ-Họ Kpa Kpịtịya nya Igu nya ịKịrayịsị baba yẹẹyẹẹ.
3. Ịyẹ ahị tị́ ka jẹ́-ẹ họ nyọka mẹjẹ nyori āhị ọwẹ myịhị lẹhị
Kori ká ja ka byi enyi, ká ọngịnyị-ị́ tị chịng da, à ka deeri nya ang ọlẹ ká ọngọọwa họ hang ahyaahị? Lee à tị́ ka mwahị nya agbẹyị ịlẹ á ka bwu mẹjẹ ọngọọwa nyori ẹla ọlẹ kọ họ hang myịng lẹhị?
Ahị la iwe nyọka hịhị gboyi myị́ oyi bwula ọnahị nya iJihova. Wa 1 ịJọn 4:8-10, kanụ ya ẹla u-uhye nya ịtọ ẹla ịlẹ:
-
Ịyẹ tị́ du ká iya ọkịlaakịla nya iJisọsị ri āhị ọdatị?
-
Ányị ẹla ọlẹ ká iJihova bala iJisọsị họ hang à tị́ lang?
Ányị ahị tị́ ka bwu mẹjẹ nyori ang ọlẹ ká iJihova bala iJisọsị họ hahị myịhị lẹhị? Wa 2 Ala ịKọrịntị 5:15 bala 1 ịJọn 4:11; 5:3. Kori kanụ wa ụpwụ ịgọgọ ọnyọnyọọnyị kpá, anụ ya ẹla u-uhye nya ịtọ ẹla ọlẹ:
-
Jaabwọ ká ụpwụ ịgọgọ ọwẹ mẹjẹ, ịyẹ a tị́ ka họ nyọka mẹjẹ nyori ẹla nya iJihova bala iJisọsị myịng lẹhị?
4. Ba ọgụ-ẹpẹtẹ nya iJisọsị jẹ
Ụgbẹyị ọkịla ọlẹ kahị ka jẹ́-ẹ mẹjẹ nyori ẹla nya iJihova bala iJisọsị myịhị lẹhị ri ọ-ka gbịla iJisọsị. Wa 1 iPita 2:21, kanụ ya ẹla u-uhye nya ịtọ ẹla ọlẹ:
-
Ụgbẹyị oyina a tị́ ka jẹ́-ẹ ba ọgụ-ẹpẹtẹ nya iJisọsị jẹ?
Omyi Ẹla nya Ohe há iJisọsị, ọ kaa ya ẹrụ ọnyịịla, bala ọ-da angịkịla ụbwọ
5. Ka ọ-Họ Kpa Kpịtịya nya Igu nya ịKịrayịsị
Nyọka jẹ́ ang ọlẹ kị họ ụka nya ọ-Họ Kpa Kpịtịya ọhọhẹ, wa iLuku 22:14, 19, 20, kanụ ya ẹla u-uhye nya ịtọ ẹla ịlẹ:
-
Ịyẹ à tị́ họ ụka nya ọ-Họ Kpa Kpịtịya ọwẹ?
-
Ịyẹ ịkaa bala ere à tị́ ku ọmwakpa?—Yẹ ọgba 19 bala 20.
IJisọsị tịtọ ká angịjụgbẹyị nyamwụ ka kpịtịya nyamwụ ụka ookpokpo ẹ-ẹpwụ nya ẹka, pwoku ahyẹẹnụ ọlẹ kọ gbu. Lẹ, Alibeenu nya iJihova kaa tụguru ẹka ọnyị myị́ ọnyị nyọka kpịtịya nya igu nya ịKịrayịsị ụ-ụgbẹyị ọlẹ kọ ya nyị họ. Nyọka jẹ́ ang u-uhye nya ọhụhụ ọwẹ, yẹ IFIM ọwẹ, kanụ ya ẹla u-uhye nya ịtọ ẹla ọlẹ:
-
Ịyẹ ị tịị họ ụka nya ọ-Họ Kpa Kpịtịya?
Ịkaa bala ere ku ọmwakpa nya ang ịnyị. Ịkaa ku ọmwakpa nya ịnyịrọ ọkpẹẹkpẹẹ nya iJisọsị ọlẹ kọ hu kiliya wọnụ nyahị ju. Ere ku ọmwakpa nya ịwọ nyamwụ
ANGỊHYẸ KAA YẸKẸẸ: “Ang ọlẹ ká baba kem nyọka chịda ri ọ-ka myị la iJisọsị.”
-
Ányị a tị́ ka jẹ́-ẹ kpa ịJọn 3:16 bala iJemsi 2:17 mẹjẹ nyori ahị baba nyọka họ gụ ọ-ka myị ịịwẹ kem?
ẸLỊYẸ A TỊ́ JẸ́?
Ahị kaa mẹjẹ nyori ẹla ọlẹ ká iJisọsị họ myịhị lẹhị bwula ọ-la ọmyịmyị ẹ-ẹga nyamwụ bala ọ-ka ọ-Họ Kpa Kpịtịya nya Igu nyamwụ.
Ẹlịyẹ A Tị́ Yụbwọ Chị?
-
Ịyẹ à tị́ ji ẹpwụ nya ọmyịmyị ọlala ẹ-ẹga nya iJisọsị?
-
Ụgbẹyị oyina a tị́ ka bwu mẹjẹ nyori ẹla ọlẹ ká iJihova bala iJisọsị họ hang myịng lẹhị?
-
Ịyẹ tị́ du kọ baba yẹẹyẹẹ nyọka ka ọ-Họ Kpa Kpịtịya nya Igu nya ịKịrayịsị?
JẸ́ ANG ỊLẸ DỌỌ U-UHYE
Igu nya ịKịrayịsị tị́ kaa guhi gbịla nyọka họ ẹlịyẹ?
Jẹ́ ang gụ ọọwa u-uhye nya ọmyịmyị bala abwọlẹ kahị ka bwu kpa họ ụkụrwọ.
“La Ọmyịmyị u-Uhye nya Ehe Ọchịchị nya IJihova” (Ẹpwang ọ-Kụ Gbeji nya Ọya Okiriwo, 2016)
Ẹ-ẹpwụ nya oja ọlẹ ko ri, “M̀ Lịlọm Cheri-cheri, Lala Ọngọ Hịhị, Bala Ọngọ Chọnụ,” yẹ jaabwọ ká ọhịhị nya ọnyang ọhẹ yẹda ka ọnyịịla ụka kọ jẹ́ ang ọlẹ ká igu nya iJisọsị họ họọ.
“ỊBayibuu Kaa Yẹ Ọhịhị Da” (Ẹpwang ọ-Kụ Gbeji nya ahyẹẹnụ 1 nya Ọya Ọhaneku, 2011)
Jẹ́ ang odudu ká angị ịmanyị-ịmanyị à kaa ri ịkaa bala ọ-nwà ere ụka nya ọ-Họ Kpa Kpịtịya.
“Ịyẹ Tị́ Du ká Alibeenu nya IJihova Kaa Ri Ang Oriri nya Obyi nya Ọngọlahị ụ-Ụgbẹyị Ọdatị Hi Abwọlẹ ká Ịgba Ọgbagba Ịkịla Kaa Họ?” (Ụpwụ ọla intanẹtị)
